Bugungi kunda Jizzax viloyatidagi binolari eskirib, yaroqsiz holga kelib qolgan 8 ta masjid qaytadan qurilyapti. Shulardan biri, Forish tumani olis Bag'dod shaharchasidagi “Yangiqishloq” masjididir. Masjid shu vaqtgacha, to'g'rirog'i 2019 yilga qadar univermag binosi o'rnida faoliyat ko'rsatib kelgani achinarli hol. Ko'rgan inson bu eski do'konniing devoriga ilingan yozuvidan bilmasa, masjid deb o'ylamas edi.

Diniy idora Jizzax viloyati vakilligining ko'pdan beri shu joyda aholi uchun yozda salqin, qishda issiq bo'lgan tom ma'nodagi namozgohni barpo etish borasidagi sa'y-harakatlari natijasida nihoyat 2019 yili tegishli ruxsat asosida sahovatpesha kishilar ko'magi hamda qishloq aholisining hashari bilan yangi masjid qurish ishlari boshlandi.

Olti sotixdan ortiq maydonda qurilayotgan ibodat uyi 800 kishini sig'dira oladigan xonaqoh, tahoratxona, ayollar uchun namozxona, qo'shimcha ma'muriy xonalardan iborat bo'ladi. Bundan tashqari, masjid hovlisida yordamchi xo'jalik tashkil etilib, issiqxona barpo etish ko'zda tutilgan.

O'tgan bir yildan ziyod vaqt mobaynida xonqahoq va minora ko'tarilib, tom qismlari yopildi. Hozirda tahoratxona qurilishi davom etmoqda. Tez kunda kunda eshik, deraza-romlar o'rnatiladi.

Ahamiyatlisi, mazkur masjid Jizzax-Nurota-Navoiy katta yo'li yoqasida joylashgan bo'lib, ziyorat turizmi hamda mahalliy yo'lovchilarning ibodatlarini ado etib olishlari  uchun qulay nuqta hisoblanadi. Shu bois savobi ulug' amalga hissa qo'shish istagida bo'lganlar quyidagi hisob-raqamlari orqali qurilish ishlariga hissa qo'shishlari mumkin:

Agrobank Forish filiali:

h/r: 20212000904004960001

MFO: 00133      INN:202939611

Uzkard:

p/k: 8600042317309242

t/r: 23120000500000133001

Imom-xatibi Nishonov Rustam nomida.

O'zbekiston musulmonlari idorasi Masjidlar bo'limi