Qoraqalpog'iston Respublikasi Ellikqal'a tumani «Amirobod» ovul fuqarolari yig'inidagi «Safo» jome masjidi o'tgan asrning 1955-yillari qurilgan. 2000-yilgacha har hil tashkilotlar xizmat uyi sifatida foydalanib kelgan. Masjid 2000-yili «Safo» nomi bilan Adliya vazirligidan rasmiy ro'yxotdan o'tib faoliyat ko'rsata boshladi. Eski masjid imorati aholiga noqulay jaydan qurilgan, yonida avtotransport va piyodalar yo'li yo'q. Shu bois kuz va qish mavsumida masjidga boruvchilar, jumladan nuroniy otaxonlarga muammo tug'dirar edi.

2018-yili homiylar va mahalliy aholining ko'magi bilan mazkur masjidning yangi imoratining qurilishi boshlanib, 2020-yili qurilish va obodonlashtirish ishlari yakunlandi

29-oktyabr' kuni «Safo» masjidining yangi imoratini foydalanishga topshirish marosimi bo'ldi. Unda Ellikqal'a tumani hokimi S. Avezov, Qoraqalpog'iston  musulmanlari qoziyoti qozisi Sh. Bauaddinov, tumandagi masjid imom-xatiblari, faxriy nuroniylar ishtirok qildilar. Tuman hokimi S. Avezov, Qoraqalpog'iston  musulmanlari qoziyoti qozisi Sh. Bauaddinovlar  so'zga chiqib, namozxonlarni bu qutlug' dargoh, go'zal koshona, e'tiqod maskani bilan qutladilar, so'nggi yillarda mamlakatda din erkinligi sohasida, namozxonlarning ibodat qilish sharoitlarini yaxshilash bo'yicha olib borilayotgan ishlar haqida alohida to'xtalib o'tdilar.  Tuman aholisini masjid ochilishi bilan tabrikladilar.

Masjid qurilishida o'z kumaklarini ayamagan insonlarga tashakkurnoma va qimmatbaxo sovg'alar topshirildi.  

Masjid kishini o'ziga ohangrobodek tortadi. Loyihaga asosan o'ta mustahkam ta'mal toshi ustiga pishiq g'ishtdan qurilgan.  Masjid majmuasida 300-350 nafar namozxon uchun zarur bo'lgan barcha shart–sharoitlar yaratilgan. Mo'jazgina kutubxona tashkil etilgan. Masjid chorburchak shaklida bo'lib, uning qishki namozxonasi tepasida mahobatli gumbaz qad rostlagan.

Qoraqalpog'iston musulmonlari qoziyoti.