Шу йил 5 апрель куни Ўзбекистон мусулмонлари идораси раиси, муфтий Нуриддин домла ҳазратлари Имом Термизий халқаро илмий тадқиқот маркази ҳамда Имом Термизий ўрта махсус ислом таълим муассасасига ташриф буюрдилар.

Муфтий ҳазратлари ташрифни марказ илмий ходимлари томонидан нашр этилган 70 дан зиёд китоб, рисола ва таржима ишлари ҳамда Имом Термизий ўрта махсус ислом таълим муассасаси фаолияти, талабалар ва педагог-ўқитувчиларга яратилган шарт-шароитлар билан танишишдан бошладилар.
Дастлаб Имом Термизий ўрта махсус ислом таълим муассасасида таълим учун яратилган шароитлар ҳамда талабаларнинг дарс жараёни билан яқиндан танишдилар. Муфтий ҳазратлари талабаларга ўз соҳаси бўйича билимларни пухта эгаллашлари, келажакда етук олим бўлиб етишишлари лозимлигини тушунтирар экан, ўз фикрларини айни пайтда дунёдаги вазиятни теран англайдиган кадрларга эҳтиёж ҳар қачонгидан ҳам юқорилиги билан изоҳладилар.

Муфтий ҳазратлари Таълим муассасаси талабалари билан бўлган дарс жараёнида иштирок этдилар ва талабаларга фиқҳ фанига оид саволлар бердилар. Талабалардан фиқҳий саволларга фаол жавоб бериб, араб тилида мулоқот қилган иқтидорли талабалар ва кам таъминланган оила фарзанди бўлган толиби илмларнинг жами 15 нафарига Ўзбекистон мусулмонлари идораси томонидан 27 миллион сўмлик моддий рағбатлантирилди. Муфтий ҳазратлари томонидан қилинган бу моддий рағбатлантириш талабаларнинг илм олишга бўлган қизиқишларини янада оширди.
Шундан сўнг Муфтий ҳазратлари таълим муассасаси фаолияти, ўқув хоналари, кутубхона, медиастудия ҳамда таълим ва тадқиқот учун яратилган шароитлар билан таништирилди.
Муфтий ҳазратларининг ташрифи доирасида Марказ илмий ходимлари ва таълим муассасаси мударрис ва талабалари билан “Устоз ва шогирдлик мақоми” тўғрисида илмий суҳбат бўлиб ўтди.
Муфтий ҳазратлари мажлисда йиғилганларга илм талаб қилиш йўлида чекиладиган машаққатлар, илмга қандай йўллар билан амал қилиниши, илм йўлида юрганларни даражалари ва илм ўзаро музокара қилиш ҳамда илмда бардавом бўлиш билан ривож топиши ҳақида батафсил Қуръони карим оятлари, ҳадиси шариф ва уламоларнинг ҳаётидан мисоллар билан тушунтириб бердилар.
Суҳбат асносида муфтий ҳазратлари талабаларга: “Менга ихтиёр берилганда талабаликни танлаган бўлар эдим. Чунки талабалик бу улуғ шараф. Сизларнинг оёғингиз остида фаришталар қанотини тўшаб жаннатга етакламоқда. Устозларни рози қилинглар, уларни хизматини қилиб, дуосини олишга ҳаракат қилинглар. Зеро, устозлар дуосини олган шогирд илмидан ва ҳаётидан барака топади”, – деб таъкидладилар.

Ташриф сўнгида Муфтий ҳазратлари Ўзбекистон мусулмонлари идорасининг асосий мақсади таълимни ривожлантириш, дин ва жамият тараққиёти учун керак бўлган етук кадрлар тайёрлаш ҳамда бу йўлда хизмат қилаётган устоз ва талабаларни доимий қўллаб-қувватлашдан иборат эканлиги таъкидланди.
Муфтий ҳазратлари Марказ ва таълим муассасаси фаолиятини янада ривожлантириш борасида ўзларини фикрларини билдириб, бу муассасаларда фаолият олиб бораётган устозлар, илмий ходимлар ва талабалар ҳаққига дуо қилдилар.

Ўзбекистон мусулмонлари идораси Матбуот хизмати

Саудия Aрабистони расмийлари умра зиёратчиларидан ўзлари билан катта миқдордаги нақд пул ёки қимматбаҳо буюмларни олиб юрмасликка чақирди.     Мазкур хабар “Ҳаж” ва “Умра” вазирлиги томонидан эълон қилинди. Хусусан, вакиллик зиёратчиларга Қироллик ҳудудига тилла қуйма, қимматбаҳо тошлар ва умуман қимматбаҳо металларни ҳамда 16 минг доллардан (60 минг саудия реёли) кўп бўлмаган нақд пулни олиб кирмасликни тавсия қилди.

Расмийлар, шунингдек, диндорларни расмий веб-сайтлардан банк дастурларини юклаб олиш, банк ҳисоби маълумотларини алмашмаслик ёки номаълум шахсларга пул ўтказмаслик, номаълум манбалардан келган СМС хабарларга эътибор бермасликка чақирди. Бундан ташқари, “ар-Риёд” расмийлари зиёратчилардан бирор кишини фирибгарликда гумон қилса, бу ҳақда вазирлик ёки тегишли идораларга хабар беришни тавсия қилди.  

