Ҳаж сафарига бориш, Каъбатуллоҳни зиёрат қилиш ҳар бир мўмин-мусулмоннинг орзуси. Давлатимиз томонидан кўрсатилаётган эътибор ва ғамхўрлик сабабли ватандошларимиз эмин-эркин ҳаж амалларини адо этиш бахтига муяссар бўлишмоқда.
19 май куни навбатдаги зиёратчилар Маккаи мукаррамага замонавий автобусларда етиб келди.
Ҳамюртлармизни муҳташам Сoncrete al-Sahhab меҳмонхонасида саудиялик мутасаддилар, Ўзбекистон мусулмонлари идораси раиси, муфтий Шайх Нуриддин Холиқназар ҳазратлари, Дин ишлари бўйича қўмита вакиллари, Жидда шаҳридаги бош консул Сирожиддин Шамсуддинов ва бош консулхона ходимлари томонидан катта эҳтиром ила кутиб олинди.
Аллоҳ таолонинг меҳмонларига рисоладагидек хизмат кўрсатиш, уларга қулай шароитларни яратиб бериш мақсадида барча имкониятлар ҳозирланди. Муборак сафар мобайнида ҳар бир тадбирлар аниқ режа асосида юксак даражада амалга оширилмоқда. Ташкилий-ҳужжат ишлари, тоату ибодатлар, истиқомат, озиқ-овқат, тиббиёт ва транспорт хизматлари юқори сифатда ташкил этилган.
Зиёратчилар умра амалини бажариб бўлгач ҳаж ибодати бошланиш санаси, яъни Зулҳижжа ойининг саккизинчи кунига қадар Ҳарами шарифда тоату ибодатда бўладилар.
Ҳақ таоло ҳожиларнинг ҳажларини мабрур, саъйларини машкур, гуноҳларини мағфур қилсин.
Ўзбекистон мусулмонлари идораси Матбуот хизмати
5 январь куни Наманган вилояти бош имом-хатиби Абдуллоҳхон домла Саматов бошчилигида вилоят вакиллиги ходимлари, шаҳар ва туман бош имом-хатиблари ҳамда “Ҳаж–2025” зиёратчиларидан иборат ишчи гуруҳ аъзолари иштирокида Наманган туманидаги “Сайид Жалолиддин” жоме масжидида йиғилиш бўлиб ўтди.
Йиғилишда ишчи гуруҳ аъзолари ҳамда маҳаллаларда маънавий тарғиботчи бўлиб фаолият юритаётган ҳожилар билан Наманган туманида амалга ошириладиган ишлар муҳокама қилиниб, тегишли тавсия ва кўрсатмалар берилди.
Ишчи гуруҳ фаолиятининг асосий йўналишлари сифатида:
“Ҳаж–2025” зиёратчиларини маънавий-маърифий тадбирларга фаол жалб этиш,
имом-хатибларнинг масжидни бошқариш фаолиятини ўрганиш ва амалий кўмак бериш,
пешин намози олдидан долзарб мавзуларда намунавий маърузалар ўқиш
белгилаб олинди.
Шунингдек, ишчи гуруҳ аъзолари маҳаллалардаги айрим хонадонларга ташриф буюриб, аҳоли ҳол-аҳволи билан танишди, ёшларнинг таълим-тарбияси, мавжуд муаммолари ўрганилди ҳамда намунавий оилаларда кексалардан дуои хайрлар олинди.
Имом-хатиблар фаолияти самарадорлигини оширишга қаратилган мазкур ишчи гуруҳ фаолияти вилоятнинг бошқа туманларида ҳам давом эттирилиши режалаштирилган.
Ўзбекистон мусулмонлари идораси
Наманган вилояти вакиллиги
Матбуот хизмати