muslim.uz
Ўзбекистон ва Саудия Арабистони ўртасида сиёсий маслаҳатлашув ўтказилади
Бугун, 3 декабрь куни Риёз шаҳрида Ўзбекистон Республикаси Ташқи ишлар вазирлиги ҳамда Саудия Арабистони Ташқи ишлар вазирлиги ўртасида учрашув ўтказилмоқда. Икки мамлакат вазирликлари ўртасида Ўзбекистон - Саудия Арабистони сиёсий маслаҳатлашувларининг навбатдаги раундига старт берилган.
ТИВ Матбуот хизматининг маълум қилишича, Ўзбекистон Республикаси Ташқи ишлар вазири ўринбосари Дилшод Ахатов бошчилигидаги делегация қатор учрашувлар ва музокаралар ўтказиши кутилмоқда.
Ўзбекистон мусулмонлари идораси Матбуот хизмати
Доғистонга Пайғамбаримиз соллаллоҳу алайҳи ва салламнинг авлодлари вакили келди
Россия Федерацияси таркибидаги Доғистон Республикасига Пайғамбаримиз Муҳаммад саллоллоҳу алайҳи васалламнинг авлоди бўлган Муҳаммад ас Сакаф ташриф буюрган.
islam-today нашрининг маълум қилишича, Махачқалъа шаҳри аэропортида юқори мартабали меҳмонни кутиб олиш учун Республика муфтияти вакиллари ҳозир бўлишган. Жаноб Ас Сакафнинг айтишича, у узоқ вақтлардан буён Доғистонга мусулмон биродарлар билан учрашиш учун келмоқчи бўлган.
Маълумотларга кўра, Муҳаммад ас Сакаф Доғистондаги бир қанча диний-маърифий тадбирларда иштирок этади. 30 ноябрь куни мартабали меҳмон Махачқалъа Марказий жоме масжидида жума намозида ўз маърузаси билан билан иштирок этган.
Ўзбекистон мусулмонлари идораси Матбуот хизмати
Нишонга урилган гаплар: “Китоб – жонсиз қоғозлар йиғиндиси эмас. Балки у саҳифаларда яшайдиган ақллардир”
Қуйида келтириладиган фикрлар ижтимоий тармоқлардаги турли саҳифалардан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган.
*****
Гапиришдан кўра кўпроқ эшитишимиз учун Аллоҳ таоло бизга иккита қулоқ ва битта тил берди.
“Тарих муҳрлаган сўзлар”
*****
Китоб – жонсиз қоғозлар йиғиндиси эмас. Балки у саҳифаларда яшайдиган ақллардир.
*****
Ҳадялар фақат беришдан иборат эмас. Балки бермасликдан ҳам иборат бўлади. Одамларнинг сирларини беркитиш, уни бировга айтмаслик, тилни тийиб, у билан бошқаларга озор бермаслик ҳам ҳадядир. Ҳадя бўлганда ҳам энг қимматбаҳо ҳадялардандир.
*****
Одамлар кенгчилик пайтида бир хилдирлар. Машаққатли лаҳзаларда уларнинг асл табиатлари намоён бўлади.
Ибн Халдун раҳимаҳуллоҳ
*****
Агар сени яхши кўрадиган оиланг, бир нечта вафодор дўстларинг, дастурхонда таоминг, бошинг тепасида шифтинг бўлса, сен ўзинг тасаввур қилганингдан ҳам бойроқ экансан.
“Тарих муҳрлаган сўзлар”
*****
- Йигит кексаяди.
- Енгилтак ўспирин вақт ўтиши билан босилиб қолади.
- Жоҳил ўқиб-ўрганади.
- Бемор тузалади.
- Лекин аҳмоқнинг аҳмоқлиги давом этаверади.
“Тарих муҳрлаган сўзлар”
*****
Агар ўзингни билмаганга олишни ўргансанг, ҳаётдаги муаммоларнинг ярмини енгиб ўтибсан.
Нажиб Маҳфуз
*****
Агар инсонни яхши кўрган нарсасидан маҳрум қилиб, ёқтирмаган нарсасига мажбур қилинса, ўша инсоннинг асл табиати, ҳақиқати зоҳир бўлади.
Доктор Мустафо Маҳмуд
*****
Одамларнинг ақли етукроғи ва дили покроғи инсонларга, уларнинг ақлларининг риоясини қилиб гапирувчи кишидир.
Абу Али ибн Сино
*****
Одамлар бахтсизлигининг ярми ўзларида бўлмаган нарсани бор қилиб кўрсатишга уринишларидан келиб чиқади.
“Тарих муҳрлаган сўзлар”
*****
- Муваффақият тўғри қарорлардан келиб чиқади.
- Тўғри қарорлар тажриба, малакадан келиб чиқади.
- Тажриба, малака эса муваффақиятсиз уриниш, муваффақиятсиз тажрибалардан келиб чиқади.
“Тарих муҳрлаган сўзлар”
*****
Баландроқ бино қуриш учун унинг пойдеворини чуқурроқ кавлашинг керак.
“Тарих муҳрлаган сўзлар”
*****
Баъзида сенга нисбатан ҳасад насиҳат кўринишида келади.
