Saudiya Arabistonining etakchi nashrlaridan biri «Al-Franchayz» gazetasi veb-sahifasida (franchising.sa) «Toshkent Islom taraqqiyot banki yig'ilishini qabul qiladi» sarlavhali maqola chop etildi, deb xabar bermoqda, «Dunyo» AA.

Maqolada O'zbekiston Bosh vazirining o'rinbosari-investitsiya va tashqi savdo vaziri Sardor Umurzoqovning Islom taraqqiyot banki (ITB) prezidenti Bandar Hajjar bilan virtual muzokaralarining natijalari o'z ifodasini topgan.
Nashrda qayd etilganidek, Toshkent Islom taraqqiyot banki boshqaruvchilar Kengashining qirq oltinchi sessiyasini joriy yil iyul' oyida o'tkazishga tayyorgarlik ko'rmoqda.

ITBga a'zo 57 davlat va xalqaro moliya tashkilotlari va muassasalaridan tahminan 3 ming delegat ITB boshqaruvchilar Kengashining navbatdagi sessiyasida ishtirok etishi kutilmoqda.

«Mazkur sessiya ishiga tayyorgarlik doirasida O'zbekiston Bosh vazirining o'rinbosari-investitsiya va tashqi savdo vaziri Sardor Umurzoqov Islom taraqqiyot banki prezidenti Bandar Hajjar bilan virtual muzokaralar o'tkazdi. Unda tadbirga tayyorgarlik ishlari muhokama qilindi va tegishli «yo'l xaritasi»ni ishlab chiqish uchun ishchi guruhni shakllantirish masalasini tezlashtirishga e'tibor qaratildi», deb yoziladi maqolada.

Ta'kidlanishicha, onlayn-suhbat davomida S.Umurzoqov va B.Hajjar O'zbekiston va ITB o'rtasidagi qo'shma loyihalar va tashabbuslarni amalga oshirishning hozirgi holati va yaqin kelajakda hamkorlikni kengaytirish istiqbollarini muhokama qildi. Tomonlar ta'lim va sog'liqni saqlash sohalarida yangi ijtimoiy ahamiyatga molik loyihalarni tayyorlash orqali O'zbekistonda Islom taraqqiyot bankining investitsiya paketini kengaytirish imkoniyatlarini batafsil ko'rib chiqdi.

«Muloqot yakunida Hususiy sektorni rivojlantirish islomiy korporatsiyasi, Savdoni moliyalashtirish xalqaro islomiy korporatsiyasi, Investitsiyalarni kafolatlash va eksportni sug'urtalash islomiy korporatsiyasi kabi Islom taraqqiyot banki organlarining imkoniyatlari orqali ikki tomonlama hamkorlikni kengaytirishga kelishib olindi», deb yozadi «Al-Franchayz».

O'zbekiston musulmonlari idorasi matbuot xizmati