19 Август, 2025, 25 Сафар, 1447
19 Август, 2025, 25 Сафар, 1447
Бугун Бухорои шарифда илм ва маърифат йўлида умрини сарфлаган улуғ устоз – Мир Араб олий мадрасаси ва Мир Араб ўрта махсус ислом таълим муассасаси мударриси, Баҳоуддин Нақшбанд жоме масжиди имом-хатиби, муҳтарам Абдуғафур Раззоқ Бухорий ҳазратлари муборак 75 ёшни қарши олмоқдалар.
Устоз ҳазратлари умрларининг 50 йилдан ортиқ қисмини ислом дини равнақига, ёшларни тарбиясига ва аждодлар меросини асраб-аввайлашга бағишладилар. Бухоро шаҳар “Хўжа Зайниддин” масжидида имом сифатида, шунингдек, Бухоро вилояти қозиси сифатида халққа хизмат қилдилар. У зотнинг заҳматли меҳнатлари, илмга бўлган садоқатлари ва толиби илмларга меҳрибонликлари минглаб шогирдлар қалбида илҳом уйғотди.
Абдуғафур Раззоқ Бухорий ҳазратлари наинки фақат имом-хатиб ва мударрис, балки ҳақиқий маънавият устуни, илм ва тарбия майдонида намуна бўлиб келмоқдалар. У зот хаттотлик, табобат, илм ва маърифат соҳаларида ҳам ўзининг юксак билими ва маҳоратлари билан танилганлар.
Ҳақиқатан ҳам, устоз ҳазратлари толиби илмларнинг пешвоси, ёшларнинг ҳақиқий мураббийси, замондош уламолар орасида эътиборли ва ардоқли аллома сифатида танилганлар. У зотнинг ҳар бир сўзлари, ҳар бир насиҳатлари қалбларга нур, илмга чанқоқ ёшлар учун эса йўл-йўриқдир.
Бугун, шу табаррук кунларда, устозга узоқ-умр, сиҳҳат-саломатлик тилаймиз. Халқимиз, Ватанимиз ва динимиз йўлида яна кўп йиллар давомида самарали хизмат қилишларини Аллоҳдан сўраб қоламиз.
Устоз, илм йўлида заҳмат билан ўтган муборак ёшларингиз муборак бўлсин!
Мир Араб олий мадрасаси
Матбуот хизмати
1 қисм / 2 қисм
Улар: “Хўп яхши. Демак, тўрт имомларнинг барчаси тўғри экан, бордию тўрт имомдан учтаси бир хил фикрда бўлишса-ю, лекин биттаси бошқа фикрда бўлса, улардан қайси бирига эргашамиз?” деб яна сўрадилар.
Мен: “Бир имомга”, деб жавоб бердим.
Улар: “Нима учун, ахир кўпчиликка эргашиш керак эмасми?”, дейишди.
Мен: “Аллоҳ таоло 124 минг пайғамбарларини юборди. Уларнинг ададини Аллоҳ таолонинг Ўзи билади. Биз барчаларига иймон келтирамиз.
Қуръони каримда Юсуф алайҳиссаломга акалари сажда қилганлари ҳақида оят келган. Уламолар ушбу оятнинг тафсирида: “Инсонларнинг бир-бирига ҳурмат маъносида сажда қилиши Расулуллоҳ соллаллоҳу алайҳи васалламгача ўтган барча пайғамбарлар даврида рухсат этилган”, дейдилар. Аммо Пайғамбаримиз алайҳиссалом бизни бундай қилишдан қайтарганлар. Лекин ўтган 123 минг 999 нафар пайғамбар бундан қайтаришмаган. Сиз ўтган пайғамбарларга эргашасизми ёки охирги замон пайғамбари Расулуллоҳ соллаллоҳу алайҳи васалламгами?” деб сўрадим.
Улар: “Расулуллоҳ соллаллоҳу алайҳи васалламга эргашамиз”, дедилар.
Мен: “Худди шунингдек биз ҳам бир имомга эргашамиз”, дедим.
Улар: “Ислом дини Макка, Мадинада нозил бўлганми ёки Куфадами?”, деб яна савол сўрадилар.
Мен: “Макка, Мадинада”, дедим.
Улар: “Унда Куфадаги Абу Ҳанифага эргашмасдан, Макка, Мадинадаги имомларга эргашимиз керак эмасми?” дедилар.
Мен: “Тўғри, Қуръони карим оятлари Макка ва Мадинада нозил бўлди. Лекин етти қорилардан бири Маккалик, бошқаси Мадиналик, яна бири Басралик бўлган. Сизлар ҳам куфалик Имом Осимнинг қироатига эргашасизларку. Нега унда Қуръон Макка, Мадинада нозил бўлган бўлса, куфалик қорининг қироатига эргашяпсизлар?” деб саволларига савол билан жавоб бердим.
Улар: “Чунки куфалик қорилар Қуръонни ўзлари ўйлаб топишмаган. Улар куфага Макка, Мадинадан борган кўплаб саҳобалардан таълим олишган. Саҳобалар уларга Қуръонни ўргатишган”, дедилар.
Мен: “Саҳобалар Куфага келишганида ибодатларни ҳам ўргатишганми? Хусусан, қандай намоз ўқишни ҳам кўрсатиб беришганми? Нима деб ўйлайсиз?” деб сўрадим.
Улар: “Ҳа, саҳобалар қандай намоз ўқишган бўлса, уни куфа аҳлига ҳам ўргатишган”, дейишди.
Мен: “Демак, саҳобалар Қуръондан таълим беришган экан, албатта намозни ҳам ўргатганлар. Демак, бир мазҳабга эргашсак саҳобага эргашаётган бўламиз. Саҳобалардан кўра Расулуллоҳ соллаллоҳу алайҳи васалламга эргашишда ким гўзалроқ намуна бўлиши мумкин?” дедим.
Хулоса ўзингиздан.......
Даврон НУРМУҲАММАД
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 