muslim.uz
“Дастурхонда қолган нон шайтоннинг насибаси”ми?
CАВОЛ: Қайнонам “Дастурхонда дуо қилаётганда нон қолиб кетмасин. Акс ҳолда, у нонни емаслик керак. Қолган нон шайтоннинг ризқи бўлади. Уни итга бериш керак”, деб айтди. Шу гап ростми?
ЖАВОБ: Бисмиллаҳир Роҳманир Роҳим. Расулуллоҳ соллаллоҳу алайҳи васаллам овқат еяётган вақтда ерга тушиб кетган ушоқ ёки овқат бўлакларини териб олиб, тозалаб ейишга буюрганлар. Бу ҳақда Жобир розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Бирортангизнинг луқмаси (ерга) тушиб кетса, уни олиб, (ёпишган) зарарли нарсаларни кетказиб, есин. Уни шайтон учун тарк қилмасин. Бармоқларини яламагунча қўлини сочиққа артмасин. Чунки у барака таомнинг қаерида эканини билмайди”, дедилар (Имом Муслим ривояти).
Ушбу ҳадисдан Аллоҳ таоло берган ризқнинг қадрига етмаслик шайтоний амал экани, тўкилган таомни ердан олиб, тозалаб ейиш ризқнинг қадрига етиш, инсонлардан қолган таомлар шайтон ва жинлар учун таом қилиб берилгани маълум бўлади. Бу дуо қилинганидан кейин дастурхонда қолган нонларни емаслик керак, бу шайтонни насибаси бўлади дегани эмас, аксинча уларни авайлаб олиб қўйиш, ушоқларини эса териб ейиш лозимлигини ифода қилади.
Ўзбекистон мусулмонлари идораси
Фатво маркази
Бугунги кундаги экстремистик оқимларининг «Жиҳод» деб номлаётганлари одамларни зўравонлик, ваҳшийликларга бошловчи фитнадир.
Афсуски, бугунги кунда қора кучлар томонидан Яқин Шарқ минтақасида, қўшни Афғонистонда содир этилаётган қонли тўқнашувлар уюштирилиб, сиёсий ва иқтисодий танглик келтириб чиқарилмоқда. Мазкур ҳудудларда гўёки ҳақиқий “исломий давлат” қуриш шиори остида очиқдан-очиқ зўравонлик, ваҳшийликларга қўл ураётган турли гуруҳ ва жамоалар кўпайиб кетди.
Таассуфки, Ислом динини ниқоб қилиб олган мутаассиб шахслар ижтимоий тармоқларнинг ўзбек контентида Ироқ ва Сурия каби мамлакатларда террорчилик ҳаракатлари олиб бораётган жангариларни қўллаб-қувватлашга тарғиб қилмоқда.
Бу ўринда шуни таъкидлаш лозимки, террорчилик билан «жиҳод» орасида ҳеч қандай муносабат, ўхшашлик ва алоқа мавжуд эмас, балки улар орасида жиддий қарама-қаршиликлар бор.
Жиҳод – Исломни куч билан ёйиш, қурол ёрдамида тарқатиш воситаси эмас. Аксинча, душманликни кетказиш, зулмни бартараф этиш ва заифларни ҳимоя қилиш йўлидир.
Ҳадисда айтилади: “Бир киши Расулуллоҳ соллаллоҳу алайҳи васалламнинг ҳузурларига жиҳодга изн сўраб келди. Шунда унга: “Сенинг ота-онанг борми?” дедилар. “Ҳа”, деди. “Бас, икковлари (хизмати)да жиҳод қил!” дедилар”.
«Пайғамбар Муҳаммад соллаллоҳу алайхи васаллам даврларида амалга оширилган «жиҳод» ҳеч қачон миллатчилик, салтанатга эга бўлиш ёки бошқа ҳудудни босиб олиш мақсадида амалга оширилмаган.
