Xorazm viloyati Gurlan tumani bosh imomi, “Qora Alam Bobo” jome masjidi imom-xatibi Mahmudjon Habibullayev Gurlan tumani Fidokor mahallasida yashovchi Qutlimuratovlar oilasiga o‘z hisobidan yangi uy qurib berdi. Mazkur oila hududdagi ijtimoiy himoyaga muhtoj oilalardan biri bo‘lib, yashab turgan xonadoni nochor holatda, uyning shifti, pollari yaroqsiz ahvolda edi. Uning ustiga, gaz, elektr tokidan katta miqdordagi qarzdorligi sababli tarmoqdan uzib qo‘yilgan edi. Imom-xatib eski uyning yonidan alohida binoda 5 xonalik yangi uy qurib bergan, kommunal to‘lovlardan ham qarzlarini to‘lab bergan.
Aslida bu xabar, mazkur xonadon sohibi, uch farzandning otasi Umrbek Qutlimurodovning Diniy idoraga Mahmudjon Habibullayev nomiga yozilgan Tashakkurnoma xatidan so‘ng ma’lum bo‘ldi.
Tashakkurnoma xatida: “Bosh imom Mahmudjon aka bizlarni zax, ko‘rimsiz joydan xalos qilib, o‘z hisobidan besh xonali zamonaviy tartibda uy solib berdi. Biz farzandlarimiz bilan har kuni ertalab qo‘limizni duoga ochib, u kishini uzoq umr ko‘rishini, qilayotgan xayrli va savobli ishlari Qodir Alloh huzurida o‘zlariga soyabon bo‘lishini istab qolamiz, deya mamnuniyat so‘zlari bitilgan.
Biz bu masala bo‘yicha biz imom domla bilan bog‘langanimizda kamtarlik bilan: “Ha, o‘tgan yili qish oylarida xonadonning og‘ir sharoitini ko‘rib, Alloh qodir qilsa, shu oilaga yangi uy qurib berishni niyat qilgan edik, yozga chiqib, shu ish nasib bo‘ldi va tez fursatda uy ham bitdi, dedilar.
Alloh roziligi, xalq xizmati yo‘lida qilnayotgan bu kabi ishlar ko‘payaversin.
O‘zbekiston musulmonlari idorasi Masjidlar bo‘limi
O‘tgan solih zotlar jamoat bilan namoz o‘qiyolmay qolsalar, bir-birlariga ta’ziya izhor qilishar ekan. Shunday zotlardan biri Hotamul Asom aytadi: “Men jamoatga ulgurmay qoldim, shunda menga Abu Is'hoq Buxoriyning bir o‘zi ta’ziya bildirdi. Agarda o‘g‘lim o‘lib qolsa minglab odamlar ta’ziya izhor qilishadi. Buning sababi odamlar nazdida din musibati dunyo musibatlaridan ko‘ra arzimas sanalganidandir”.
Bugungi kunda oramizda qanchalab odamlar jamoat namozlarini o‘tkazib yuboradilar, jiddiy e’tibor qaratmaydilar. Ba’zida ish, g‘am-tashvishlarning ko‘pligini bahona qilamiz, to‘g‘rimi?! Yana ko‘plar tuni bilan uxlamasdan, bomdod namoziga yaqin uxlab qolishlari ham bor gap.
Rasululloh sollallohu alayhi vasallamning “Zimistonda masjidlar sari odim tashlovchilarga qiyomat kunidagi tamomiy nurning xushxabarini beringlar”[1] deganlarini nahot eshitmagansiz?!
Shayton sizning ustingizdan g‘alabaga erishib, namozda xotirjamligingizni ketkazishiga imkon bermang!
Omir ibn Abdulloh o‘lim to‘shagida yotganlarida azon ovozini eshitib: “Meni qo‘limdan tutinglar”, dedilar. Omir ibn Abdullohga “Axir siz betobsiz-ku”, deyishganida: “Allohning chaqirig‘ini eshitib turib, unga rioya qilmaymanmi”, dedilar. Keyin u kishini qo‘lidan ushlab turg‘izishdi. Masjidda imom bilan shom namozining bir rakatini o‘qidilar va jon taslim qildilar.
Yana bir misol: Sufyon ibn Uyayna azon aytilishidan ilgari namozga borishga ishtiyoqmand bo‘lganlar va doim: “Namozga azon aytilmagunicha masjidga kelib turmaydigan yomon qul bo‘lma. Chunki yomon qul chaqirmaguningcha kelmaydi”, der edilar.
Oisha roziyallohu anho onamiz aytadilar: “Rasululloh sollallohu alayhi vasallam bilan suhbatlashib o‘tirardik, u zot ham biz bilan gaplashib o‘tirardilar. Bordi-yu, namoz vaqti kirib qolsa, bir-birimizni tanimaganday bo‘lib olardik”[2].
Shukrki, oramizda masjidda birinchi safga joylashish uchun g‘ayrat qiluvchilar ko‘payib bormoqda. Nabiy alayhissalom: “Agarda odamlar azonda va birinchi safda nimalar borligini bilishsa edi, unga erishish uchun qur’a tashlashdan boshqa chora bo‘lmasa, albatta, qur’a tashlagan bo‘lardilar”, deganlar.
Said ibn Musayyab aytadi: “Men ellik yildan beri biror marta birinchi takbirni o‘tkazib yubormaganman. Ellik yildan buyon namozda birorta kishining boshining orqasiga qaragan emasman”.
Hasson Shamsiy Poshoning
“Jannat bo‘stonidagi oilaviy oqshomlar” nomli kitobidan
G‘iyosiddin Habibulloh, Ilhom Ohund, Abdulbosit Abdulvohid tarjimasi.
[1] Imom Termiziy va Imom Abu Dovud rivoyati.
[2] Mursal hadis. Iroqiyning “Ihyo”ga yozgan taxrijiga qarang (1, 205).