07 Апрел, 2025, 9 Шаввол, 1446
07 Апрел, 2025, 9 Шаввол, 1446
Фолбинлик – бу келажакни башорат қилиш, ноёб билимларга эга эканлигини даъво қилиш ёки ғайриоддий усуллар билан кимнидир даволаш иддаоси. Баъзилар қўллар, кафт чизиқлари ёки карта билан, бошқалари эса турли сеҳрли амалиётлар билан одамларни ишонтиради.
Ислом динида фолбинлик ва сеҳрдан қатъий қайтарилган. Аллоҳ таоло Қуръонда бундай ишлардан қайтарган: “...Сенга зарар ҳам, фойда ҳам етказа олмайдиган нарсаларга дуо қилма. Агар шундай қилсанг, албатта золимлардан бўласан” (Юнус сураси, 106-оят).
Шунингдек, Пайғамбаримиз Муҳаммад соллаллоҳу алайҳи васаллам бундай деганлар: “Ким фолбин ёки кўзбойлоғичга бориб, унинг сўзини тасдиқласа, у Муҳаммадга соллаллоҳу алайҳи васаллам нозил қилинган нарсага кофир бўлибди” (Имом Аҳмад ривоят қилган).
Бу ҳадис фолбинларга ишониш қанчалар оғир гуноҳ эканини кўрсатади.
Баъзилар қийинчиликлардан чиқиш йўлини қидириб, ҳеч қандай далилсиз фолбинларга югуради.
Кўпинча инсон ўз ҳаёти ҳақида “махфий маълумот” билишни хоҳлайди ва буни фолбинлардан излайди.
Кимдир фолбинларнинг сўзларига ишониб, уларни ҳақиқат деб қабул қилади. Ваҳолангки, фолбинга бориш дунё ва охират учун хатарлидир.
1. Иймонни заифлаштиради – Фолбинларга ишониш Аллоҳга бўлган таваккулни камайтиради.
2. Одамларни алдайди – Фолбинлар кўпинча ёлғон айтади ва одамларнинг пулларини ноҳақ йўллар билан олади.
3. Жамиятни бузади – Фолбинларга ишонган одамлар ўз ҳаётларини уларнинг гапларига қараб йўналтиради ва ҳақиқатдан узоқлашади.
Фолбинлардан ҳимояланишнинг йўллари:
1. Қуръон ва ҳадисларни ўрганиш – Исломда тақдир ва таваккул ҳақидаги тушунчаларни билиш фолбинларга ишонишдан сақлайди.
2. Истиғфор ва дуо қилиш – Қийинчиликда Аллоҳга юзланиш керак, чунки ҳақиқий ёрдам фақат Ундан келади.
3. Саҳиҳ илмга таяниш – Ҳар қандай масалада илмли уламолардан маслаҳат олиш керак.
Фолбинларга ишониш нафақат одамнинг ақлига, балки иймонига ҳам зарар етказади. Ҳақиқий ҳидоят фақат Аллоҳнинг каломи ва Пайғамбаримиз соллаллоҳу алайҳи васалламнинг суннатидандир. Шунинг учун ҳамма вақт Аллоҳга таваккул қилиб, Ундан ёрдам сўрайлик.
Ҳомиджон қори ИШМАТБЕКОВ
1. Шайтон инсонларнинг қўлидаги нарсага таъмагирлик қилишга васваса қилади.
Шунда Аллоҳ таолонинг қуйидаги ваъдасини эсланг: “Ерда ўрмаловчи бирор нарса (жонзот) йўқки, унинг ризқи (таъминоти) Аллоҳнинг зиммасида бўлмаса! (У) унинг қароргоҳини ҳам, оромгоҳини ҳам билур. Ҳаммаси аниқ Китоб (Лавҳул-маҳфуз)да (ёзилган)дир” (Ҳуд сураси, 6-оят).
