O'zbekiston musulmonlari idorasi tasarrufidagi “Ko'kaldosh” bilim yurti bitiruvchisi No''monxon Yahyoxon bilan saodat asriga sayohat qilib, sahobalar hayotiga oid ta'sirli lavhalarni yangi tashkil etilgan “Peshqadamlar” loyihasida yoritib borish rejalashtirilgan.
Aziz muxlis, muslim.uz ijodkorlari Allohning yordami ila yana bir xayrli loyihaga qo'l urdi. Bundan maqsad Islom dini ma'rifatini Hazrati Payg'ambarimiz Muhammad sollallohu alayhi va sallamdan o'rganib, keyingi avlodlarga etkazib ketgan sahobalar hayotiga chuqur nazar solib, din rivoji yo'lida qilgan buyuk xizmatlarini ko'rsatib, ibrat olish sanaladi.
Islom tarixi sahobalar hayoti bilan chambarchas bog'liq. Ular payg'ambarlardan keyin insonlarning eng komil va fozillaridir. Sahobalarning eng yaxshilari to'rt xalifa, keyin jannatga kirishi bashorat qilinganlar, Badr va Uhud, Rizvon ishtirokchilari turadi. Shuningdek, ularning birlari ilmda, yana birlari halimlikda, boshqalari esa saxovat yo jasorat bobida peshqadam bo'lganlar. Alloh ulardan rozi bo'lsin.
Mana shunday ma'rifiy loyihalarni har bir talaba, har bir bitiruvchi yoki diniy soha xodimi silsila shaklida olib borishida bizning sayt va ijtimoiy tarmoqlarimiz minbar vazifasini o'tashi mumkin.
Haq taolo ushbu “Peshqadamlar” ko'rsatuvini muvaffaqiyatli qilsin!
O'zbekiston musulmonlari idorasi Matbuot xizmati
@muslimuzportal | @mp3muslim | @diniysavollar
O‘zbekiston musulmonlari idorasi rahbariyati tomonidan aholi murojaatlari bilan ishlash, fuqarolarning arz va takliflarini tinglash hamda ularga amaliy ko‘mak berish tizimli ravishda davom ettirilmoqda.
Ana shunday qabullardan biri bugun, 13 may kuni O‘zbekiston musulmonlari idorasi raisining birinchi o‘rinbosari Homidjon domla Ishmatbekov Diniy idoraga tashrif buyurgan fuqarolarni navbatdagi qabuli bo‘lib o‘tdi.
Samimiy muloqot ruhida o‘tgan uchrashuvda imom-xatiblar faoliyatiga oid takliflar, murakkab oilaviy munosabatlar va ijtimoiy qo‘llab-quvvatlash kabi masalalar atroflicha ko‘rib chiqildi.
Qabul jarayonida murojaatchilarning shar’iy masalalar bo‘yicha so‘rovlariga batafsil javob berilib, oilaviy muammolarni bartaraf etish yuzasidan zarur tavsiyalar berildi, shuningdek, moddiy yordam so‘rab kelgan ehtiyojmand kishilarga belgilangan tartibda ko‘mak ko‘rsatildi.
Bu kabi xayrli tashabbuslar nafaqat markazda, balki respublikamizning barcha hududiy vakilliklari va jome masjidlarida ham har haftaning chorshanba kuni imom-domlalar tomonidan izchil amalga oshirilmoqda.
Zero, birovning dardini yengillatish, uning tashvishlari osongina bartaraf etilishiga hissa qo‘shish – savobi ulug‘ amal. Chunonchi, Rasululloh sollallohu alayhi va sallam:
"... Kim birodarining hojatini ravo qilsa, Alloh uning hojatini ravo qiladi. Kim bir musulmonning tashvishni aritsa, Alloh uning Qiyomat kunidagi tashvishlaridan birini aritadi", deganlar (Imom Buxoriy rivoyati).
O‘zbekiston musulmonlari idorasi
Matbuot xizmati