Dubayda Islom xattotlik ko'rgazmasi boshlandi
Dubayda ikki yilda bir marta o'tkaziladigan Islom xattotlik san'ati ko'rgazmasi islom davlatlaridan 200 nafar xattot ishtirokida boshlandi.
“IQNA” saytining “ash-Sharq” matbuotiga tayanib xabar berishicha, Dubay madaniyat va san'at departamenti dunyoning turli burchaklaridan 200 ga yaqin xattot va rassomlarni jamlagan va Dubay bo'ylab 35 ta joyda 19 ta ko'rgazma tashkil etadigan “Dubay xattotlik biyennalesi” o'z faoliyatini boshladi.
Ko'rgazmaga qo'yilgan asarlar orasida islom xattotligi, an'anaviy va zamonaviy tipografiya 8 tilda o'rin olgan.
Ushbu biyennalening ochilishi 11-Dubay xalqaro arab xattotligi ko'rgazmasi doirasida bo'lib o'tadi va shu yilning 31 oktyabrigacha davom etadi.
Mazkur ko'rgazmaning ochilishida Dubay Madaniyat boshqarmasi rahbari Shayxa Latifa bint Muhammad bin Rashid al-Maktum bunday dedi: “Hattotlik milliy o'zligimizni anglashdagi ustunlardan biri sanalib, mahalliy hamda arab madaniyati va merosimiz boyligini ifodalovchi, ilhomlantiruvchi vositadir”.
U qo'shimcha qildi: “Dubay ijodiy iqtisodiyotda sifatli o'zgarishlarni amalga oshirish va ijodiy iste'dodlarni qo'llab-quvvatlovchi barqaror badiiy muhitni yaratish tarafdoridir. Dubay xalqaro xattotlik ko'rgazmasi Islom san'atini asrab-avaylash, arab madaniyatining estetikasi va boyligini yoritib, uning ijodiy mazmunini dunyoga taratishga o'zining salmoqli hissasini qo'shadi”.
O'zbekiston musulmonlari idorasi
Matbuot xizmati
Saudiya Arabistonida o‘tkazilayotgan xalqaro Qur’on tanlovida 133 davlat vakillari ishtirok etmoqda
Qirol Abdulaziz nomidagi Qur’oni karimni yod olish, o‘qish va sharhlash bo‘yicha qirq oltinchi xalqaro tanlovning saralash bosqichi 7 avgust kuni Makka shahridagi musobaqalar o‘tkaziladigan joyda 133 davlatdan 334 nafar ishtirokchi (erkak va ayollar) ishtirokida boshlandi.
IQNA "Minbar" gazetasiga tayanib xabar berishicha, Qirol Abdulaziz nomidagi Qur’oni karimni yod olish, o‘qish va sharhlash bo‘yicha qirq oltinchi xalqaro tanlovning saralash bosqichi bir kun avval Makkadagi musobaqalar o‘tkaziladigan joyda boshlangan va final bosqichini Masjidul Haromda o‘tkazish uchun zamin tayyorlagan.
Saudiya Arabistoni Islom ishlari, da’vat va hidoyat vazirligi tomonidan tashkil etilgan ushbu tadbirning saralash bosqichida hakamlar hay’atlari eng yuqori aniqlik va shaffoflik standartlariga rioya qilgan holda, Qur’on tilovati uslublari va qoidalariga ixtisoslashgan taniqli xalqaro hakamlar guruhi nazorati ostida erkak va ayol ishtirokchilarning chiqishlarini tinglab, final bosqichiga kimlar o‘tishini aniqladi.
Tanlovning joriy bosqichi 133 mamlakatdan 334 nafar ishtirokchi (erkak va ayollar) ishtirokida o‘tkazilmoqda, ular besh toifa: "Shatibiya" usuli bo‘yicha yetti xil qiroat asosida Qur’oni Karimni to‘liq yodlash (qiroat va nazariy bilimlarni, shuningdek, tajvid qoidalarini a’lo darajada bajarish va rioya qilishni o‘z ichiga oladi); a’lo darajada ijro etish, tajvidga rioya qilish va so‘zlarni sharhlash bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan ketma-ket o‘n beshta juzni yodlash; a’lo darajada ijro etish va tajvidga rioya qilish bilan ketma-ket beshta juzni yodlash bo‘yicha bellashmoqda.
Vazirlik ushbu global qur’oniy tadbirning muvaffaqiyatini ta’minlash uchun elektron hakamlik tizimini joriy etish, ishtirokchilarni baholashda adolat va aniqlikni ta’minlash uchun tashkiliy va keng qamrovli platformani yaratish, shuningdek, ularga turli xil xizmatlarni taqdim etish kabi barcha imkoniyatlarini ishga solishda davom etadi.
Qirol Abdulaziz nomidagi xalqaro musobaqa dunyodagi eng yirik Qur’on musobaqalaridan biri hisoblanib, uning umumiy pul mukofotlari miqdori 10 million saudiya rialidan oshadi.
Mazkur musobaqada O‘zbekiston sharafini "Mir Arab" o‘rta maxsus islom ta’lim muassasasi, "Sayyid Muhiddin maxdum" o‘rta maxsus islom ta’lim muassasasi, Imom Buxoriy nomidagi Toshkent islom instituti hamda "Xadichai Kubro" qizlar o‘rta maxsus islom bilim yurti talabalari himoya qilishi haqida avval xabar berilgan edi.
O‘zbekiston musulmonlari idorasi Matbuot xizmati