«Жиҳод» доимо фақат мудофааланиш вазифасини ўтаган, душман томонидан ярашиш тўғрисидаги таклиф билдирилганда эса дарров тўхтатилган». Бу борада замонамиз уламолари бундай дейдилар: “Агар “жиҳод” ислом давлатини қуриш учун ёки инсонларни динга киришга мажбурлаш учун жорий этилганида эди, Расулуллоҳ (алайҳиссалом)нинг ўзлари бу борада намуна кўрсатган бўлур эдилар. Яъни, у зот биринчи бўлиб Маккадаги мушрикларнинг катталари билан урушган ислом давлатини барпо этиш учун жиҳод эълон қилган бўлардилар. Бироқ Пайғамбаримиз (алайҳиссалом) бундай йўл тутмадилар. Аксинча, мусулмон жамияти тинч йўл билан, табиий равишда юзага келгач, унинг ҳимояси учун жиҳодга чиққанлар”.
Бундан куриниб турибдики бугунги кундаги экстремистик оқимларининг «Жиҳод» деб номлаётганлари одамларни зўравонлик, ваҳшийликларга бошловчи фитнадир.
Пайғамбар соллаллоҳу алайҳи ва саллам бу ҳақда «Дунёнинг йўқ бўлиб кетиши Аллоҳ наздида бир мўминнинг ноҳақ ўлдирилишидан кўра енгилроқдир» деб бу жиноятнинг оқибати қанчалик ёмон эканига ишора қилмоқдалар (Ибн Можа ривояти).
Бундан кўриниб турибдики буларнинг барчаси дин душманларининг фитнасидир.
Мусулмонларга фитнада қатнашиш Қуръони каримда қатъий ман этилган: “Сизлардан фақат золимларгагина хос бўлмаган (балки ҳаммаларингизга оммавий бўладиган) фитна (азоб) дан сақланингиз ва билиб қўйингизки, Аллоҳ жазоси қаттиқ (зот)дир” (“Анфол” сураси, 25-оят).
Бунда тилга олинган далиллар асосида таъкидлаб, урғу бераётганимиз нуқта шуки, Ислом дунёсида тез-тез кўзга ботаётган, ҳеч қандай қоидага бўйсунмаган, зўравонлик ва босқинчилик ҳаракатлари машруъ эмасдир (ноқонунийдир).
Самарқанд вилояти вакиллигидан
Аброров Жаҳонгирхон манбалар асосида тайёрлади
Муаззинлар учун хос хушхабарлар!
Қишнинг совуғида, ёзнинг қисқа тунларида ҳаммадан илгари бир инсон масжидга эрта келади. Бутун атрофга Буюк Аллоҳнинг исмини айтиб нидо қилади. Аллоҳнинг раҳматидан умидворларни, нажот истаганларни, ибодатга ошиққанларни, беш кунлик дунёси учун беш вақт ибодатини алмаштирмаганларни улуғ иш – намозга чақиради.
Унинг овози ила тун чиқиб, тонг отганини, ибодат вақти кирганини англаймиз. Унга қўшилиб Роббимизни зикр қиламиз, Расулимизни тасдиқ этамиз, шаҳодат келтирамиз, салавот айтамиз!
Бу шарафли ва омонатли ишни қилаётганлар, Аллоҳнинг зикрини бутун борлиқ узра янгратаётганлар – муаззинлардир. Улар учун Расулуллоҳ соллаллоҳу алайҳи васаллам қуйидаги хушхабарни берганлар: Ибн Аббос розияллоҳу анҳудан ривоят қилинади. Набий соллаллоҳу алайҳи васаллам айтдилар: “Ким етти йил Аллоҳ розилиги учун, савобидан умид қилиб азон айтса, дўзахдан халос бўлиш ёзиб қўйилади” (Имом Термизий ривояти).
Муновий айтадилар: “Бунча муддат давомида дунёвий мақсадлар аралашмаган ҳолда шаҳодат ва дуони нутқ қилавериш кишини тавҳидга қориштириб юборади. Тавҳидга айланган кишига олов тегина олмайди”.
Табароний: “Савоб умидида азон айтган муаззиннинг жасадини қуртлар емайди”, деганлар.
Абу Ҳурайра розияллоҳу анҳу ривоят қиладилар. Расулуллоҳ соллаллоҳу алайҳи васаллам айтдилар: “Имом сақловчи (риоя қилувчи), муаззин эса омонатдордир. Аллоҳим, имомларни тўғри йўлга ҳидоят эт ва муаззинларни мағфират қилгин!” (Имом Термизий ривояти).
