Мамлакатимизнинг барча ҳудудларидаги каби Жиззах вилоятининг Шароф Рашидов туманидаги қишлоқ ва маҳалла фуқаролар йиғинларида ҳам эҳтиёжманд, оиласида ногиронлиги бор, боқувчисидан айрилган, ётиб қолган, якка-ёлғиз кексалар ҳолидан хабар олиниб, уларнинг уйларига 17 турдаги озиқ-овқат маҳсулотлари етказиб берилмоқда. Рўзадор отахон ва онахонларга “Маҳалла” хайрия жамоат фонди, саховатпеша ҳомийлар томонидан ифторликлар ташкил этиб берилаётир.
Ижтимоий ҳимояга муҳтож кишилар ҳолидан хабар олиш, боқувчисини йўқотган ва кексаларга меҳр-муруват кўрсатиш ҳамда қувонч улашиш азалдан ўзбек халқига хос фазилатлардан саналади. Бу каби саховат тадбирлари айниқса муборак Рамазон ойида янада яққол намоён бўлмоқда.
Ана шу анъаналарга содиқ ўлароқ, Шароф Рашидов тумани ҳокими Маҳмуд Холбўтаев 2-сектор ҳудудига қарашли “Тоқчилик” маҳалла фуқаролар йиғинида истиқомат қилувчи бир қатор ўзгалар кўмагига муҳтож хонадонлар ҳолидан хабар олди, эҳтиёжманд, боқувчисини йўқотган, ётиб қолган, кекса фуқароларга 17 турдаги озиқ-овқат маҳсулотлари улашиб, уларга сиҳатлик тилаб, кўнгилларини кўтарди.
Бундан ташқари, туман ҳокими ифторлик вақтига қадар шу маҳалладан йўл масалалари бўйича қилинган мурожаатларни жойида бориб ўрганди ва мутасадди ташкилотлар ҳамкорлигида ишларни тез фурсатда бажаришга келишиб олинди.
Юртимизда муборак Рамазон ойи давом этаётган қутлуғ кунларда тумандаги “Қаҳрамон” маҳалла фуқаролар йиғини “Қумри ая” тантаналар мажмуасида бир гуруҳ нуронийлар ҳамда рўзадорларга Рамазон ойи муносабати билан туман “Маҳалла” фонди бўлинмаси томонидан ифторлик дастурхони ёзилди. Унда, рўзадор фуқаролар билан бир дастурхон атрофида туман ҳокими Маҳмуд Холбўтаев ҳам иштирок этди.
Ифторлик сўнгида Қуръон тиловат қилиниб, ўтганларнинг руҳи покига бағишланди, Яратгандан юртимизга тинчлик, халқимизга фаровон ҳаёт, деҳқончиликка, чорвачиликка ва бошқа барча соҳаларга қут-барака ва унум сўралди.

ЎзА

Манба: Ўзбекистон 24

Ўзбекистон мусулмонлари идораси жамоаси Наманган шаҳри “Ғози Муҳаммад ҳожи” масжиди имом-хатиби Авазхон домла Юсуповнинг оталари Аҳмаджон ота Юсуповнинг вафоти муносабати билан чуқур таъзия изҳор этади.

Аллоҳ таоло охират сафарига кузатилаётган марҳум отахоннинг барча солиҳ амалларини ўзларига ҳамроҳ айлаб, Ўз мағфиратига олсин.

Ҳақ таоло марҳумнинг яқинлари, фарзанду аржумандларига чиройли сабр бериб, бу мусибатларга ажру мукофотлар ато этсин.

Ўзбекистон мусулмонлари идораси жамоаси, уламолари, имом-домлалари ва ўқитувчи-мударрислари номидан марҳум отахоннинг яқинларига, хусусан, Авазхон домла Юсуповга ҳамдардлик билдирамиз.

Иннаа лиллааҳи ва иннаа илайҳи рожиъуун.

«Мусибат етганда «Албатта, биз Аллоҳникимиз ва албатта, биз Унга қайтувчимиз», деган сабрлиларга хушхабар беринг».

Ўзбекистон мусулмонлари идораси

Оғир иқтисодий шароитга қарамай покистонликлар ҳам бошқа кўплаб давлатлар қатори Рамазон ойини муносиб ўтказишга, барча урф одатларини сақлаб қолишга ҳаракат қилмоқда.
Машҳур Равалпинди бозорида ўнлаб кўнгиллилар рўзадорлар, айниқса, камбағаллар ва кам таъминланган кишилар учун хайрия ифторлик дастурхонлари тайёрлаб беришади, деб ёзади ИҚНA сайти “ал-Aлам” нашрига таяниб.
Иқтисодий инқироз кишиларнинг харид қилиш қобилиятини пасайтирди, Покистон ҳукумати бу муборак ойда кам таъминланган оилаларга ёрдам пакетлари тақдим этиш ва нархларни пасайтириш орқали кишиларнинг муаммолари ва оғирини енгиллаштиришга ҳаракат қилди.
170 миллиондан зиёд Покистон мусулмонлари қийин шароитларга қарамай, Рамазон ойини ўзгача тарзда ўтказиш, оддий маҳаллий маҳсулотлар ва ифторлик дастурхонида бўлиши керак бўлган ширинликларни тайёрлашни истайди.
Покистонда Рамазон ойининг охирги жума куни “Aлвидо Жума” деб номланади, покистонликлар Муборак Рамазон ойининг охирги жума кунида энг катта масжидларда намоз ўқийдилар ва тонг отгунча ибодат билан машғул бўладилар.

ЎМИ Матбуот хизмати

Бу йил қутлуғ Рамазон ойида эҳтиёжманд, шу билан бирга ибратли оилалар вакиллари давлатимиз томонидан берилган йўлланма асосида Умра сафарига юборилмоқда. Уларнинг бир қанча гуруҳи муборак зиёратни адо этиб қайтишди. Шулар қаторида Самарқанд вилояти зиёратчилари ҳам бор.
– Мактабда яхши ўқиганман, араб ёзувини ўрганганман, – дейди Пайариқ тумани Кўпаки маҳалласида яшовчи Қандолат Норматова. – Аммо на институтда, на техникумда ўқидим. Қишлоқ қизлари қатори бўй етиб, турмушга чиқдим. 7 нафар фарзандим бор, улардан бири иккинчи гуруҳ ногирони. Раҳматли турмуш ўртоғим билан уларни оғир шароитда катта қилдик. Қуръон тиловати, китоб мутолааси, беш вақт намоз ва рўза ибодатларини канда қилмадим. Муборак Ҳаж ва Умра зиёратларини адо этиб келаётганларга ҳавас қилардим, холос. Маҳалламиз раиси кутилмаганда Умра зиёратига давлат томонидан йўлланма берилишини айтганда, туш кўряпман, деб ўйладим. Қувончим ичимга сиғмади. Зиёрат давомида йиғлаб-йиғлаб, юртимиз тинчлиги, аҳолимиз фаровонлиги, фарзандларимиз саломатлигини сўраб дуолар қилдим.
Самарқандлик зиёратчилар 2 апрель куни тонгга яқин кутиб олинди. Кемтик кўнгиллари тоғдек кўтарилган отахон ва онахонлар давлатимиз томонидан кўрсатилаётган бундай ғамхўрликлардан миннатдор эканлигини билдириб, дуолар қилди.

Хайрулло Сатторов, вилоят бош имом-хатиби ўринбосари,
“Зарафшон” нашри.

Ўзбекистон мусулмонлари идораси Матбуот хизмати