ЎМИ матбуот хизмати
Имом Бухорий халқаро илмий-тадқиқот маркази, Индонезиянинг Шариф Ҳидоятуллоҳ давлат ислом университети ва Қуръон илмлари институти (IIQ) ҳамкорлигида “Имом Бухорий ва мусулмон оламида илм-фан (2025)” мавзусида халқаро анжуман бўлиб ўтди.
Форум Имом Бухорий халқаро илмий-тадқиқот маркази билан Шариф Ҳидоятуллоҳ давлат ислом университети ўртасида имзоланган англашув меморандумига асосан ташкил этилди.
Очилиш маросимида икки мамлакат ўртасидаги илмий-маънавий алоқаларни ривожлантириш, Имом Бухорий меросини чуқур ўрганиш ва унинг илмий аҳамиятини кенг ёритишга қаратилган ташаббуслар алоҳида таъкидланди.
Анжуман доирасида “Имом Бухорий мероси ва замонавий ислом тафаккури” ва “Ҳадисшунослик методологияси ва классик илмлар”, “Ҳадис, тафсир ва ахлоқий мулоҳазалар”, “Замонавий тадқиқотлар, рақамли гуманитар илмлар ва институционал таълим” мавзуларда илмий сессиялар ўтказилди. Унда олимлар Имом Бухорий асарларининг илмий асослари, жаҳон ҳадисшунослик мактабида тутган ўрни ва замонавий талқинлари ҳақида фикр алмашди.
Имом Бухорий асарларидаги маънавий қадриятларнинг бугунги таълим жараёнлари ва жамият ҳаётидаги аҳамияти, ислом илмларини ўқитишда рақамли технологиялардан унумли фойдаланиш имкониятлари, қўшма тадқиқотларни амалга оширишнинг долзарб масалалари иштирокчилар диққат марказида бўлди.
Анжуманнинг якуний қисмида илмий мулоқот натижалари сарҳисоб қилиниб, илмий тавсиялар қабул қилинди.
Ўзбекистон мусулмонлари идораси
Матбуот хизмати