Tokio markaziy masjidi har yili minglab musulmon bo'lmagan yaponiyalik ziyoratchilarni qabul qiladi. Shu ma'noda mazkur masjid imom-xatibi Muhammed Chinar yaponlarning Islomga qiziqishi haqida o'z kuzatuvlari bilan o'rtoqlashdi.
Chinar domla o'z masjidiga Yaponiyaning Vaseda, Keio va Meiji kabi nufuzli universitetlarining talabalari muntazam kelayotgani va Yaponiya universitetlarida ko'proq aspirant va magistratura talabalari Islom diniga oid dissertatsiya mavzularini tanlayotganini aytdi.
Shu munosabat bilan Chinar domla Islomda zakot berish, nikoh va ajrashish, musulmonlar o'rtasidagi qardoshlik munosabatlari kabi mavzularda yapon tadqiqotchilari bilan tez-tez maslahatlashib turadi, deb yozadi “IslamNews” sayti “Daily Sabah” nashriga tayanib.
Tokio masjidiga har yili 50 mingga yaqin noislomiy yapon tashrif buyuradi.
Tokio munitsipaliteti xodimi Zumanning so'zlariga ko'ra, u masjidga qiziqish tufayli 4 marta tashrif buyurgan – diniy bino uning ish joyi yonida joylashgan. Unda masjid arxitekturasi katta taassurot qoldirgan. Shundan beri u ishdan tanaffus paytida tez-tez masjid hovlisida o'tiradi.
O'zbekiston musulmonlari idorasi
Matbuot xizmati
Har haftaning chorshanbasida O‘zbekiston musulmonlari idorasi va uning quyi tizimlarida fuqarolar qabuli bo‘lib o‘tadi. Murojaatlarga diniy idora rahbariyatidan tortib, har bir masjid imomigacha doimiy e’tibor qaratib, fuqarolarga imkon qadar ko‘makchi bo‘lishadi.
Ana shunday qabullardan biri bugun, 19 noyabr kuni O‘zbekiston musulmonlari idorasida bo‘lib o‘tdi.
Raisning birinchi o‘rinbosari Homidjon domla Ishmatbekov Diniy idoraga kelgan fuqarolarni qabul qilib, murojaat, arz va takliflarni tingladi. Murojaatchilar tomonidan aytilgan imom-xatiblar faoliyati, haj va umra, oilaviy masalalar, moddiy yordam singari 14 ta masala vakolat doirasida ijobiy hal etildi.
Samimiy qabul va g‘amxo‘rlikdan mamnun bo‘lgan fuqarolar ko‘rsatilgan e’tibordan ko‘ngillari shod bo‘lib, xayrli duolar qilishdi.
O‘zbekiston musulmonlari idorasi
Matbuot xizmati