NAZM

Avvalg'i mu'man bihning sharhi

Budur iymon Hudog'a kelturmak,

shirk cherigin zamirdin surmak,

Aytqil:  “Lo iloha illalloh”,

Ayt, ma'nosidin ham o'l ogoh.

Kalima ushbudur, muni to'xtat,

Demagi farz bo'ldi bir navbat.

Yana mundin keyinki kelgusidur,

Bu aqoyidkim, ul deyilgusidur.

Bilg'ilu e'tiqodni muncha tuz

Jonu  ko'nglungda  mundog'  o'lturg'uz  –

Kim Hudodur borni hast etkan,

Yeru ko'ki balandu past etkan.

Bilki, ma'budi bosazo Uldur.

Jumlai xalqdin sizo Uldur.

Har nekim bordur, Ul yaratqandur,

Hastlik jarchasiga qotqandur.

Birduru yo'q sherik Aning ishiga,

O'xshamas hech ishta hech kishiga.

Ehtiyoji kishiga yo'qtur Aning,

Yoru yovar ishiga yo'qtur Aning.

(Bu mavzuning davomi bor)

NASRIY BAYoN

Ishonish shart bo'lgan

birinchi narsaning sharhi

(Iymonning birinchi sharti)

Allohga  iymon  keltirish  va  shirk  lashkarini  zamirdan  surish shuki, “Lo iloha illalloh”  (“Allohdan boshqa iloh yo'q”) deb aytgil.

Aytgil-u, buning ma'nosidan ham ogoh – xabardor bo'l.

Iymon kalimasi (Kalimai toyyiba – insonni kufrdan poklovchi kalima) shudir, buni yodingda saqlab qo'y. Bu kalimani bir marta aytish farzdir.

Yana bundan keyin keladigan narsa bu aqoiddir – e'tiqod qilinadigan narsalardirki, endi aytiladi.

E'tiqodni shu qadar to'g'ri bilib ol hamda uni jon va ko'ngilda to'g'ri,  mahkam  o'rnashtirki,  butun  mavjudotni  bor  qilgan,  osmonu erning birini yuksak, birini past qilib qo'ygan zot Allohdir. Balki, ma'budi bosazo – ibodatga loyiq va munosib bo'lgan zot Udir, barcha xalqdan – yaratilmish butun maxluqotdan o'zgacha, tengi va o'xshashi, misli va misoli bo'lmagan zot Udir.

Nimaiki bor bo'lsa, hammasini U yaratgandir va borlik, mavjudlik qatoriga qo'shgandir. U birdir, yakkayu yagonadir va Uning ishigasherik yo'qdir. Hech bir ishda hech bir kishiga o'xshamaydi. Uning hechbir kishiga ehtiyoji yo'q (hojatsiz hojatbarordir); Uning eshi, jufti, yordamchisi yo'qdir (chunki bunga muhtoj emasdir). (Bu mavzuning davomi bor)

Nasriy bayon va sharh muallifi:

Mirzo KYeNJABYeK