Habar berganimizdek, O'zbekiston musulmonlari idorasi raisi, muftiy Usmonxon Alimov hazratlari va Din ishlari bo'yicha qo'mita raisi Abdug'ofur Ahmedov xizmat safari bilan Buxoro viloyatida bo'lib turibdilar. Mehmonlarga Buxoro viloyati bosh imom-xatibi Jobir Elov va Diniy idora Ish boshqaruvchisi Rustam Jamilov hamroxlik qilmoqda.

Tashrifdan mamlakatimizda diniy-ma'rifiy sohadagi amalga oshirilayotgan islohotlarning mazmun-mohiyatini aholiga etkazish, afv etilgan, mehr operatsiyalari natijasida yurtimizga olib kelingan fuqarolar, imom-xatib, o'qituvchi va murabbiylar, xususan talaba yoshlar bilan muloqotlar o'tkazish ko'zlangan.

Mehmonlar dastlab Mir Arab oliy madrasasining yangi binosidagi qurilish-montaj ishlari va amalga oshirilayotgan yangi loyihalar bilan tanishdilar. Bu borada Muftiy hazratlari o'z fikr-mulohaza va takliflarini bildirdilar, qurilish ishlarini zamon talabiga mos holda, sifatli bajarish lozimligini ta'kidlab, unga hissa qo'shayotganlar haqiga xayrli duolar qildilar.

Shundan so'ng Bahouddin Naqshband ziyoratgohi majlislar zalida Mir Arab oliy madrasasi talabalari bilan uchrashuv bo'lib o'tdi. Unda Prezidentimiz Shavkat Mirziyoevning Oliy Majlisga murojaatnomasi mazmun-mohiyati, jumladan, unda bayon etilgan diniy-ma'rifiy sohaga, ta'lim-tarbiyaga oid ustuvor yo'nalishlar muhokama qilindi.

Anjumanda yurtimizda yoshlarga qaratilayotgan e'tibor, xususan, joriy yilga “Yoshlarni qo'llab-quvvatlash va aholi salomatligini mustahkamlash yili” deb nom berilgani zamirida yoshlarni har jihatdan qo'llab-quvvatlash g'oyasi mujassam ekani alohida qayd etildi.

Shuningdek, uchrashuvda yurtimizda ziyorat turizmini rivojlantirish borasida olib borilayotgan sa'y-harakatlar, O'zbekistonning bu boradagi imkoniyatlari haqida ham so'z yuritildi.

Yig'ilish so'ngida talabalar mavzu yuzasidan fikr-mulohazalarini bildirish bilan birga, o'zlarini qiziqtirgan savollariga javob oldi.

Tashrif tafsilotlarini saytimiz va ijtimoiy tarmoqdagi sahifalarimiz orqali kuzatib boring.

O'zbekiston musulmonlari idorasi Matbuot xizmati