Ikki muqaddas masjid tezyurar poyezdining tashish qobiliyati oshirildi
Saudiya Temir yo'llari tashkiloti Haj ziyorati oldidan "Ikki muqaddas masjid" tezyurar poyezdining tashish qobiliyatini 100 ming o'ringa oshirishini ma'lum qildi. Bu haqda IQNA Arab Business agentligiga tayanib xabar berdi.
SAP ushbu raqamning qo'shilishi bilan bu yo'nalishdagi umumiy yo'lovchi sig'imi joriy yilda 1,6 million yo'lovchiga etishini aytdi.
Ikki Muqaddas Masjid tezyurar temir yo'li Jidda (Sulaymoniya) asosiy bekati, Jiddadagi Malik Abdulaziz xalqaro aeroporti va Malik Abdulloh iqtisodiy shahrini o'z ichiga olgan beshta bekat orqali o'tib, Makka va Madina shaharlarini bog'laydi.
Ikki Muqaddas masjid poyezdlaridagi o'rindiqlarning ko'payishi bu yil Haj mavsumida hojilarni olib ketayotgan reyslar soni sezilarli darajada oshgani bilan bog'liq.
Joriy yilda parvozlar soni o'tgan yilga nisbatan 430 reysga ko'payishi kutilmoqda. Ikki Muqaddas Masjid tezyurar temir yo'li soatiga 300 km tezlikka ega bo'lgan dunyodagi o'nta tezyurar poyezdlardan biri bo'lib, 35 ta poyezddan iborat va har bir vagon 417 o'rindiqdan iborat.
Ushbu elektropoyezd nol' uglerod chiqindilari bilan ekologik jihatdan ham mos keladi. U muqaddas Makka va Madina shaharlari orasidagi masofani 2 soatu 10 daqiqada bosib o'tadi.
Saudiya Arabistoni rasmiy axborot agentligi (WAS) "Ikki muqaddas masjid" poyezdini o'z dizaynida Madina munavara va Makka mukkarama tarixiy joylaridan ilhom olib, mamlakat va Yaqin Sharqdagi eng yirik transport loyihasi sifatida ta'riflaydi.
2009 yilda boshlangan loyiha 2018 yilda Jidda shahrida Saudiya Arabistoni qiroli Salmon bin Abdul Aziz Ol Saud tomonidan ochilgan va har yili 60 million yo'lovchiga xizmat ko'rsatishni maqsad qilingan.
O'zbekiston musulmonlari idorasi
Matbuot xizmati
Buni shukr deb bo‘ladimi?
Behisob pul va boyliklarni chekish-ichish, kayfu safo uchun sarf qilish – Allohga shukr qilishmi?!
Yoshlik davrini zino va harom ishlar bilan o‘tkazish – Allohga shukr qilishmi?!
Telefon orqali o‘zgalarga zarar yetkazish, har xil bo‘lmag‘ur ishlarda foydalanish – Allohga shukr bo‘ladimi?!
Yeguliklarni chiqindi qutisiga tashlash, uvolni bilmaslik – Allohga shukr qilishmi?!
Zakotni o‘z vaqtida ado etmaslik, sadaqadan tiyilish – Allohga shukr qilish deganimi?!
Internetda foydasiz narsalar uchun vaqt ajratish, vaqtni bekorga zoye qilish – Allohning bergan ne’matlariga shukr qilishmi?!
Axir Alloh taolo bizlarga shukr qilishni va U Zotning fazlini e’tirof qilishga buyurgan-ku: «Bas, Meni yod etingiz, (Men ham) sizlarni yod eturman. Menga shukr qilingiz, noshukrchilik qilmangiz!»[1].
Qolaversa, Alloh taolo shukr qiluvchilarni azoblamasligi xabarini ham bergan: «Agar shukr qilsangiz va iymon keltirsangiz, Alloh sizlarni nega azoblasin?! Alloh shukrni qabul etguvchi va bilguvchi Zotdir»[2].
Shukr – Alloh taolo ato etgan ne’matlarning davomli bo‘lishining garovidir: «Yana Parvardigoringiz bildirgan (bu so‘zlar)ni eslangiz: “Qasamki, agar (bergan ne’matlarimga) shukr qilsangiz, albatta, (ularni yanada) ziyoda qilurman. Bordi-yu, noshukrchilik qilsangiz, albatta, azobim (ham) juda qattiqdir”»[3]. «...Agar shukr qilsangiz (va iymon keltirsangiz) U Zot sizlar uchun rozi bo‘lur...»[4].
Bu dunyoda borligimizga shukr qilish – ota-onalarimizga yaxshilik qilishimizdadir. Zero, Rasululloh sollallohu alayhi vasallam: “Allohning roziligi – ota-onaning rizosidadir” [5], deganlar.
Qarindoshchilik munosabatlarini yo‘lga qo‘yish, ular bilan bordi-keldi qilish, uzilgan rishtalarni tiklash ham Alloh bizga qarindosh, yaqinlar bergani ne’matining shukridir. Nabiy alayhissalom bu borada: “Rizqida kengchilik bo‘lishi, ajali ortga surilishi kimni xursand qilsa, qarindoshchilik aloqalarini bog‘lasin”, deganlar[6].
Sadaqa berish – Alloh bizni mol-dunyo bilan siylagani uchun shukr qilish demakdir. Sadaqa Alloh taoloning g‘azabini o‘chiradi. Nabiy alayhissalom: “Maxfiy qilingan sadaqa Yaratganning g‘azabini o‘chiradi. Qarindoshchilik aloqalarini bog‘lash umrni uzaytiradi. Yaxshilik qilish yomon o‘lim topishdan asraydi”, [7] deganlar.
Hasson Shamsiy Poshoning
“Jannat bo‘stonidagi oilaviy oqshomlar” nomli kitobidan
G‘iyosiddin Habibulloh, Ilhom Ohund, Abdulbosit Abdulvohid tarjimasi.
[1] Baqara surasi, 152-oyat.
[2] Niso surasi, 147-oyat.
[3] Ibrohim surasi, 7-oyat.
[4] Zumar surasi, 7-oyat.
[5] Ibn Hibbon rivoyati.
[6] Imom Buxoriy rivoyati.
[7] Imom Tabaroniy rivoyati.