muslim.uz

Суббота, 08 Апрель 2023 00:00

Қозон “Россия–Ислом дунёси” халқаро форумини ўтказишга тайёрланмоқда

2023 йил 18 май куни Россиянинг Қозон шаҳрида “Россия-Ислом дунёси: Қозон форуми-19” халқаро иқтисодий форумини бўлиб ўтади.

Ўн тўртинчи бор ўтказилаётган форумда Яқин Шарқ ва Ўзбекистондан келган ишбилармонлар Россия ва ислом мамлакатлари ўртасидаги иқтисодий ҳамкорликни муҳокама қилишади ва 140 дан ортиқ ишчи сессиялар ўтказилиши кутилмоқда.

Бу йилги форум халқаро ҳамкорлик, барқарор ривожланиш, саноат, исломий молия, ҳалол саноат, технология, инновациялар, сармоя, ёшлар, тадбиркорлик ва дипломатия, шунингдек, логистика, аёллар муаммолари, таълим, кичик ва ўрта бизнес, тиббиёт ва спортга оид мавзуларга қаратилган.

Халқаро форум ҳақида Татаристон Республикаси Президенти Рустам Минниханов шундай деди: “Татаристон тажрибасидан келиб чиқиб, биз ислом бизнеси билан ўзаро ҳамкорликнинг амалий механизмларини мустаҳкамлашга интиламиз. Бу борада ислом иқтисодиёти, хусусан, озиқ-овқат саноати, ҳалол туризм ва ҳалол тиббиётни ривожлантириш учун катта истиқболлар очилмоқда”.

ЎМИ Матбуот хизмати

Бўлим Дунё янгиликлари

Суббота, 08 Апрель 2023 00:00

Рамазон ойида бўлган тарихий воқеалар

Рамазон ойида жуда катта тарихий воқеалар содир бўлган. Бу воқеалар Ислом динининг нималарга қодир эканлигини кўрсатади. Шу ўринда ўша муҳим воқеаларнинг баъзиларини санаб ўтмоқчимиз:

Милодий 610 йили, ҳазрати Муҳаммад соллаллоҳу алайҳи ва салламга қирқ ёшларида Рамазоннинг Қадр кечасида Макка яқинидаги Ҳиро ғорида илк ваҳий – Қуръони каримнинг Алақ сурасидан дастлабки беш оят нозил бўлди.
Рамазон шарифда Пайғамбаримиз Муҳаммад соллаллоҳу алайҳи ва салламга мабъус (пайғамбарлик) мақоми берилди.
Буюк Бадр ғазоти. Бу ғазот Исломда “фурқон”, яъни, “Ҳақ билан ботилни айиргувчи” деб номланади. Бу уруш мусулмонларнинг устунлиги билан ҳижратнинг иккинчи йили 17-рамазон, жума кунида содир бўлган. Исломнинг ашаддий душмани бўлган Абу Жаҳл шу урушда ҳалок бўлган.
Ҳижрий 2 йили Рамазон рўзасини тутиш ва закот бериш фарз қилинди.
Макка фатҳи. Ҳижратнинг саккизинчи йили Рамазон ойининг 10-куни Макка озод этилди. Бутпарастликка чек қўйилди. Каъбадаги бутларнинг барчаси ер билан яксон этилди.
Расулуллоҳ соллаллоҳу алайҳи ва саллам то Рамазон ойи тугагунигача кечалари ҳазрати Жаброил алайҳиссалом билан учрашиб, Қуръони каримни тиловат қилиб берар, шу тарзда ўзларини имтиҳон қилдирар эдилар.
Ҳижратнинг тўққизинчи йили Рамазон ойида Табук ғазотининг бир қисми бўлиб ўтди.
Ҳижратнинг тўққизинчи йили Рамазон ойида Тоифдаги Соқиф қабиласи Пайғамбаримиз соллаллоҳу алайҳи васаллам ҳузурларига келиб Исломга кирганини эълон қилди.
Ҳижратнинг ўнинчи йили Рамазон ойида Яманга Ислом кенг кўламда кириб келди.
Испаниянинг фатҳи. Ҳижратнинг тўқсон иккинчи йили Рамазон ойининг 28-куни (милодий 711 йили июль ойининг 19 куни) Тариқ ибн Зиёд раҳбарлигидаги шиддатли урушда кофирлар раҳбари бўлган Рузрик устидан ғалаба қозонилди. Сўнгра Куртаба, Ғурната ва Испаниянинг пойтахти бўлган Тулайтилия фатҳ этилди.