Имом қавмнинг намози учун жавобгар бўлса, муаззин намоз вақтлари учун масъулдир. Имом ҳам, муаззин ҳам шариат талабида ўз вазифасини сидқидилдан бажарса Расулуллоҳ соллаллоҳу алайҳи васалламнинг ушбу дуолари уларнинг ҳақларида то Қиёмат боқийдир, иншааллоҳ.
Нилуфар САИДАКБАРОВА,
Тошкент Ислом институти ўқитувчиси.
Муфтий ҳазрат: Ҳаё инсонни юксалтиради, ҳаёсизлик эса тубанлаштиради
Ўзбекистон мусулмонлари идораси Матбуот хизмати
Ўзбекистон Ислом цивилизацияси маркази ва Қирол Файсал номидаги Исломшунослик тадқиқотлар маркази ўртасида ўзаро ҳамкорлик ривожланмоқда
13 декабрь куни мамлакатимиз элчихонаси кўмагида Ўзбекистон Ислом цивилизацияси маркази ва Саудия Арабистони Подшоҳ Файсал номидаги Ислом тадқиқотлари маркази ўртасида видемулоқот ташкил этилди, деб хабар бермоқда “Дунё” АА мухбири.
Ушбу тадбирдан кўзланган мақсад икки муассаса ўртасидаги ҳамкорлик алоқаларини мустаҳкамлаш, қўлёзма ва илмий асарларни биргаликда ўрганиш ҳамда Ўзбекистон Ислом цивилизацияси марказининг Ар-Риёдда бўлинмасини ва Подшоҳ Файсал номидаги Ислом тадқиқотлари марказининг Ислом цивилизацияси марказида кутубхонасини ташкил этиш билан изоҳланади.
Элчи Улуғбек Мақсудов ҳозирги кунда Ўзбекистон ва Саудия Арабистони ўртасидаги ҳамкорлик алоқалари турли соҳаларда ривожланиб бораётгани, хусусан, Ўзбекистон Президентининг жорий йил 18-19 август кунлари Подшоҳликка амалга оширган ташрифи икки томонлама муносабатларни янада мустаҳкамлашга хизмат қилаётганини таъкидлади.
Ислом цивилизацияси маркази директорининг илмий масалалар бўйича ўринбосари Фирдавс Ҳалимов Саудия томонини Ўзбекистон Ислом цивилизацияси маркази фолияти билан таништирар экан, ушбу муссаса Ўрта Осиёда ягона эканлигини, бу ердаги фаолият Ислом маданияти ривожига ҳисса қўшган уламоларнинг асарлари ва қадимий қўлёзмаларни тадқиқ этишга қаратилганини қайд этди.
Ўз ўрнида, Подшоҳ Файсал номидаги Ислом тадқиқотлари маркази бош котибининг ўринбосари Иброҳим Дуғайсир Ўзбекистон илмий меросга бой эканлиги, бу ерда кўплаб қадимий қўлёзмалар сақланиши ва ушбу юртдан етишиб чиққан буюк аллома ва мутафаккирларнинг Ислом ривожига қўшган беназир ҳиссаларини дунё халқлари эътироф этишини айтди. Жумладан, Ўзбекистон Президентининг Подшоҳликка олий даражадаги ташрифи икки мамлакат манфаатларига бирдек хизмат қилишини ва ўзаро алоқалар ривожида асосий туртки бўлишини қайд этди.
У, шунингдек, ҳозирги кунда ЎИЦМ билан икки томонлама алоқалар ўрнатилганидан мамнун эканлигини билдирар экан, биргаликда илмий изланишларни олиб бориш, ўзаро маълумотлар алмашиш ва икки марказнинг бўлинмалари ҳамда кутубхоналарини очиш муҳим эканлигини таъкидлади.
Учрашув якунида томонлар ҳамкорликни янада мустаҳкамлаш ва биргаликда илмий лойиҳаларни амалга ошириш бўйича ишчи гуруҳ тузиш ҳамда музокараларни давом эттиришга келишиб олдилар.
Ўзбекистон мусулмонлари идораси матбуот хизмати
Янгиликлар