*****
Интернет материалларидан тўплаб, таржима қилувчи
Нозимжон Иминжонов
Қалбларга шодлик улашиб…
3 декабрь – Халқаро ногиронлар куни муносабати билан Тошкент вилояти Бўка туманида тадбир ташкил этилди. Унда имконияти чекланган фуқароларимизнинг кўнглини олиш, юзларига табассум улашиш мақсадида Бўка тумани ҳокимлиги, туман прокуратураси ҳамда бошқа мутасадди ташкилотларнинг совға-саломлари улашилди.
Бўка туманида фаолият олиб бораётган имом-хатиблар томонидан “Баҳор” ресторанида меҳмонлар учун байрамона дастурхон тайёрланди.
Ташриф буюрганлар уларга кўрсатилаётган эътибор, ғамхўрликдан мамнун эканликлари, байрамона тадбир уларда жуда яхши таассуротлар қолдирганлигини таъкидладилар ва бу тадбирни уюштиришда хизмат қилган барча мутасаддиларга ўз миннатдорчиликларини изҳор этдилар.
Шайх ҳазратларининг асарлари Россияда тасдиқланган исломий адабиётлар рўйхатига киритилди
Гап шундаки, бу рўйхат Россия Федерациясидаги жазони ижро этиш муассасалари маҳкумлари учун тузилган янги исломий адабиётлар рўйхати ҳисобланади. Татаристоннинг Булғор шаҳрида Россия Жазони ижро этиш федерал хизмати (ЖИФХ) қошида марказлашган мусулмон ташкилотлари билан ўзаро ҳамкорлик қилиш бўйича ишчи гуруҳининг йиғилиши ўтказилди.
Йиғилишда жазони ижро этиш тизими муассасалари кутубхоналари фондини тўлдириш учун исломий адабиёт рўйхати тасдиқланди. Тасдиқланган китоблар рўйхатидан Қуръони каримнинг маънолари таржималари, Пайғамбаримиз соллаллоҳу алайҳи васалламнинг ҳаёт фаолиятлари, аҳли суннатнинг мазҳаблари, ислом фиқҳи каби исломий адабиётлар ўрин олган. Шунингдек, рўйхатдан мумтоз ва замонавий ёзувчиларнинг машҳур диний-маърифий асарлари, диний қарашлари замонавий талқинда акс эттирилган бадиий адабиётлар ҳам жой олган.
Маълум бўлишича, ишчи гуруҳи томонидан адабиётлар рўйхати уч қисмга бўлинган. Биринчи қисмга тегишли китоблар жазони ижро этиш муассасасининг ибодат қиладиган хонасида туради. Иккинчи қисмга тегишли китоблар эса муассасанинг кутубхонаси фондида туради ва маҳбуслар уларни буюртма бериш орқали олиб ўқишлари мумкин. Учинчи қисмга тегишли бўлган махсус китобларни имом-домлалар ўзлари билан муассасага олиб келадилар. Адабиётлар рўйхатига жами 150 та янги китоб киритилган бўлиб, шу тариқа маҳбусларга диний мавзуда қизиқарли ҳар қандай адабиётдан кенг фойдаланиш имконияти яратилмоқда.
Ўтган давр мобайнида “Ал-Васатия – мувозанат” маркази томонидан РФ жазони ижро этиш муассасалари учун кўплаб исломий адабиётлар тайёрланиб, етказиб берилган. Жумладан, 42 та мусулмон муаллифларининг асарлари катта ададларда нашр этилиб ЖИМга бепул тарқатилган.
Муҳим жиҳати шундан иборатки, Россия Федерацияси жазони ижро этиш муассасаларида туриши зарур бўлган китоблар қаторидан, айнан мана шу “Ал-Васатия – мувозанат” маркази тавсиясига кўра, марҳум устозимиз Шайх Муҳаммад Содиқ Муҳаммад Юсуф роҳимаҳуллоҳнинг учта китоблари ҳам ўрин олган. Булар “Васатыя – путь жизни”, “Ислам, Иман, Коран” ва “Разногласия: причины и решения” китобларидир. Бу китоблар жазони ижро этиш муассасидаги ибодат қилиш хоналарида туриши керак бўлган биринчи қисм китоблар рўйхатига киритилди. Бу рўйхатдан жами 24 та китоб ўрин олган.
Шунингдек, Марказ томонидан Шайх ҳазратнинг «Открытое послание», «Религия – насиха», «Хадисы и жизнь, 1 том», «Счастливая семья» номли китоблари ҳам жазони ижро этиш муассасалари кутубхонаси фондларида сақланишига тавсия қилинган. “Ал-Васатия – мувозанат” марказининг кўрсатмасига биноан, бу китоблар барчага тушунарли, равон тилда ёзилган бўлиб, имом-домлаларнинг изоҳлаб беришларига ҳожат йўқ.
IslamNews хабарига кўра, ушбу федерал хизмат қошидаги ишчи гуруҳ озодликдан маҳрум этиш жойларида ўтказиладиган диний-маърифий тадбирларнинг мониторингини олиб бориш, қамоқхоналардаги имомларнинг фаолиятига кўмаклашиш, муассаса ходимларининг малакасини оширишда иштирок этишади. Ишчи гуруҳ доимий асосда иш олиб бориб ҳар чоракда ҳисоботлар тақдим этиб турилади. Тингловчиларни ислом тарихи, мусулмон маданияти ва ислом ахлоқи билан таништиришади.
Islоm.uz портали таҳририяти