بسم الله الرحمن الرحيم

Alloh taolo sevikli Payg'ambarimiz Muhammad sollallohu alayhi vasallam orqali Islom dinini yubordi. Islom diniga ergashuvchilarga “mo'min-musulmon” deyiladi. Musulmon bo'lish uchun Alloh taologa, farishtalariga, kitoblariga, payg'ambarlariga, oxirat kuniga, taqdiriga, o'lgandan so'ng tirilishiga iymon keltirishi kerak.

Iymon – e'tiqod

Payg'ambarimiz Muhammad sollallohu alayhi vasallam Alloh taolo tomonidan keltirgan narsalarga til bilan iqror etib, qalb bilan ishonishga iymon deyiladi.

لٰآ اِلٰهَ اِلَّا اللّٰهُ  مُحَمَّدٌ رَسُولُ اللّٰهِ

"Alloh taolodan o'zga iloh yo'qdir. Muhammad sollallohu alayhi vasallam Alloh taoloning elchisidir".

الشَّهٰادَةُ: اَشْحَدُ اَنْلٰآ اِلٰهَ اِلَّا اللّٰهُ وَ اَشْحَدُ اَنَّ مُحَمَّدًا عَبْدُهُ وَ رَسُولُهُ

"Alloh taolodan boshqa iloh yo'qdir hamda Muhammad sollallohu alayhi vasallam Alloh taoloning quli (bandasi) va elchisidir deb guvohlik beraman".

اٰمَنْتُ باللّٰهِ وَ مَلٰآئِكَتِهٖ وَ كُتُبِهٖ وَ رُسُلِهٖ وَ الْيَوْمِ الْاٰخِرِ وَالْقَدَرِ خَيْرِهٖ وَ شَرِّهٖ مِنْ اللّٰهِ  تَعٰالٰى وَ الْبَعْثِ بَعْدَ الْمَوْتِ

"Alloh taologa, farishtalariga, kitoblariga, payg'ambarlariga, qiyomat kuniga, yaxshilik va yomonlik Alloh taolodan ekaniga hamda o'lgandan so'ng qabrdan qayta tirilishga imon keltirdim".

1. Alloh taologa ishonish – iymon keltirish:

Alloh taolo yolg'izdir. Uning tengi, o'xshashi yo'qdir. Barcha komil sifatlarga egadir. Alloh taolo butun olamni yo'qdan paydo qilgan Zotdir.

1. Farishtalarga ishonish (iymon keltirish):

Farishtalar Alloh taoloning qullaridir. Har vaqt Alloh taologa ibodatdadirlar. Ular gunoh qilmaslar. O'zlariga buyurilgan xizmatlari ila shug'ullanurlar.

1. Kitoblarga iymon keltirish:

Alloh taoloning payg'ambarlar orqali yuborgan kitoblari haqdir:

1. Tavrot;
2. Zabur;
3. Injil;
4. Qur'oni karim.

Tavrot Muso alayhissalomga, Zabur Dovud alayhissalomga, Injil Iso alayhissalomga, Qur'oni karim Payg'ambarimiz Muhammad alayhissalomga yuborilgandir. Qur'oni sharif nozil bo'lgandan so'ng, avvalgi kitoblarga amal qilish bekor qilindi. Faqat Qur'oni karimga to qiyomatgacha amal qilinadi.

Payg'ambarlarga iymon keltirmoq

Payg'ambarlar Alloh taolo tomonidan yuborilgan elchilardir. Bular boshqa odamlarga o'xshasalar ham, gunoh qilmaslar. Eng avvalgi payg'ambar Odam alayhissalom va eng so'nggisi Payg'ambarimiz Muhammad sollallohu alayhi vasallamdirlar. U zot alayhissalomdan so'ng boshqa payg'ambar kelmas.

Oxirat kuniga iymon keltirmoq

Bu dunyo yo'q bo'lib ketadi, qiyomat kuni keladi. Qiyomat kunida bu dunyoda qilgan barcha ishlar to'g'risida so'roq bo'ladi. Yaxshi va yomon amallariga qarab jazo va mukofot beriladi. Yaxshi bandalar jannatga kirib, rohat va farog'atda bo'ladilar. Yomon bandalar esa jahannamda qiynoq va azobda bo'ladilar.

Ummu Muslima