۞وَٱلۡوَٰلِدَٰتُ يُرۡضِعۡنَ أَوۡلَٰدَهُنَّ حَوۡلَيۡنِ كَامِلَيۡنِۖ لِمَنۡ أَرَادَ أَن يُتِمَّ ٱلرَّضَاعَةَۚ وَعَلَى ٱلۡمَوۡلُودِ لَهُۥ رِزۡقُهُنَّ وَكِسۡوَتُهُنَّ بِٱلۡمَعۡرُوفِۚ لَا تُكَلَّفُ نَفۡسٌ إِلَّا وُسۡعَهَاۚ لَا تُضَآرَّ وَٰلِدَةُۢ بِوَلَدِهَاوَلَا مَوۡلُودٞ لَّهُۥ بِوَلَدِهِۦۚ وَعَلَى ٱلۡوَارِثِ مِثۡلُ ذَٰلِكَۗ فَإِنۡ أَرَادَا فِصَالًا عَن تَرَاضٖ مِّنۡهُمَا وَتَشَاوُرٖ فَلَا جُنَاحَ عَلَيۡهِمَاۗ وَإِنۡ أَرَدتُّمۡ أَن تَسۡتَرۡضِعُوٓاْ أَوۡلَٰدَكُمۡ فَلَا جُنَاحَ عَلَيۡكُمۡ إِذَا سَلَّمۡتُم مَّآ ءَاتَيۡتُم بِٱلۡمَعۡرُوفِۗ وَٱتَّقُواْ ٱللَّهَ وَٱعۡلَمُوٓاْ أَنَّ ٱللَّهَ بِمَا تَعۡمَلُونَ بَصِيرٞ٢٣٣

233. Emizishning to'la-to'kis bo'lishini istagan onalar farzandlarini to'liq ikki yil emizishadi. Ularni me'yorida edirish-ichirish ota zimmasidadir. Hech kimga toqatidan ortig'i yuklanmaydi. Bolasi tufayli ona ham, ota ham zarar ko'rmasin. Merosxo'r ham shunday. Agar o'zaro kelishib va maslahatlashib sutdan ajratishni istashsa, gunohkor bo'lishmaydi. Agar bolalaringizni emizdirmoqchi bo'lsangiz, beradiganingizni yaxshilikcha to'lasangiz, gunoh bo'lmaydi. Allohdan qo'rqinglar, bilinglarki, Alloh nima ish qilayotganlaringizni albatta ko'rib turuvchidir.

 Shar'iy istilohda bolaning boshqa ayol ko'kragidan ikki yoshgacha bo'lgan paytida sut emishi va uning hukmlari bilan bog'liq masalalar «razo'» deyiladi. Ikki yoshga to'lmagan bolaning qorniga ayol kishi sutining etib borishi razo'dir. Agar bolaning qorniga bir tomchi bo'lsa ham sut etib borsa, razo' hisoblanadi. Go'dakni mukammal emizish muddati ikki yildir. Agar onasi bolani emizishga qodir bo'lmasa, er boshqa ayolni yollab emizdiradi.

Yangi tug'ilgan farzand oziqlanishga muhtoj bo'ladi. Chaqalog'ini emizish onaning vazifasidir, ona suti go'dak haqlaridan biridir. Ona shar'iy uzr bilan emiza olmasa, bir emizuvchi topish va unga haq to'lab rozi qilish ota zimmasiga tushadi. Bolaning suyagi ona suti bilan shakllanadi, uning ruhiy jihatdan kamolga etishida ham ona sutining ahamiyati katta. Bola ulg'ayishida ona sutiga boshqa hech narsa teng kelolmasligini zamonaviy ilmiy izlanishlar ham isbotlagan. Bolaning onasiga uni ikki yil emizish hukmi bor. Bu hukm emizish muddatini to'kis qilmoqchi bo'lganlar uchun, bundan oz muddatda ham sutdan chiqarish mumkin. Bu hukm nikohda turgan onaga ham, taloq qilinib iddada o'tirgan onaga ham, iddasi chiqqanga ham barobardir. Emizish chog'ida va undan keyin ham ona-bolaning nafaqasi, ya'ni uning taomi va kiyim-kechagi, uy-joy bilan ta'minlash kabi ehtiyojlarini qondirish otaning asosiy vazifalaridandir. Agar ota o'tib ketsa, ya'ni vafot etsa, merosxo'ri bolani emizuvchi onaning taom va kiyimini ta'minlaydi. Boshqa emizuvchi topilganida ham bola onasining haqqiga nuqson etkazilmaydi.