ANDROID
IOS
Qur'oni karimga muxlis xalqimizning talab va istaklarini inobatga olgan holda qiroat ilmi ustozi Shayx Alijon qori Fayzulla Maxdum o'g'lining “Al-Quran” nomli mobil' ilovasi mo'min-musulmonlarga taqdim etildi.
O'zbekiston musulmonlari idorasi raisi, muftiy Usmonxon Temirxon o'g'li Samarqandiy hazratlarining maslahatlari va tavsiyalari asosida ushbu dastur tayyorlandi.
Yurtimizda Qur'oni karimni o'rganish va o'rgatish borasida amalga oshirilgan ishlar doirasida Mushafi Sharif chop etildi, diniy ta'lim muassasalari qoshida Qur'on va tajvid kurslari faoliyati yo'lga qo'yildi, mazkur ilova ham ushbu xayrli ishlarning bevosita davomi hisoblanadi.
Al-Quran.uz ilovasi quyidagi 6 ta bo'limni o'z ichiga oladi:
1. Audio-video qo'llanma. Ushbu bo'lim “Harflar”, “Qoidalar”, “Kalimalar”, “Suralar” kabi qismlardan iborat.
“Harflar” bo'limi orqali mad xarflarigacha bo'lgan 28 ta harfning barchasini alohida o'qib tushuntirilgan. Arab harflarini o'rganish bilan birga harflarning maxraj va sifatlariga rioya kilgan holda mukammal talaffuz qilishni o'rgatilgan.
“Qoidalar” qismida “Mad”, “tashdid”, “tanvin”, “alif va hamza”, “lom”, “vasl”, “vaqf”, “idg'om", “iqlob” kabi qoidalarga mundarija orqali kirib, ularni batafsil o'rganib olish imkoniga ega bo'linadi.
“Kalimalar” qismida esa har bir musulmon bilishi lozim bo'lgan etti imon kalimasi joylashtirilgan: Kalimai toyyiba (to'g'ri so'z), Kalimai shahodat (iqror kalimasi), Kalimai tavhid (tavhid kalimasi), Kalimai raddil kufr (kufrni rad etish kalimasi), Kalimai istig'for, (mag'firat so'rash kalimasi), Kalimai tamjid (ulug'lash kalimasi), Imoni mujmal (imonning qisqa ifodasi) va Imoni mufassal (imonning batafsil ifodasi).
“Suralar” qismida “Fotiha”, “Baqara” surasining avvalgi 5 oyati hamda “Shams” surasidan “Nas” surasigacha bo'lgan suralar ilova qilingan.
2. Al-Fotiha onlayn xizmati. Ushbu xizmatga mo'min-musulmonlar o'zlarining qiroatlarini yuborishlari mumkin. Ijozali va tajribali ustozlar tomonidan ushbu tilovatlar tekshirilib, xato va kamchiliklari muxlislarga etkaziladi. Zero, Imom Buxoriy bobomiz rivoyat qilgan sahih hadisda aytilishicha, Hazrati Payg'ambarimiz sollallohu alayhi va sallam: “Sizlarning yaxshilaringiz Qur'onni o'rganib, so'ng uni boshqalarga ham o'rgatuvchilardir!”, deya marhamat qilganlar.
Eslatib o'tamiz Al-Fotiha onlayn xizmati 2021 yil fevral' oyida ishga tushiriladi, insha Alloh.
2. Har bir hudud uchun alohida namoz vaqtlari. Namoz eng ulug' farz amal hisoblanadi. U banda Allohning ne'matlariga shukr keltirishi uchun shariatga kiritilgan bo'lib, uning diniy, tarbiyaviy, shaxsiy, sihhiy, ijtimoiy va boshqa qator foydalari ko'p.Namoz ibodati bir kunda besh marta farz qilingan. Kim besh vaqt namozini o'z vaqtida yaxshilab o'qisa, unga dunyo va oxiratda yaxshi va'dalar berilgan. Zero, Qur'oni karimda “Albatta, namoz mo'minlarga vaqtida farz qilingandir”, deyilgan (Niso surasi, 103-oyat).Shu nuqtari nazardan mo'min-musulmonlarimiz muhim ibodatlarini o'z vaqtida ado etishlarida ushbu ilovadagi har bir hudud uchun alohida namoz vaqtlari eng yaqin ko'makchi bo'ladi.
