muslim.uz
Тақво нима?
Имом ибн Жавзий раҳимаҳуллоҳ шундай дейди:
“Шундай бўлдики, мен қийин вазиятга тушиб қолдим ва бу мени қайғуга солди. Мен бундан қандай қутулиш кераклиги ҳақида ўйлай бошладим, аммо чиқиш йўли ҳеч ҳам кўринмас эди. Шунда бирдан бу оятни эшитиб қолдим: «Ким Аллоҳдан қўрқса, У зот унинг учун чиқар йўлни (пайдо) қилур ва уни ўйламаган томонидан ризқлантирур» ("Талоқ" сураси, 2-3 оятлар).
Ўшанда мен Аллоҳдан қўрқиш, тақво ҳар қандай қийин вазиятдан чиқиш, ҳар қандай қайғуга ёрдам беришини англадим. Мен унга амал қила бошлашим биланоқ, нажот йўлини топдим».
Яъни, қайси бир банда Аллоҳ таолога тақво қилса, У зот буюрган амалларни ихлос билан бажариб, қайтарган нарсалардан сақланса, Аллоҳ бундай бандани ҳар қандай кулфат ва мусибатлардан, ғам-андуҳлардан фориғ этиб, уни ўзи ўйламаган, хаёлига келтирмаган томондан ризқлантириб қўяди.
Баъзи тафсир китобларида ушбу оят “Кимки ҳаромдан тақво қилса, Аллоҳ у банда учун ҳалолга, қийинчиликлардан фаровонликка ва дўзахдан жаннатга чиқар йўл пайдо қилади” деб тафсир қилинган (“Тафсирул алусий”).
Ислом динини бир томонлама талқин қилувчиларда тақводорлик тўғрисида нотўғри тушунча шаклланган. Баъзилар тақвони тарки дунё қилиш, қоронғи хонага кириб зикру ибодат билан машғул бўлиш, деб тушунадилар.
Аслида, «тақво» сўзи «сақланмоқ», «эҳтиёт бўлмоқ» маъноларини англатади. У «виқоя» сўзидан олинган бўлиб, бир нарсани унга озор ва зарар берадиган нарсадан сақлашни англатади. Бинобарин, тақво ўзини қўрқинчли нарсадан сақлашдан иборат. Гоҳида «тақво» хавф маъносида ёки аксинча ҳам ишлатилади.
Ҳазрати Умар розияллоҳу анҳудан: «Тақво нима?» деб сўралганда, «Араблар сертикан майдондан ялангоёқ бўлиб, тикондан сақланиб ўтиб кетишни тақво деб атайдилар», деганлар.
Ҳаётда гуноҳ ишлар ҳам худди тиконларга ўхшайди. Ким улардан эҳтиёт бўлмаса, озор чекади, улардан сақланиб юрган киши эса тақво қилган бўлади. Оқибатда тақво инсон қалбидаги ҳолатга айланади. Бу ҳолат қалбни ҳассос қилиб, ҳар доим Аллоҳ таолонинг сезгиси билан яшайдиган қилиб қўяди.
Ёқуб Умар тайёрлади
Ҳамдардлик билдирамиз
Ўзбекистон мусулмонлари идораси жамоаси Сурхондарё вилояти бош имом-хатиби ўринбосари Абдусалом домла Фатуллаевнинг акалари Абдуғани ота Фатуллаевнинг вафоти муносабати билан марҳумнинг оила аъзолари ва яқинларига чуқур таъзия изҳор этади.
Аллоҳ таоло марҳум отахонни Ўз мағфиратига олсин, имонларини саломат қилсин, жойларини Фирдавс жаннатларидан қилсин!
Ҳақ таоло марҳумнинг аҳли оиласи, фарзанду аржумандлари ва яқинларига чиройли сабр бериб, бу мусибатларини яхшиликлар ила тўлдирсин.
Ўзбекистон мусулмонлари идораси жамоаси уламолар, имом-домлалар ва ўқитувчи-мударрислар номидан Абдусалом домлага ва марҳум отахоннинг оила аъзолари, фарзандлари, ёр-биродарлари, яқинларига ҳамдардлик билдирамиз.
Жаноза намози бугун, соат 12:00да Бойсун туманидаги “Дуоба” маҳалласида падари бузукворларининг уйида ўқилади.
Иннаа лиллааҳи ва иннаа илайҳи рожиъуун.
«Мусибат етганда «Албатта, биз Аллоҳникимиз ва албатта, биз Унга қайтувчимиз», деган сабрлиларга хушхабар беринг».
Ўзбекистон мусулмонлари идораси
Шайх Салоҳ Абулҳож ҳафизаҳуллоҳ: Қуръон ва суннатни ўзича тафсир қилишлик бегуноҳ қон тўкилишига сабаб бўлмоқда (инфографика)
Умра сафарига наманганлик зиёратчилар йўл олишмоқда
Бугун, 3 феврал соат 16:15 да “Умра – 2022” мавсумининг навбатдаги зиёратчилари – Наманган вилоятидаги ҳамюртларимиз Тошкент халқаро аэропортидан HY 3327 сонли рейс билан Тошкент-Жидда йўналиши бўйича учиб кетишади.
Муборак сафарга йўл олган юртдошларимизни мутасадди вакиллар, зиёратчиларнинг яқинлари, ОАВ вакиллари Тошкент халқаро аэропортида кузатишга чиқишди.
Маълумот учун, зиёратчиларимиз Саудия Арабистонидаги Жидда шаҳрига етиб боргандан сўнг замонавий автобусларда Мадина шаҳрига бориб, барча шароитларга эга бўлган меҳмонхонага жойлашдилар. Кейин эса Мадинаи мунавварадаги зиёратларни бошлашади, иншоаллоҳ.
Мазкур рейс 14 февраль куни соат 4:15 да ((HY 3334) Тошкентга қайтиб келади.
Аллоҳ таоло умрага отланганларнинг сафарларини муборак қилсин, Байтуллоҳ ёнида дуо қилишни барчамизга насиб этсин!
Ўзбекистон мусулмонлари идораси матбуот хизмати
"Ислом – Германиянинг ажралмас қисми", деди вазир
Германия ички ишлар вазири Нэнси Фаезер ислом немис маданиятининг бир қисми эканини айтди. “Анадолу” агентлиги хабарига кўра, Süddeutsche Zeitung нашрига берган интервьюсида вазир ислом Германиянинг ажралмас қисми деб айтган.
Янги ҳукумат Германияни "яхши интеграцион мамлакат" қилишни мақсад қилган.
Унинг сўзларига кўра, янги федерал ҳукумат меҳнат миграциясини соддалаштирмоқчи ва одамларни чўктирмаслик учун қонуний эвакуация қилиш йўлларини яратиш керак бўлади.
Германияда уни ноқонуний миграцияга кўмаклашишда айблаб келаётган танқидчиларга жавобан у шундай деди: "Бу Иттифоқ Ангела Меркель меросидан қанчалик тез юз ўгираётгани қизиқ. Ҳар ҳолда, арзон популизм ҳеч кимга ёрдам бермайди".
Ўзбекистон мусулмонлари идораси матбуот хизмати
Мақолалар