2. Шайтон узун орзулар қилишга васваса қилиб, ўлимни унуттиради.
Шунда Аллоҳ таолонинг қуйидаги оятини эсланг: “Бирор жон эртага нима иш қилишини билмас. Бирор жон қаерда ўлишини ҳам билмас. Албатта, Аллоҳ (ҳамма нарсани) билувчи ва хабардор зотдир (Луқмон сураси, 34-оят).
3. Шайтон бу дунёни ўйин-кулгу, маишат билан ўтказишга васваса қилади.
Шунда Аллоҳ таолонинг қуйидаги оятини эсланг: “(Эй, Муҳаммад!) Уларга қўйиб беринг: есинлар, фойдалансинлар ва орзулар уларни машғул қилаверсин! Бас, яқинда (қилмишларининг оқибатини) билиб олурлар” (Ҳижр сураси, 3-оят).
4. Шайтон инсонлардан умидвор бўлишга, уларга суянишга васваса қилади.
Шунда Аллоҳ таолонинг қуйидаги оятини эсланг: “Кимки Аллоҳга тақво қилса, У унга (ташвишлардан) чиқиш йўлини (пайдо) қилур. Яна, уни ўзи ўйламаган жойдан ризқлантирур. Кимки Аллоҳга таваккул қилса, бас, (Аллоҳнинг) ўзи унга кифоя қилар...” (Талоқ сураси, 2-3 – оятлар).
5. Шайтон мусулмонлар устидан мазах қилишга, уларни камситишга васваса қилади.
Шунда Аллоҳ таолонинг қуйидаги оятини эсланг: “Ҳолбуки, куч-қудрат фақат Аллоҳники, Унинг пайғамбариники ва мўминларникидир. Лекин мунофиқлар (буни) билмаслар” (Мунофиқун, 8-оят).
6. Шайтон обрў-эътибор қозониш, одамларнинг олқишларига учишга васваса қилади.
Шунда Аллоҳ таолонинг қуйидаги оятини эсланг: “(Эй, Муҳаммад!) Роббингизнинг раҳматини (пайғамбарликни) улар тақсимлайдиларми?! Уларнинг дунё ҳаётидаги тирикчиликларини ҳам уларнинг ўрталарида Биз тақсимлаганмиз ва бир-бирларини бўйин сундириш (ишлатиш)лари учун баъзиларини баъзиларидан даражаларини кўтариб қўйганмиз. Роббингизнинг раҳмати эса улар тўплайдиган нарса (бойлик)ларидан яхшироқдир” (Зуҳруф сураси, 32-оят).
7. Шайтон зиқналик қилишга, мол-дунё тўплашга васваса қилади.
Шунда Аллоҳ таолонинг қуйидаги оятини эсланг: “Сизларнинг ҳузурингиздаги нарсалар тугаб кетур. Аллоҳ даргоҳидаги нарсалар эса боқийдир. Биз, албатта, сабр этганларни ўзлари қилиб ўтган гўзал (солиҳ) амаллари баробаридаги мукофот билан тақдирлаймиз” (Наҳл сураси, 96-оят).
8. Шайтон ғурурга кетишга, бошқаларни паст санашга васваса қилади.
Шунда Аллоҳ таолонинг қуйидаги оятини эсланг: “Эй, инсонлар! Дарҳақиқат, Биз сизларни бир эркак (Одам) ва бир аёл (Ҳавво)дан яратдик ҳамда бир-бирларингиз билан танишишингиз учун сизларни (турли-туман) халқлар ва қабила (элат)лар қилиб қўйдик. Албатта, Аллоҳ наздида (энг азизу) мукаррамроғингиз тақводорроғингиздир..." (Ҳужурот сураси, 13-оят).
Аллоҳ таоло барчамизни тўғри йўли – ҳидоятида собит қадам қилсин. Шайтон васвасасидан ўз паноҳида сақласин.
Даврон НУРМУҲАММАД
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа