Avval xabar berganimizdek, Vaqf xayriya jamoat fondi rahbari Yahyo qori Abdurahmonov xayriya tadbirlari o'tkazish maqsadida Qoraqalpog'iston Respublikasiga tashrif uyushtirgan edi.

Tashrifning ilk manzili Nukus shahridagi Muhammad al Beruniy o'rta maxsus islom bilim yurti bo'ldi.

Madrasada o'tkazilgan uchrashuv chog'ida  Ya.Abdurahmonov,  bilim yurtining iqtidorli 6 nafar talabalariga to'lov shartnomalari uchun homiylarni hisobidan  moddiy yordamlar taqdim etdi.

Shuningdek, tashrif davomida, madrasa ustoz-murabbiylari va talabalarining 1 oylik tushlik hamda kechki ovqatlar uchun zarur bo'lgan oziq-ovqat mahsulotlari saxovatpesha vatandoshlarimiz ko'magida xayriya qilindi.

Jobir ibn Abdulloh roziyallohu anhudan rivoyat qilinadi: 

“Payg'ambar sollallohu alayhi vasallam: “Gunohlarning kechirilishiga sabab bo'ladigan ish – musulmonning qalbiga xursandchilik kiritish, qornini to'ydirish va mashaqqatini engillatishdir”, – dedilar” (Horis ibn Abu Umoma rivoyati).

Mazkur xayrli ishga xizmat va ehsoni bilan hissa qo'shgan barcha vatandoshlarimizni Alloh taolo mukofotlasin! 

Vaqf xayriya jamoat fondi matbuot xizmati