06 Октябр, 2025, 14 Рабиъус сони, 1447
06 Октябр, 2025, 14 Рабиъус сони, 1447
Бугун, 13 март куни Ўзбекистон мусулмонлари идораси раиси, муфтий Усмонхон Алимов ҳазратлари, Дин ишлари бўйича қўмита раиси Абдуғофур Аҳмедов Самарқанд вилояти Ургут туманида барпо этилган “Ургут” марказий жоме масжидининг очилиш маросимида иштирок этдилар. Меҳмонларга Самарқанд вилояти бош имом-хатиби Зайниддин домла Эшонқулов, Диний идора Иш бошқарувчиси Рустам ҳожи Жамилов ҳамроҳлик қилди.
Масжиднинг очилиш маросимида Самарқанд вилояти ҳокими Эркинжон Турдимов, Ургут тумани ҳокими Ботир Жабборов, таниқли уламолар, тажрибали имом-домлалар, мўйсафид отахонлар, вилоят мутасаддилари ва юзлаб намозхонлар иштирок этдилар.
Тадбир аввалида қурбонлик сўйилди ва Қуръони карим оятлари тиловат қилиниб, хайрли дуолар қилинди
Файзли тадбирда муфтий Усмонхон Алимов ҳазратлари масжид жамоасини маҳобатли жоме билан муборакбод этдилар, муҳтарам Президентимиз ташаббуслари билан юртимизда диний-маърифий соҳада амалга оширилаётган хайрли ишлар ва улкан ислоҳотлар ҳақида сўзлаб бердилар. Айниқса, масжид-мадрасаларни обод этилиши, қадамжою-зиёратгоҳларни гўзал ҳолатга келтирилиши, мўмин-мусулмонларимизга кенг имкониятлар берилаётганини батафсил гапириб бердилар. Мана шундай эътибор ва ғамхўрликдан намозхонларимиз чексиз мамнунликларини ўз сўзларида изҳор этдилар ва қувончлари юз-кўзларидан яққол намоён бўлди.
Маълумот ўрнида, янги масжид қибласи мутахассислар қуёшнинг ёзги энг сўнгги ботиш ва қишдаги энг сўнгги ботиш нуқталари ҳисобга олиниб, ушбу икки нуқта орлиғи уч қисмга бўлиб, чап томондаги бўлак белгиланди. Шунингдек, кечаси Олтин қозиқ юлдузига қараб мўлжал олинди.
Масжид майдони бир гектардан ошиқ, хонақосининг ҳажми 45х55 метр, яъни 2500 кв/м.ни ташкил қилади. Жоме икки қаватдан иборат бўлиб, 8000 нафарга яқин намозхонни ўз бағрига сиғдира олади. Хонақоҳ ўртасида 34 метрли баланд гумбаз қад ростлаган. Унинг айланаси 18 метрни ташкил этади.
Масжиднинг тўрт томонида иккитаси 40 метрли ва яна иккитаси 43 метрли бўлган тўрт минора қурилган. Замонавий таҳоратхонадан бир вақтнинг ўзида 100 киши фойдаланиши мумкин. Масжид ходимлари учун 2 қаватли маъмурий бино барпо этилган.
Муфтий ҳазратлари ўз дуоларида ушбу масжидни Аллоҳ таоло қиёматга қадар мўмин-мусулмонларга хизмат қилишини насиб этиши ва унинг қурилиши ва фаолиятини йўлга қўйишига ҳисса қўшганларга улуғ-савобларни ато этишини Ҳақ таолодан илтижо қилиб сўрадилар.
Ўзбекистон мусулмонлари идораси Матбуот хизмати
Ислом дини тинчлик дини, у жамиятнинг барча аъзоларини, ирқи, жинси, дини, табақасидан қатъий назар уларнинг ҳаётини, мол-мулкини, ор-номусини сақлашликни кафолатини олган дин.
Шунингдек, мусулмон ёки мусулмон бўлмаган мамлакатларда истиқомат қилаётган бошқа дин вакилларининг жони, моли ва обрў-эътиборини муҳофаза қилишликни ҳар бир мўмин-мусулмонинг зиммасига вазифа қилиб юклаган диндир.
Пайғамбаримиз соллаллоҳу алайҳи васаллам ўзларининг оҳирги хутбаларида инсонлар ҳаёти, мол-мулкини ва обрў-эътиборини сақлаш ҳақида бундай дедилар: “Албатта, Аллоҳ таоло қонингиз, молингиз ва номусингизни бир-бирингиз учун мана шу муқаддас шаҳрингиз, табаррук ойингиз ва улуғ айёмингиз каби муқаддас айлади[1]”.
Ушбу ҳадисга кўра, бир одамни ноҳақ ўлдириш, унинг молига тажовуз қилиш, обрўсига путур етказишлик мутлақо тақиқланади.
Дарҳақиқат, мусулмон ёки бошқа дин вакилини улар қаерда яшашликларидан қатъий назар уларнинг ҳаётига тажовуз қилишлик тақиқланади. Бу ҳақда Қуръон каримда қуйидагича баён этилади: “...кимки бирон жонни ноҳақдан ёки ер юзида фасод қилмаса ҳам ўлдирса, ҳудди ҳамма одамларни ўлдирган бўлади. Ким уни тирилтирса, худди ҳамма одамларни тирилтиргандек бўлади[2]...” (Моида сураси, 32-оят).
Ушбу оятда “нафс” сўзининг ишлатилиши барча башарият учун далолат қилишни англатади. Исломда ҳар бир жон жуда ҳам юқори баҳоланади. Шу боис, бир беайб инсонни ўлдирган одам бутун бошли инсониятни ўлдиргандек жиноят қилган ҳисобланади. Чунки, жонлар кўп бўлгани билан ҳаёт кечириш ҳаққи битта. Ҳар бир жон ҳаёт кечириш ҳаққига эга. Ана ўша жонлардан биттасини ўлдирган одам ҳамма жонларнинг ҳаёт кечириш ҳаққига тажовуз этган бўлади. Шунинг учун, бир жонни ноҳақ уни қайси динга мансублигидан, тилидан ёки қайси мамлакат фуқароси эканлигидан қатъий назар қатл этишлик Ислом динида қатъиян ман этилади. Аксинча, битта жоннинг ҳаётини сақлаб қолишлик эса, ҳамма жонларнинг ҳаёт кечириш ҳаққини сақлаб қолган билан тенг.
“The Fatwa on Terrorism and Suicide Bombings” китобидан
Даврон НУРМУҲАММАД таржимаси
[1] Имом Буҳорий. Ал-Саҳиҳ (Китаб ал-Ҳажж). 2:620; §1654; Муслим. Ал-Саҳиҳ. 3:1305-1306; §1679.
[2] Шайҳ Муҳаммад Содиқ Муҳаммад Юсуф. Қуръони карим ва ўзбек тилидаги маънолари таржимаси. – Т.: «Hilol-Nashr» 2015. 590-б.
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа