Sayt test holatida ishlamoqda!
19 Mart, 2025   |   19 Ramazon, 1446

Toshkent shahri
Tong
05:10
Quyosh
06:28
Peshin
12:36
Asr
16:46
Shom
18:37
Xufton
19:50
Bismillah
19 Mart, 2025, 19 Ramazon, 1446

Zuho (choshgoh) namozi va uni o‘qish tartibi

22.05.2020   14339   10 min.
Zuho (choshgoh) namozi va uni o‘qish tartibi

Nomlanishi: Zuho namozi manbalarda turli nomlar bilan zikr qilingan bo‘lib, ko‘proq “Ishroq namozi”, “Shuruq namozi”, “Avvobiyn namozi” va “Choshgoh namozi” deb yurtiladi.

Hukmi: Zuho namozini ado etish nafl amal sanaladi. Nafl deb, kishini o‘z ixtiyori bilan farzga qo‘shimcha tarzda bajaradigan amaliga aytiladi. Ya’ni, Zuho namozi – bir kunda besh mahal ado etilishi majburiy bo‘lgan farz namozlarini to‘ldiruvchi, ixtiyoriy suratda ado etilsa, ulkan savob bo‘ladigan namoz hisoblanadi.    

Vaqti:

- Bu namozning vaqti quyosh bir nayza bo‘yi ko‘tarilganda, ya’ni quyosh chiqqandan taxminan 20 daqiqa keyin boshlanadi.

- Oxirgi vaqti esa kun tikkaga kelgan vaqtdan bir soat avvalgi vaqtgacha hisoblanadi. Ushbu ikki vaqt oralig‘ida Zuho namozini ado etish mumkin.

Rakatlari soni: Zuho namozi ikki rakatdan sakkiz rakatgacha o‘qish mumkin. Eng afzali to‘rt rakatdan o‘qishdir. Chunki Rasululloh sallallohu alayhi vasallam ko‘proq to‘rt rakatdan o‘qiganlari Oisha raziyallohu anhodan naql qilingan. Zuho namozida ma’lum suralarni o‘qish shart qilinmagan. Ushbu namoz ovoz chiqarmasdan maxfiy, yolg‘iz holatda o‘qiladi

Fazilati: Zuho namozining fazilatiga doir ko‘plab hadisi shariflar vorid bo‘lgan. Jumladan, Muoz ibn Anas al-Juhaniy raziyallohu anhudan rivoyat qilinadi: “Rasululloh sallallohu alayhi vasallam: “Kim bomdod namozini o‘qib bo‘lganidan keyin namoz o‘qigan joyida to zuho namozini o‘qiguncha o‘tirsa, faqat yaxshilikdan boshqani gapirmagan bo‘lsa, uning xatolari, agar dengiz ko‘pigidan ko‘p bo‘lsa ham mag‘firat qilinadi”, deganlar” (Imom Abu Dovud va Imom Termiziy rivoyatlari).

Abu Hurayra raziyallohu anhudan rivoyat qilinadi: “Rasululloh sallallohu alayhi vasallam: “Kim zuho namozini bardavom o‘qisa, uning gunohlari dengiz ko‘pigicha bo‘lsa ham mag‘firat qilinadi”, dedilar” (Imom Termiziy rivoyatlari).

Abu Zar roziyallohu anhudan rivoyat qilinadi: “Rasululloh sallollohu alayhi vasallam: “Sizlarning har bir a’zoingizga sadaqa vojibdir. Har bir tasbihingiz – sadaqa, har bir hamd aytishingiz – sadaqa, har bir tahlilingiz (“La ilaha illalloh”, deyishingiz) – sadaqa, har bir takbiringiz – sadaqa, yaxshilikka buyurishingiz – sadaqa, yomonlikdan qaytarishingiz – sadaqa. Endi bularning hammasi uchun ikki rakat zuho namozini o‘qishingiz kifoyadir”, - dedilar (Imom Muslim rivoyatlari) 

Zuho namozini o‘qish tartibi: 

Namozga kirishish:

- Namozni boshlashdan avval quyidagicha niyat qilinadi: “To‘rt rakat zuho namozini xolis Alloh uchun o‘qishni niyat qildim”.

- Keyin ikki qo‘lni quloqning yumshoq joyiga olib borib, “Allohu akbar” deb namozga kiriladi.

- Keyin qo‘llar tushirilib, kindik ostida bog‘lanadi.