4. Qiblani aniqlovchi ko'rsatkich. Namoz o'qishda yuzlanib turadigan tomon “qibla” deyiladi. Qibla Saudiya Arabistonining Makka shahridagi Masjidul-Haromdagi Ka'ba o'rnashgan joydir. Masjidul Haromdagi kishilar Ka'baning o'ziga, boshqa mintaqalardagilar esa Ka'ba bor tarafga yuzlanib namoz o'qiydilar. Islom dinida qibla qaysi tomonda ekanini bilishga harakat qilish, o'zi bilmasa, albatta bilishga intilish shart.
Shu bois, namozxonlar uchun turli joylarga borganda yoki safarga chiqqanda qiblani aniqlashda qulaylik qilish maqsadida, ushbu ilovada Qiblani aniqlovchi ko'rsatkich xizmati joylashtirilgan.
5. Qur'oni karim tilovatlari. Kalomi sharif tilovati juda ham fazilatli amal. Uning tilovati nafs pokligi va axloq sayqaliga katta ta'siri kattadir. Qur'oni karim qiroatining o'ziga yarasha qalbga, his-tuyg'uga bog'liq bir qancha sirlari bor. Zero, uni tanglash nihoyatda savobli ishdir. Alloh taolo bu borada shunday marhamat qilgan: “Qur'on o'qilganda uni tinglangiz va sukut saqlangiz! Shoyad (shunda) rahm qilingaysiz!”. Ibn Jazviy “Ushbu oyatga ko'ra, Qur'onga quloq soluvchiga rahmat nihoyatda yaqin bo'ladi”, deganlar.
Shuni hisobga olgan holda mazkur ilovada eng mashhur qori Halil Husoriyning Qur'oni karimning 30 juzi tilovati o'rin olgan. Kelgusida eng xushovoz va mujavvid qorilarning qiroatlari bilan yanada boyitish rejalashtirilgan.
6. Kundalik zikr va duolar. Allohni zikr etgan va Unga duo qilgan insonning qalbi poklanadi, imoni mustahkamlanadi, duolari ijobat bo'ladi. Abu Hurayra roziyallohu anhu rivoyat qilgan hadisda Hazrati Payg'ambarimiz sollallohu alayhi va sallam bunday marhamat qilganlar: “Qaysi bir qavm (jamoa) Allohning zikri uchun yig'ilsa, ularni farishtalar tavof qiladi, ularga Allohning rahmati yog'iladi, ularning davrasiga sakinat (xotirjamlik) tushadi, Alloh ularni O'ziga yaqin farishtalar bilan birga yod etadi” (Imom Muslim rivoyati).
Alloh taolo O'zini eslagan bandanigina eslaydi: «Bas, Meni yod etingiz, (Men ham) sizlarni yod eturman. Menga shukr qilingiz, noshukrchilik qilmangiz!» (Baqara, 152)
Ushbu ilovada kun davomida belgilangan vaqtlar va har xil holatlarda o'qish tavsiya etilgan zikrlar va mustajob duolar Nabiy alayhissalomdan qilingan rivoyatlar asosida bayon etilgan.
Ma'lumot o'rnida, Al-Quran.uz mobil' ilova loyiha rahbari Shayx Alijon qori Al-Azhar universitetining Shariat va Qonun fakul'teti hamda Ulumul Qur'on va qiroat ilmlariga ixtisoslashgan ilm dargohlarida tahsil olgan. Shayx Alijon qori Qur'oni karim va tajvid ilmi bo'yicha eng mo''tabar ustozlarning ijozalarini olgan.
Eslatib o'tamiz, Al-Quran.uz ilovasi qator innovatsion ishlanmalar bo'yicha qulaydir. Ayni paytda ilovani App Store va Google Play tizimidan yuklab olish mumkin. Ilova IOS va Android mobil' tizimlarda ishlash imkoniyatiga ega.
Alloh taolo ushbu innovatsion loyihani barchamizga muborak aylasin!
O'zbekiston musulmonlari idorasi
Matbuot xizmati
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 