Makka shahri Hiro tarixiy g‘ori joylashgan tog‘ Jabal an-Nur (Nur tog‘i) etagida madaniy markazni yaratishni rejalashtirmoqda, deb xabar bermoqda Saudi Gazette sayti.
Shahar hokimi Muhammad Quvayhasning aytishicha, avval tog‘ va uning atrofi yozuv, graffiti, xarobalar va boshqa shu kabi narsalardan tozalanadi. "Markaz Muqaddas Makka shahri va Hiro g‘ori haqida hujjatlashtirilgan va ishonchli ma’lumotlarni taqdim etadi",- deya al-Arabiya shahar hokimi so‘zlaridan iqtibos keltiradi.
Hiro g‘ori butun dunyo musulmonlari uchun katta ahamiyatga ega bo‘lib, Haj va Umra davomida bu yerga ko‘plab ziyoratchilar tashrif buyuradilar. Unda Muhammad (sav) payg‘ambarlik vazifasi topshirilgunga qadar ham uzlatda yolg‘iz qolish istagida bo‘lganlar. Bu yerda u Zot hayotning ikir-chikirlaridan, odamlarning mayda-chuyda tashvishlaridan uzilib, to‘liq bir oy «muroqaba» va «tahannus» ibodatlari bilan mashg‘ul bo‘lar hamda yo‘lovchi miskinlarga taom berar edilar. "Islomosfera" ga ko‘ra, bu yerda ular Farishta Jabroil ularga keltirgan birinchi vahiyni – Al-Alaq surasining dastlabki besh oyatini olganlar.
Al-Quvayhasning so‘zlariga ko‘ra, hozirgi kunda tog‘ etaklarini egallab turgan barcha tartibsiz obyektlar demontaj qilinadi. "G‘or joylashgan tog‘ tepasiga ko‘tarilishni va undan tushishni osonlashtirish uchun zinalar quriladi. Mehmonlarning xavfsizligini ta’minlash va tog‘ni Islom tarixida katta ahamiyatga ega bo‘lgan tabiiy maskan sifatida saqlab qolish uchun barcha zarur chora-tadbirlar ko‘riladi", - deydi u.
Shahar hokimi ba’zi mehmonlar noto‘g‘ri amaliyotlarga olib keladigan tog‘ haqida to‘g‘ri ma’lumotga ega emasligini ta’kidladi. "Madaniyat markazi tog‘ning o‘tmishi va payg‘ambarlik missiyasi haqidagi tarixiy hujjatlar bilan birga, ishonchli to‘g‘ri axborot manbai bo‘ladi. Markaz islomgacha bo‘lgan davrdan to hozirgi kungacha tog‘ va g‘or tarixini namoyish etadi ",- deydi Al-Quvayhas.
Jabal an-Nur bu Kaabadan 4 kilometr uzoqlikda joylashgan. Uning balandligi bor-yo‘g‘i 640 metrni tashkil etadi, lekin ko‘tarilish taxminan ikki soat davom etadi. Hiro g‘ori uning shimoli-sharqiy yonbag‘rida joylashgan.

O‘zbekiston musulmonlari idorasi matbuot xizmati