Birinchi rakat:

- Qo‘llar bog‘langandan keyin quyidagi “Sano” duosini o‘qiydi: “Subhaanakallohumma vabihamdika vatabaaro kasmuka vata’aalaa jadduka valaa ilaaha g‘oyruk”.

- So‘ng “A’uzu” va “Bismillah”ni aytib, “Fotiha” surasini o‘qiydi.

- Keyin “omiyn” deydi.

- So‘ngra o‘zi yaxshi bilgan bir surani zam sura sifatida o‘qiydi.

- Keyin “Allohu akbar” deb, ruku qiladi.

- Rukuda uch marta “Subhaana robbiyal ’azim”, deyiladi.

- So‘ngra “Sami’allohu liman hamidah”, deb boshini rukudan ko‘tarib, yana tik turiladi.

- Keyin “Robbanaa lakal hamd”, deb biroz tik turadi

- Keyin “Allohu akbar” deb sajdaga boradi. Sajdada uch marta “Subhana robbiyal a’laa”, deydi.

- Sajdadan “Allohu akbar” deb qaytib, xotirjam holatda, qo‘llarini sonini ustiga qo‘yib o‘tiradi

- Keyin yana “Allohu akbar” deb yana bir marta sajda qiladi. Unda ham uch marta “Subhana robbiyal a’laa”ni aytadi.

Keyin “Allohu akbar” deb ikkinchi rakatga turadi.

Ikkinchi rakat:

- Ikkinchi rakat ham birinchisi kabi bo‘ladi. Faqatgina ikkinchi rakatda “Sano” o‘qilmaydi, “A’uzu” aytilmaydi.

- Namozxon ikkinchi rakatda ikki marta sajda qilib bo‘lgandan keyin o‘tiradi va “Attahiyyat” duosini o‘qiydi.

- Keyin “Allohu akbar” deb uchinchi rakatga turadi.

Uchinchi rakat:

- Uchinchi rakatda ikkinchi rakatda nima qilgan bo‘lsa shuni bajaradi.

- Uchinchi rakatning ikki marta sajdasidan keyin o‘tirmasdan to‘rtinchi rakatga turadi.

To‘rtinchi rakat:

- To‘rtinchi rakatda uchinchi rakatda nima qilgan bo‘lsa, shuni qiladi.

- To‘rtinchi rakatning ikki sajdasini bajargandan keyin o‘tiradi va “Attahiyyat” duosini o‘qiydi.

- Keyin “Allohumma soli ’alo...” va “Allohumma borik ’alo...” salavotlarini o‘qiydi.

- Mazkur ikki salavotdan keyin “Allohumma mag‘firli...” yoki “Robbanaa aatinaa fid dunya...” duolaridan birini o‘qiydi.

- Keyin avval o‘ng yelkasiga qarab, “Assalamu alaykum va rohmatulloh” deb salom beradi.

- Keyin chap yelkasiga qarab “Assalamu alaykum va rohmatulloh”, deb salom beradi.

Shu bilan to‘rt rakatli zuho namozi ado etilgan hisoblanadi.

 

2020 yil Ramazon hayiti kunidagi zuho namozini o‘qish vaqti

O‘zbekiston musulmonlari idorasi ulamolari tomonidan Islom dini manbalari va astronomik ma’lumotlarga tayangan holda Ramazon hayitining birinchi kuni 2020 yil 24 may, yakshanba kuniga to‘g‘ri kelishi haqida xulosa qilindi.

Shunga ko‘ra, 2020 yil 24 may yakshanba kuni Zuho namozi Toshkent vaqti bilan 05:20 da, boshqa joylarda namoz vaqtidagi tafovutni inobatga olib o‘qiladi.

Alloh taolo Ramazon hayiti kunidagi Zuho namozimizni barchamizdan qabul aylab, bu kunning sharofati bilan yurtimizni fayzu barakotga to‘ldirsin! 

Zuho namozini viloyatlarda o‘qiladigan vaqtlari

Viloyat

Namoz vaqtlari

1.     

Namangan viloyati

05:10

2.     

Andijon viloyati

05:10

3.     

Farg‘ona viloyati

05:10

4.     

Toshkent shahri

05:20

5.     

Toshkent viloyati

05:25

6.     

Sirdaryo viloyati

05:25

7.     

Jizzax viloyati

05:30

8.     

Samarqand viloyati

05:30

9.     

Surxondaryo viloyati

05:30

10. 

Qashqadaryo viloyati

05:35

11. 

Buxoro viloyati

05:40

12. 

