Makka shahrida haj ibodatini bajarishga hozirlik ko‘rayotgan yurtdoshlarimiz har kuni O‘zbekiston musulmonlari idorasi raisi, muftiy Usmonxon Alimov hazratlarining ma’rifiy suhbatlaridan bahramand bo‘lmoqda.
Makka shahridagi peshin paytidagi havoning issiqligi va Harami sharifdagi izdixom tufayli o‘zbekistonlik ziyoratchilar joylashgan “Abroj al-Hidoya” mehmonxonasida ham namozxonalar hozirlangan va ziyoratchilarimiz Harami sharifga borolmagan paytlarda namozlarini shu yerlarda jamoat bo‘lib o‘qib olishlari mumkin.
Muftiy hazratlari mana shunday namozlardan keyin ziyoratchilar bilan suhbat qurib, har bir ziyoratchi haj amallarini to‘la-to‘kis ado etishi va hojilik maqomiga munosib bo‘lishi uchun nimalarga e’tibor qaratishi zarurligini so‘zlab bermoqdalar.
Hazrati Payg‘ambarimiz sollallohu alayhi vasallamning hadisi shariflarida Yaratganning roziligi yo‘lida, riyo va gunohlardan xoli bo‘lgan, husni xulq ila ado etilgan mabrur hajning mukofoti jannat ekani va bunday inson gunohlardan pok bo‘lishi xushxabari berilganini muftiy hazratlari bayon qilib berdilar.
Mamlakatimizdagi 33 milliondan ziyod aholi orasidan saralanib kelgan va muqaddas zaminda haj ibodatini ado etishga chog‘langan yurtdoshlarimiz bunday saodatli kunlar uchun shukronalar aytib, Yaratgandan yurtimizga qut-baraka, xalqimizga baxt-saodat, farzandlarimizga nurli kelajak so‘rab duolar qilmoqdalar.

O‘zbekiston musulmonlari idorasi Matbuot xizmati