Саудия Aрабистонининг Ҳаж ва Умра вазирлиги хорижлик зиёратчилар гуруҳ раҳбарларини Қиролликка келишидан олдин тайёрлаш бўйича ўқитиш дастурини ишга туширди.
Дастурнинг мақсади Саудия Арабистонидаги “Нигоҳ-2030” лойиҳаси мақсадларига мувофиқ, зиёратчиларга хизмат кўрсатиш сифатини ошириш, зиёратларни қулайлаштириш ҳамда диний ва маданий тажрибани бойитишдан иборат.
Мазкур тайёрлов курсини биринчи сессияси Куала-Лумпурда бўлиб ўтди ва унда 30 дан ортиқ гуруҳ раҳбарлари ҳамда Саудия Арабистони Ҳаж ва Умра вазири доктор Тавфиқ бин Фавзан ар-Робиъа иштирок этди.
Мазкур дастурга мувофиқ, бу йилги Ҳаж мавсуми бошланишидан олдин мамлакатларда навбатдаги сессиялар ташкил этилади. Шунингдек, ўқув дастури ҳаж зиёратини батафсил тушунтириш, жамоатни бошқаришнинг барча жиҳатларини қамраб олади.
Қолаверса, бу дастурда ҳаж ва умра зиёрати билан шуғулланувчи барча ташкилот ва идоралар билан ҳамкорлик қилиш мақсад қилинган. Келгуси бу лойиҳа ҳаж ва умра зиёратчиларига кўрсатиладиган маъмурий ва кўчма хизматлар сифатини оширишга ҳисса қўшади ва тингловчиларни ўқитиш ва тайёрлаш учун энг яхши дастурларни таклиф этади.

ЎМИ ходими И.Аҳмедов тайёрлади.

2022–2026 йилларга мўлжалланган Янги Ўзбекистоннинг тараққиёт стратегиясини «Инсонга эътибор ва сифатли таълим йили»да амалга оширишга оид Давлат дастури лойиҳасида бу йил юртимизда туризм хизматлари экспортини 2 миллиард долларга етказиш вазифаси қўйилган, деб ёзмоқда “Зарафшон “ нашри.
Бу борада мамлакатимизда, хусусан, вилоятимизда зарур ишлар қилиняпти. Хусусан, давлатимиз раҳбарининг тегишли қарорида «Самарқанд – Янги Ўзбекистоннинг туризм дарвозаси» тарғибот кампанияси ўтказиш белгиланган. Шу мақсадда Самарқанд шаҳрида «Aviation & Logistics Forum» II халқаро авиация форуми ташкил этилади. Самарқанд жаҳон туризм ташкилотининг навбатдаги йиғилишига ҳам мезбонлик қилади. Умуман, бу ерда йил давомида йигирмадан ортиқ халқаро форум ва анжуманлар ўтказилади.
Янгидан бунёд этилаётган Имом Бухорий мажмуаси ҳам шу йилдан фойдаланишга топширилиб, сайёҳларни қабул қила бошлайди. Янги туризм кўчалари, туризм қишлоқлари барпо қилинади ва шунга мос равишда инфратузилма яратилади, хизмат кўрсатиш йўлга қўйилади.

Ўзбекистон мусулмонлари идораси матбуот хизмати

Бугун, 1 март куни АҚШ Давлат департаменти раҳбари Энтони Блинкен Ўзбекистонга илк расмий ташрифи давомида Тошкент шаҳридаги "Ҳазрати Имом" мажмуасини зиёрат қилди. Мартабали меҳмонни Ўзбекистон мусулмонлари идораси раисининг биринчи ўринбосари Ҳомиджон домла Ишматбеков кутиб олди.
АҚШ Давлат котибига Ҳазрати Имом мажмуаси, унга ёндош барпо этилаётган Ислом цивилизацияси маркази ва Ўзбекистондаги мўмин-мусулмонларга яратилган шароитлар хусусида маълумот берилди.

Ўзбекистон мусулмонлари идораси Матбуот хизмати

Муҳаммад ибн Абдулваҳҳоб ўз акаси Сулаймон ибн Абдулваҳҳобнинг шогирди бўлган. Лекин у акасидан олган илмда ҳаддидан ошиб, ислом шариатида кўрсатмаси (устави) бўлмаган ва уламолар ҳам билмаган бидъат ишларни олиб келди.
Сулаймон ибн Абдулваҳҳоб укасига раддия сифатида унинг сўзлари ботил экани ва сўзлари ислом шариатига муносиб эмаслигини баён қилиб бериш учун китоб ҳам ёзган.

"Бугуннинг масаласи тўғрисида Имом Бутий билан бирга" номли дастурдан.
Абдуллоҳ Ғуломов таржимаси

Тошкент ислом институтида “Февраль – Қуръон қироати ва илмлари фан ойлиги” деб эълон қилинган. Шу муносабат билан Таҳфизул Қуръон кафедраси томонидан Олий маъҳад талаба қизлари ўртасида “Қуръон мусобақаси – 2023” кўрик-танлови ўтказилди.
Унинг якуний босқичида ТИИ ректори, профессор Муҳаммадолим домла Муҳаммадсиддиқов, Таҳфизул Қуръон кафедраси мудири Жаҳонгир қори Неъматов, Ўқув ишлари бўйича проректор Ёқуб домла Бухарбаев, Илмий ишлар ва фан бўйича проректори Соатмурод Примов, Кундузги таълим факультети декани Ибодуллоҳ домла Ахроров қатнашдилар.
Тадбир икки йўналишда ҳифз ва тиловат йўналишида ўтказилди. Унинг якунида тиловат йўналиши бўйича ғолиблар деб қуйидагилар топилди:
1-ўрин: 2-курс талабаси Нажмиддинова Нозимахон;
2-ўрин: 3-курс талабаси Норхўжаева Нилуфар;
3-ўрин: 4-курс талабаси Азизова Зилола.

Ҳифз йўналиши бўйича:
1-ўрин: 1-курс талабаси Хўжаёр Бушро Амина;
2-ўрин: 4-курс талабаси Султонова Бибихадича;
3-ўрин: 1-курс талабаси Валихонова Оминахон.
Ғолиба қория қизларга телевизор, минипечь, китоблар тўплами ва бошқа қимматбаҳо совғалар топширилди.

Билим юрти матбуот хизмати