Bugun, 10 dekabr kuni O‘zbekiston musulmonlari idorasi raisi, muftiy Usmonxon Alimov hazratlari va Din ishlari bo‘yicha qo‘mita raisi Abdug‘ofur Ahmedovning Buxoroi sharif bo‘ylab safarlari boshlandi. Tashrifning avvali Bahouddin Naqshband majmuasidan boshlandi. Taomilga binoan o‘tganlarning ruhi poki haqiga Qur’on tilovat qilindi.
Muftiy hazratlari yurtimizning bir qator hududlarida bo‘lib, muhtaram Prezidentimiz tashriflari chog‘ida berilgan sohaga tegishli bir qator topshiriqlarning ijrosi, diniy-ma’rifiy sohada olib borilayotgan ishlar ko‘lami bilan tanishmoqdalar. Safarlar doirasida aholi vakillari bilan uchrashuvlar, turli xayriya va saxovat tadbirlari ham tashkil etilmoqda. Bu galgi safarda ham mana shunday ishlarga katta urg‘u berildi.
Ma’lumki, Prezidentimizning 2017 yil 1 iyuldagi “Abduxoliq G‘ijduvoniy tavalludining 915 yilligini va Bahouddin Naqshband tavalludining 700 yilligini nishonlashga tayyorgarlik ko‘rish hamda uni o‘tkazish to‘g‘risida”gi farmoyishiga binoan bugun Buxoro ulkan bunyodkorlik maydoniga aylandi.
Davlatimiz rahbari shu yil 16 fevral kuni Buxoro viloyatiga tashriflari chog‘ida ulamoyu fuzalolar, aziz avliyolar mangu qo‘nim topgan maskanlarni yanada obod etib, bu joylarda ziyoratchilar uchun zarur sharoitlar yaratish borasida mutasaddilarga berilgan ko‘rsatmalar ijrosi bo‘yicha rejali ishlar qilinayotganiga guvoh bo‘lindi.
Ayni paytda yetti pir – Abdulxoliq G‘ijduvoniy, Muhammad Orif Revgariy, Mahmud Anjir Fag‘naviy, Xoja Ali Romitaniy, Muhammad Boboyi Samosiy, Sayyid Amir Kulol va Bahouddin Naqshband me’moriy majmualari yanada obod qilinyapti.
Buxoro safari jarayonlarini saytimizda kuzatib boring.

O‘zbekiston musulmonlari idorasi Matbuot xizmati