Bugungi kun imom-xatibi ham mana shunday rivojlanish, yangilanish, islohatlar bo‘lgan bir davrda bir joyda turib qolishi aslo mumkin emas. Zero dinimizda ham yangilanish, rivojlanishga intilib yashashlik ko‘rsatmalari bir necha bor ta’kidlangan.

Imom-xatiblarning kasbiy mahoratini oshirish, masjid ish yuritish hujjatlari, moliyaviy va xo‘jalik ishlari, imomlarning voizlik mahorati hamda ularning hozirgi kun talablariga javob bera oladigan shaxs sifatida shakllantirish maqsadida joriy yilning 30 oktyabr kuni Andijon viloyati Oltinko‘l tumanidagi "Oltinko‘l" jome masjidida sayyor seminar o‘tkazildi. Bu haqda viloyat vakilligi mas’ullari xabar berdi.

Seminarda viloyatning barcha shahar va tuman bosh imom-xatiblari hamda Oltinko‘l tumanida faoliyat ko‘rsatib kelayotgan imom-xatiblar ham ishtirok etdi. Dastavval, rejaga ko‘ra, barcha shahar va tuman bosh imom-xatiblari tumandagi masjidlarning hozirgi kundagi holati, obodonchiligi, ish yuritish jihatlarini o‘rgandilar.

Ushbu o‘rganishlarning xulosalari bildirildi. Oltinko‘l tumanidagi masjidlar faoliyatiga doir hujjatlaridagi ba’zi kamchiliklar yuzasidan bayonotlar berildi.
Shuningdek, diniy soha faoliyatini yanada rivojlantirish borasidagi tumanning ish tajribalari boshqa tumanlarga ham tadbiq qilinishligi kelishib olindi. Majlis so‘nggida mana shunday sayyor seminarlar reja asosida viloyatning har bir tumanida ham o‘tkazib borilishiga kelishib olindi.

O‘zbekiston musulmonlari idorasi Matbuot xizmati