Aввалроқ вазирлик оломонни камайтириш ва зиёратчиларнинг жойларга бемалол ва қулай боришини таъминлаш мақсадида мусулмонларни Рамазон ойида фақат бир марта Умра зиёратига боришга чақирган эди, деб ёзади “Российская газета” матбуоти.

ЎМИ Матбуот хизмати

"Маърифий суҳбатлар" кўрсатуви

(05-04-2023)

Айни кунларда Ўзбекистон мусулмонлари идораси раиси, муфтий Нуриддин домла ҳазратларининг воҳа вилоятлари бўйлаб сафарлари Қашқадарёда давом этмоқда.

Шу йил 6 апрел куни Муфтий ҳазратлари Шаҳрисабз шаҳридаги "Сирожиддинхон Бурҳониддинхон ўғли" жоме масжидига ташриф буюриб, гўзал мавъиза қилиш билан бирга, хатми Қуръон ва таровеҳ намозини жамоат билан адо этдилар. Ушбу жараённи ижтимоий тармоқлардаги жонли эфир орқали кўп сонли мўмин-мусулмонлар ҳам кўриб, баҳра олишди.

Мазмунли суҳбат асносида Муфтий ҳазратлари намозхонларни ойлар султони бўлган муборак Рамазон ойи билан муборакбод этиб, улуғ ой фазилати, унда қилинадиган хайрли амалларга бериладиган ажру савоблар, уни гўзал ўтказиш бўйича оят ва ҳадисларни шарҳлаган ҳолда таъсирли мавъиза қилиб бердилар. Мазкур ташриф жамоатнинг хурсандчилигига хурсандчилик қўшди. Буни намозхонларнинг юзидаги табассум ва миннатдорлик сўзларидан кўриш мумкин.

Шунингдек, Сурхон воҳасида бўлиб турган бир гуруҳ воиз уламоларнинг ҳудуддаги масжидларга ташрифи ва манфаатли суҳбатлари ҳам қизғин давом этмоқда.

Жумладан, Тошкент шаҳар “Абдулҳамид ҳожи” масжиди имом-хатиби Жамолиддин домла Азимов Жарқўрғон туманидаги “Ҳазрати Билол” масжиди, Тошкент шаҳар “Ҳазрати Имом” масжиди имом-хатиби Ҳабибуллоҳ домла Абдураззоқов Шўрчи туманидаги “Менггтўра ҳожи бобо” жомеси, Тошкент шаҳар “Қўшқўрғон” масжиди имом-хатиби Ўктам домла Маҳкамов Денов туманидаги “Ҳазрати Али” масжидига ва Тошкент шаҳар “Гўзал” масжиди имом-хатиби Равшанбой домла Раимқулов Сариосиё туманидаги “Сўфи Оллоҳёр” масжидига ташриф буюришди.

Уламолар ташриф асносида Рамазон ойининг фазилатлари ҳақида мазмунли суҳбат қилиб бердилар. Улуғ ой билан мўмин-мусулмонларни қутлаб, савоблар хирмони бўлган ойда кўпроқ ибодат ва хайрли амаллар қилиб қолиш, эҳтиёжманд оилалар ҳолидан хабар олиш, ҳар жиҳатдан ёрдам қўлини чўзиш, шунингдек, диёримизда диний-маърифий соҳада бўлаётган эзгу ишларни эътироф этиш кераклигини баён этдилар.

Муфтий ҳазратлари бошчилигидаги уламоларнинг воҳа вилоятларига сафарлари давом этмоқда. Тафсилотларни сайт ва ижтимоий тармоқларимизда кузатиб боринг.

Ўзбекистон мусулмонлари идораси
Матбуот хизмати

Рамазон ойи бошидан буён саховатпеша инсонлардан "Вақф" фондига 772 миллион сўмдан ошиқ хайрия келиб тушган

Бу ҳақда АОКАда ўтказилган брифинг (https://www.facebook.com/aoka.uz/videos/1693821061068839)да Фонд раҳбари вазифасини бажарувчи Зиёвуддин Мирсодиқов маълум қилди:

Ўтган ҳафта давомида:

Республикамиз бўйлаб 312 та оилага 58 150 000 сўмлик озиқ-овқат маҳсулотлари;

моддий кўмакка муҳтож 37 нафар фуқарога 66 600 000 сўм пул маблағлари хайрия қилинган бўлса, 700 дан ортиқ ҳамюртларимиз учун ифторлик дастурхонлари ёзилди.

Рамазон ойининг иккинчи ҳафтаси давомида фонд томонидан аҳолининг ижтимоий кўмакка муҳтож қатлами ва диний таълим муассасалари устоз ва талабалари учун 111 миллион 720 минг сўмлик хайрия ишлари амалга оширилди.

Ўтган ҳафта давомида фонднинг Сурхондарё вилояти филиали ташаббуси билан ҳомийларни жалб қилган ҳолда вилоятдаги бошпанасиз, ночор оилага 5 хонали уй қуриб битказилиб, тўлиқ жиҳозланган ҳолда хайрия қилинди.