Navoiy viloyati

05:40

13. 

Xorazm viloyati

05:55

14. 

Qoraqolpog‘iston Respublikasi

06:30

 

Eslatma: Ushbu jadvalda ko‘rsatilgan vaqtlar quyosh chiqqanidan keyin 20-25 daqiqalik farqni inobatga olib belgilandi.

 

O‘zbekiston musulmonlari idorasi Fatvo hay’ati

Maqolalar
Boshqa maqolalar
Maqolalar

“Al-Azhar” shayxi Ahmad Toyyib islomofobiyaga qarshi kurashishga chaqirdi

18.03.2025   5970   2 min.
“Al-Azhar” shayxi Ahmad Toyyib islomofobiyaga qarshi kurashishga chaqirdi

  “Al-Azhar” shayxi doktor Ahmad Toyyib Birlashgan Millatlar Tashkiloti Bosh Assambleyasining Islomofobiyaga qarshi kurashish xalqaro kuni munosabati bilan o‘tkazilgan yig‘ilishida jahon hamjamiyatini islomofobiyaga qarshi kurashishga chaqirdi. U ushbu tadbirda so‘zlagan nutqida shayx at-Toyyib islomofobiyani aqlga zid va mantiqsiz mafkura sifatida ta’riflab, uni jahon tinchligiga haqiqiy tahdid keltiradi, deya baholadi.
 

  “Al-Azhar” shayxi doktor Ahmad Toyyib ma’ruzasi davomida BMT Bosh kotibi Antonia Guterrishning Islom haqidagi xolis va jasoratli so‘zlarini yuqori baholab, bunday bayonotlar islomofobiyaga qarshi kurashda muhim ahamiyatga ega ekanini ta’kidladi. U, shuningdek, ayrim o‘ng qanot ekstremistik guruhlarning Islomga nisbatan noto‘g‘ri tasavvurlarni populistik maqsadlarda suiste’mol qilishga urinishlarini qoraladi.


   Shayx at-Toyyibning ushbu chaqiriqlari islomofobiyaga qarshi xalqaro miqyosdagi sa’y-harakatlarni kuchaytirish va dinlararo hurmat hamda hamjihatlikni mustahkamlashga qaratilgan.


      O‘z navbatida Misr muftiysi va Jahon fatvo muassasalari Bosh kotibi, doktor Nazir Ayyodning ta’kidlashicha, islomofobiyaga qarshi kurash jamiyat tinchligini saqlash va xalqlar o‘rtasida hamjihatlik hamda bag‘rikenglik qadriyatlarini mustahkamlash uchun dolzarb masaladir. Mazkur oqimga qarshi kurashish musulmonlar ziddiga nafrat qo‘zg‘atuvchi har qanday so‘zlar va fikrlarga qarshi xalqaro hamkorlikdagi sa’y-harakatlar olib borishni talab qiladi.


     Har yili 15 mart kuni nishonlanadigan “Islomofobiyaga qarshi kurash xalqaro kuni” munosabati bilan so‘zlagan nutqida, doktor Nazir Ayyod islomdan qo‘rqish hodisasining tarqalishi va musulmonlarga qarshi bo‘lgan yolg‘on ma’lumotlar hamda nafrat qo‘zg‘atuvchi kampaniyalarning kuchayishi katta muammo ekanini ta’kidladi. Bu esa noto‘g‘ri tushunchalarni to‘g‘rilash, dinlar va madaniyatlar o‘rtasida muloqotni kuchaytirish, rahm-shafqat, tinchlik va osoyishtalikda yashashga chaqiruvchi islomiy qadriyatlarni tarqatish ustida ishlashni talab etadi. 


    Doktor Nazir Ayyodning ta’kidlashicha, Misr Fatvo hay’ati va Jahon fatvo muassasalari bosh kotibiyati bu borada faol ish olib bormoqda. Ular ichida ekstremizm va islomofobiyaga qarshi kurashish bo‘yicha “Salam” tadqiqotlar markazi orqali maxsus tadqiqotlar va izlanishlar olib borish, xalqaro konferensiyalar va seminarlar o‘tkazish, xalqlar o‘rtasida tushunish va hamkorlik ko‘priklarini qurishga qaratilgan tashabbuslarni amalga oshirish kabi ishlar mavjud.

            
Manbalar asosida

Ilyosxon Ahmedov tayyorladi.

“Al-Azhar” shayxi Ahmad Toyyib islomofobiyaga qarshi kurashishga chaqirdi
MAQOLA