Mukammal Islom dini jamiyat uchun zarar bo‘lgan barcha amallarni gunohlar sarasiga qo‘shdi. Hattoki, bunday amallarning oz miqdordagisiga ham ruxsat bermadi. Balki, bunday gunohlarga nisbatan qattiq jazolar, ma’lomat va xatarlar borligini takror-takror eslatdi. Ba’zilarini Qur’on bilan, ba’zilarini esa Rosululloh sollallohu alayhi vasallamning sunnatlari bilan xarom qildi. Mo‘minlarni bu jirkanch ishlarni qilishdan qaytardi.

Mana shunday qaytarilgan amallardan biri bu – poraxo‘rlik ya’ni, zamonaviy til bilan aytganda korrupsiyadir. Poraxo‘rlikning xatari, unga berilgan jazo va malomatning miqdorini ushbu qisqagina hadis orqali bilishimiz mumkin. Mashhur sahobalardan bo‘lgan Savbon roziyallohu anhu aytadilar: “ Rosululloh sollallohu alayhi vasallam pora beruvchi, pora oluvchi va ularning o‘rtasidagi vositachini la’natladilar”. (Imom Ahmad rivoyati)

Rosululloh sollallohu alayhi vasallamning hayotlaridan ozgina xabari bor inson biladiki, u zot muomala va axloqda tengsiz edilar. U kishining muborak zabonlaridan har xil fahsh, malomat, ta’na va la’nat so‘zlari chiqmas edi. O‘zlariga berilgan turli ozorlarga, ozor bergan kimsalarga ham duoyibad, qarg‘ish yoki la’nat so‘zlarini aytmaganlar.

Biroq, poraxo‘rlik shunday illatki, uning gunohi shu qadar ulkanki, shuning uchun Rosululloh sollallohu alayhi vasallam  pora berganni ham, olganni ham va hatto  ularning o‘rtasida  vositachi bo‘lib turgan insonni ham  la’natladilar. Bu bejiz emas albatta. Buning o‘z sabablari bor.

Ba’zi gunohlarning zarari faqat o‘z sohibiga tegadi. Boshqalar uchun zarar keltirmaydi. Yana ba’zi gunohlar borki, uning zarari sanoqli kishilargagina ta’sir qiladi. Va yana shunday gunohlar, illatlar borki, ularning oqibati butun jamiyatga zarar keltiradi. Insonlarnig kelajagiga, millatning va yurtlarning rivojlanishiga to‘g‘anoq bo‘ladi. Poraxo‘rlik ham aynan shunday, butun jamiyatga va kelajakka zarar keltiruvchi gunohlar sarasiga kiradi.

Qolaversa, poraxo‘rlik Alloh taoloning bir nechta farzlariga e’tiborsiz bo‘lishga, ularga amal qilmaslikka, bir qancha gunoh amallarning sodir bo‘lishiga yo‘l ochadi. Masalan, birgina ta’lim sohasidagi korrupsiya ilm-fan va ma’rifatga zarba beradi. Pora evaziga o‘qishga kirgan, pora evaziga imtihondan o‘tgan talaba uchun ilmning qiymati bo‘lmaydi. Balki, u talabada “pul ilmdan ko‘ra kuchliroq vositadir”, degan tasavvur paydo bo‘ladi. bu esa o‘z navbatida, “ilm olish farz” degan buyruqqa nisbatan e’tiborni yo‘qqa chiqaradi. Jamiyatda o‘z sohasining bilimdonlari kamayishiga, bu sabab insonlar orasida murosa va xotirjamlik yo‘qolishiga, turli xil qiyinchiliklarning yuzaga kelishiga olib keladi. Poraxo‘rlik kishilar o‘rtasida adolat qilishga to‘sqinlik qiladi. Kimlargadir zulm qilishga yo‘l ochadi. Kishilarda adolatga, ezgulikka, jamiyat va davlatga nisbatan ishonchsizlik paydo bo‘lishiga hamda bundan boshqa judayam ko‘p illatlarning yuzaga chiqishiga sabab bo‘ladi. Aynan shuning uchun ham, Rosulimiz Muhammad sollallohu alayhi vasallam poraga, korrupsiyaga aloqador bo‘lgan barcha kishilarni eng og‘ir so‘z bo‘lgan la’nat bilan zikr qildilar.

Bugun davlatimiz, xususan yurtboshimiz tomonidan korrupsiyaga qarshi qattiq kurash yo‘lga qo‘yildi. Jazolar va nazoratlar kuchaytirildi. Bu albatta quvonarli xol. Chunki, davlat rahbarining talabi Rosululloh sollallohu alayhi vasallamning talabi bilan, Alloh taoloning talabi bilan muvofiq tushmoqda. Maqsadlar bir nuqtada birlashmoqda. Demak, yurtboshimizning maqsadi ham aynan jamiyatning rivoji, adolat va shaffoflikni ta’minlash, zulm va nohaqliklarga barham berishdir. Bu yo‘lda barchamiz bir yoqadan bosh chiqarishimiz kerak. O‘zini mo‘min sanagan, din, millat, yurt va jamiyat rivoji uchun befarq bo‘lmagan har qanday shaxs korrupsiyaga qarshi birlashib harakat qilmog‘i lozim bo‘ladi. zero, Robbimiz bizni shunga buyurgan: “Yaxshilik va taqvo yo‘lida hamkorlik qiling. Gunoh va dushmanlik yo‘lida hamkorlik qilmang”. (Moida surasi, 2-oyat)

Azizlar! Robbimiz chaqirgan hamkorlikka sizlarni ham qo‘shilishingizni istayman. Unutmang! Bu hamkorlikdan hech kim zarar ko‘rmaydi.

Olmazor tumanidagi “Mevazor” masjidi imom noibi: Islomov Yorbek