Сайт тест ҳолатида ишламоқда!
19 Март, 2025   |   19 Рамазон, 1446

Тошкент шаҳри
Бомдод
05:10
Қуёш
06:28
Пешин
12:36
Аср
16:46
Шом
18:37
Хуфтон
19:50
Bismillah
19 Март, 2025, 19 Рамазон, 1446

Ўзбекистон элчихонаси АҚШдаги энг катта масжидлардан бирида брифинг ўтказди

19.12.2019   1960   2 min.
Ўзбекистон элчихонаси АҚШдаги энг катта масжидлардан бирида брифинг ўтказди

Жорий йилнинг 13 декабрь жума куни Ўзбекистоннинг Америка Қўшма Штатлари пойтахтидаги элчихонаси АҚШ ғарбий соҳилидаги энг катта масжид - Виржиния штати, Стерлинг шаҳридаги Даллес мусулмон жамоатчилик маркази (ADAMS Center)да брифинг ўтказди. Бу ҳақда kun.uz нашри хабар беради.

Ушбу тадбир жума намози доирасида ташкил этилди. Унда 800 нафардан ортиқ киши иштирок этган.

Жума намозида мамлакатнинг АҚШдаги элчиси Жавлон Ваҳобов чиқиш қилиб, Қўшма Штатлар мусулмонлари учун Ўзбекистондаги зиёрат туризмининг улкан имкониятлари ҳақида сўзлаб берди. Ўзбекистонлик дипломат жума намозида мамлакатнинг бой тарихий-маданий мероси, анъанавий исломий қадриятларни жамиятда сақлаш ва тарғиб қилиш, шунингдек, мамлакатда диний эркинликни таъминлаш бўйича кўрилаётган чора-тадбирлар тўғрисида батафсил маълумот тақдим этди.

Масжид бош имоми, ADAMS маркази раҳбари Имом Мажид намозхонларга мурожаат қилиб, республика раҳбарияти томонидан ислом дини ғояларини тарғиб қилишга катта аҳамият берилаётганини эътироф этди. «Ўзбекистон исломнинг асл моҳиятини сақлаб қолиб, уни ўқитишнинг илғор тажрибаларини жорий этиш, малакали мутахассислар - исломшунос олимлар тайёрлаш бўйича кучли ўзбек мактабини яратишга муваффақ бўлган мамлакат сифатида жаҳон ҳамжамияти учун намуна», - деди у.

Имом Мажиднинг таъкидлашича, «Ўзбекистон асрлар давомида бунёд этиш муҳити ҳукмрон бўлган, етакчи олимлар ишлаган, илғор илмий ишлар ишлаб чиқилган ислом цивилизациясининг марваридидир». У Имом ал-Бухорийнинг, Ал-Хоразмийнинг, Ибн Синонинг ҳиссасини алоҳида қайд этиб ўтди.

Америкалик имомга кўра, АҚШ мусулмонлар жамоатчилиги орасида миллий туристик брендни янада оммалаштириш учун мустаҳкам асос бўлган бир қатор омиллар мавжуд.

Биринчидан, Ўзбекистон қадимий шаҳарларнинг бой меъморий меросига эга.
Иккинчидан, мамлакатда кўплаб бебаҳо қўлёзмалар сақланмоқда, шу жумладан Усмон Мусҳафи.
Учинчидан, республикада исломий таълимотнинг институционал асослари яратилди.
Тўртинчидан, ҳукумат зиёрат туризмини ривожлантириш механизмларини фаол жорий этмоқда.
Бешинчидан, «Ўзбекистон дунёга кенг очилмоқда».

Жума намозидан сўнг Имом Мажид билан алоҳида учрашув бўлиб ўтди. Музокаралар чоғида амалий ҳамкорликни ривожлантириш масалалари муҳокама қилинди. Жумладан, америкалик мусулмонлар гуруҳларини мунтазам равишда Ўзбекистонга юбориш масаласи кўриб чиқилди.

Ўзбекистон мусулмонлари идораси Матбуот хизмати

Ўзбекистон янгиликлари
Бошқа мақолалар

Саҳобалар таровеҳни нечи ракат ўқишарди?

17.03.2025   2090   2 min.
Саҳобалар таровеҳни нечи ракат ўқишарди?

Рамазон ойида хуфтон намозидан сўнг адо қилинадиган таровеҳ намози суннати муаккададир. Эркаклар масжидда жамоат билан ўқиса, аёллар уйида адо қилади. Баъзи фуқаҳолар: «Пайғамбаримиз соллаллоҳу алайҳи васаллам ҳадисда айтган Рамазондаги тунги ибодатдан мақсад таровеҳ намозидир», дейишган.

Таровеҳ намози йигирма ракатдир. Ушбу йигирма ракатни ўнта салом ва бешта тарвиҳа (дам олиш)да адо қилинади. Ҳар икки саломдан сўнг дам олинади.

Тўрт мазҳаб уламолари таровеҳнинг йигирма ракат эканлигига бу ҳадисларни далил қилишган: Соиб ибн Язид розияллоҳу анҳудан ривоят қилинади: «Умар розияллоҳу анҳунинг даврларида Рамазон ойида саҳобалар таровеҳни йигирма ракат ўқишарди» (Имом Байҳақий ривояти).

Абдулазиз ибн Рофеъ розияллоҳу анҳудан ривоят қилинади: «Мадинада Убай ибн Каъб Рамазон ойида одамларга йигирма ракат (таровеҳ) намозини ўқиб берарди ва витрни уч ракат ўқирди».

Ибн Қудома раҳматуллоҳи алайҳ «Муғний» номли китобларида таровеҳ намозини йигирма ракатлигига ижмо қилинганини келтиради ва Имом Моликнинг «Таровеҳ ўттиз олти ракатдир», деган сўзларига раддия сифатида бундай ёзади: «Рамазон ойида қоим бўлиб ўқиладиган таровеҳ намози йигирма ракатдир. Ушбу намозни биринчи ўқиган одам Пайғамбаримиз соллаллоҳу алайҳи васалламдирлар. Ушбу намозни Умар розияллоҳу анҳу жорий қилган, дейилишининг сабаби эса, у киши Убай ибн Каъбни имом қилиб, бу намозни жамоат бўлиб ўқишни жорий қилган биринчи шахс ҳисобланадилар.

Али розияллоҳу анҳу халифалик даврларида Рамазон ойида масжидлар олдидан ўтиб кетаётганларида уларнинг шамчироқлар ила ёритилганини кўриб: «Бизнинг масжидларимизни ёритган Умарнинг қабрини Аллоҳ ёритсин», деб дуо қилганлар. (Яъни Умар (розияллоҳу анҳу)нинг қилган ишларини маъқуллаганлар.)»1

Миср, Мағриб, Ливия, Қувайт, Қатар, Сурия, Покистон, Ҳиндистон каби ўлкалардаги деярли барча масжидларда таровеҳ намозини йигирма ракат ўқишади.

Юқорида айтиб ўтилган маълумотлардан ер юзидаги барча мусулмонлар таровеҳни йигирма ракат ўқишлари аён бўлади. Пайғамбаримиз соллаллоҳу алайҳи васаллам ўзларининг муборак ҳадисларида: «Менинг умматим залолатда жамланмайди», деганлар. Демак, таровеҳни йигирма ракат ўқиш суннат ҳисобланади.

Одилхон қори ЮНУСХОН ўғли

1 Ибн Қудома. “Муғний фи фиқҳил Ҳанбалий”. 2-жуз. 167-бет.