Манбалар асосида

Мунира АБУБАКИРОВА,

Ўзбекистон мусулмонлари идораси мутахассиси

Бўлим Мақолалар

Суббота, 08 Апрель 2023 00:00

Зиёратчиларга Масжидул Ҳаром 50 тилда таништирилади

Саудия Aрабистони Икки Муқаддас Ҳарам шариф бошқармаси Хорижий тиллар ва таржима бўлими зиёратчилар учун Масжидул Ҳаромнинг тарихи ва бугуни ҳақидаги маълумотларни 50 тилда таништириш хизматини тақдим этди.
Бу ҳақда Саудия Aрабистони Aхборот Aгентлигига (WAС) иқтибос келтирган ҳолда Тиллар ва таржималар бўлими бошлиғи Aҳмад бин Aбдулазиз Aл-Ҳамидий маълум қилди.
Унга кўра, лойиҳа доирасида зиёратчилар кенг қамровли экскурсия давомида 50 тилда Масжид ул-Ҳаромнинг муҳим жойлари ва тарихий обидалари билан яқиндан танишади. Ушбу кенг қамровли саёҳат Каъбадан бошланиб Масжидул Ҳаромнинг барча муҳим жойларига ташриф буюришни, жумладан, Каъбадаги Ҳажарул асвад – Қора тошни, Рукну Яманий, Мултазам, Мақоми Иброҳим алайҳис салом ва Замзам қудуғини зиёрат қилишни ўз ичига олади.
Бундан ташқари, зиёратчилар Сафо ва Марво каби бошқа жойлар ҳамда Масжидул Ҳаромнинг учинчи ривожланиш режаси билан ҳам таништирилади.

ЎМИ ходими И.Аҳмедов тайёрлади.

Бўлим Дунё янгиликлари

Пятница, 07 Апрель 2023 00:00

Қуръонни эшитиш қалбга ҳузур беради

Ўзбекистон мусулмонлари идораси раиси, муфтий Нуриддин домла ҳазратлари бугун, 7 апрель куни жума намозини жамоат билан адо этиш, намозхонларга мавъиза қилиш учун Самарқанд шаҳридаги “Имоми Аъзам” жоме масжидига ташриф буюрдилар.

Муфтий ҳазратлари суҳбат аввалида Юртбошимизнинг мўмин-мусулмонларга йўллаган салом ва Рамазон табрикларини етказиш билан бирга намозхонларга ўзларининг ҳам хайрли дуо ва тилакларини билдирдилар.

Мазмунли суҳбат чоғида Муфтий ҳазратлари “Рамазон – Қуръон ойи” мавзусида манфаатли мавъиза қилиб, жумладан, Каломуллоҳнинг нозил бўлиш тарихи ва фазилати, уни ўқиган қорига дунёю охиратда бериладиган ажру мукофотлар, улуғ Рамазон ойида қилинган хатми Қуръонларнинг савоби янада зиёда бўлиши, Қуръони каримни эшитиш қалбга ҳузур бериши ҳақида оят, ҳадис ва уларнинг шарҳи билан тушунтириб бердилар.

Якунда Ҳақ таолодан Рамазон ойини мўмин-мусулмон халқимизга манфаатли қилишини, юртимиз ва бутун дунё тинчлиги, элимиз фаровонлигини сўраб хайрли дуолар қилинди.