O'zbekiston Respublikasi Bosh vazir o'rinbosari, Turizmni rivojlantirish davlat qo'mitasi raisi Aziz Abduhakimov Eron Islom Respublikasining favqulodda va muxtor elchisi Hamid Nayerobodiy bilan muzokaralar o'tkazdi.
Uchrashuv doirasida turizm sohasidagi ikki tomonlama hamkorlikni kuchaytirishga doir kelishuvga erishildi. Tomonlar turizm sohasida COVID-19 pandemiyasi asoratlarini yumshatish bo'yicha o'zaro tajriba almashishdi, pandemiya bilan bog'liq vaziyatni hisobga olgan holda, xalqaro turistik sayohatlarni tiklashga doir birinchi darajali chora-tadbirlar muhokama qilindi.
Ma'lumot uchun: 2019 yil ma'lumotlariga ko'ra, Eron aholisi 83 million kishini tashkil qiladi, shulardan 6 milliondan ortig'i Turkiya, Ozarboyjon, Gruziya, Iroq va BAA kabi xorijiy davlatlarga sayohatlarni amalga oshirgan.
Turizmni rivojlantirish davlat qo'mitasi matbuot xizmati xabariga ko'ra, o'tkazilgan muzokaralarning yana bir muhim masalasi O'zbekistondagi tarixiy-madaniy meros ob'ektlarini saqlash hamda ularni restavratsiya qilish bo'yicha hamkorlikdagi loyihalar realizatsiyasi, shu yo'nalishda tajriba almashish va mutaxassislarni tayyorlash bo'ldi. Bundan tashqari, uchrashuv davomida nomoddiy madaniy meros ob'ektlarini targ'ib qilish va ularni YuNYeSKO ro'yxatiga kiritish masalalarini ishlab chiqishga to'xtalib o'tildi, bunda O'zbekiston va Eron xalqlari tarixi, madaniyati, an'analari va urf-odatlari hamda oshxonasi mushtarakligi alohida qayd etildi. Hamid Nayerobodiy Eron hukumati O'zbekistondagi islohotlarning yuqori sur'atlarda rivojlanayotganini katta qiziqish bilan kuzatayotganini ma'lum qilib, bunda Prezident Shavkat Mirziyoevning mamlakatni ilgari surish va O'zbekistonning bo'lg'usi “Uchinchi Renessansi”ni yaratish yo'lida yuritayotgan siyosati roli juda katta ekanligini ta'kidladi.
Eron tomoni O'zbekiston bilan parlamentlararo, savdo-iqtisodiy, madaniy va turistik aloqalarni kengaytirishdan manfaatdor ekanini qayd etdi. Uchrashuv yakuniga ko'ra, tomonlar O'zbekiston hamda Eron Islom Respublikasi o'rtasida madaniyat va san'at sohasida hamkorlik qilishga doir Hukumatlararo kelishuv va 2020-2023 yillarda turizm sohasida hamkorlik qilish bo'yicha Hukumatlararo dasturni imzolashga tayyorgarlik jarayonlarining tezlashtirishga oid kelishuvga erishishdi. Shuningdek, tomonlar restavratsiya ishlari tafsilotlarini belgilash hamda “yo'l xaritasi”ni tuzish uchun eronlik ekspertlar delegatsiyasining O'zbekistonga tashrifini tashkil qilishga kelishib olishdi. Bundan tashqari, tibbiyot turizmini rivojlantirish maqsadida Eron tomonidan Samarqand viloyatida zamonaviy Salomatlik markazini yaratish rejalashtirilmoqda, bunda Eron mutaxassislari va texnologiyalari jalb etilishi kutilmoqda. Mazkur salomatlik markazida murakkab tibbiy jarrohlik amaliyotlarini o'tkazish imkoni yaratiladi.
Ta'kidlash joizki, 2019 yilning 2 noyabrida Toshkent shahrida ShHT davlatlarining hukumat rahbarlari kengashi yig'ilishi doirasida O'zbekiston Respubilikasi Bosh vaziri Abdulla Aripov va Eron Islom Respublikasining birinchi vitse-prezidenti Ishoq Jahongiriy o'rtasida bo'lib o'tgan muzokaralar doirasida tarixiy yodgorliklarni restavratsiya qilish va tiklashga oid kelishuvlarga erishgan edi.

O'zbekiston musulmonlari idorasi matbuot xizmati