O‘tgan kuni Samarqand viloyatidagi “Mahmud az-Zamaxshariy va uning al-Kashshof asari” mavzusidagi ilmiy-amaliy seminar doirasida muftiy hazratlari boshchiliklarida taniqli ulamolar, bosh imom-xatiblar, tajribali imom-xatiblar va madrasalar mudirlari Jomboy tumanida joylashgan “MAN Auto-Uzbekistan” yuk avtomashinalarini ishlab chiquvchi zavod faoliyati bilan yaqindan tanishdilar.
Ushbu tashrif chog‘ida o‘zbek-german qo‘shma korxonasi faoliyati bilan yaqindan tanishishdi hamda ushbu zavodda ishlab chiqarilayotgan texnika namunalarini ko‘rishdi. Tanishuv jarayonida mehmonlar qo‘shma korxonada zamonaviy texnologiyalar asosida ishlab chiqarilayotgan zamonaviy avtobuslar, yuk avtomobillari va maxsus avtotransport vositlarini ko‘zdan kechirishdi. Transport vositalarining texnik imkoniyatlari haqida ma’lumotlarga ega bo‘lishdi. Har tomonlama qulay, zamonaviy avtotransport vositalari mehmonlarda katta qiziqish uyg‘otdi.

Tashrif davomida mehmonlar Samarqand viloyati Payariq tumanidagi namunaviy shaklda obodonlashtirilgan “Choshtepa” qabristonini ham ziyorat qildilar.
Hazrati Payg‘ambarimiz sollallohu alayhi va sallamdan rivoyat qilingan hadislarda qabrlarni bir-biridan farq qilmagan holda bir tekis bo‘lishi, ya’ni biri baland, biri past, biri hashamdor, biri qarovsiz bo‘lishi durust emasligi bayon qilingan. Islom dini manbalarida qabr yerdan biroz ko‘tarilishi, qor va yomg‘irlarda yuvilib, cho‘kib ketmasligi uchun somon aralashtirilgan loy bilan suvab turish joizligi aytilgan.
Muhtaram Prezidentimizning qabristonlarni obod qilish va qabrlarni oddiy bo‘lishiga e’tibor qaratish borasidagi tavsiyalaridan kelib chiqib, respublikamizda joylashgan mozorlarni imkon qadar yuqorida qayd etilgan shaklda qilish borasida amaliy ishlar olib borilmoqda.
Shu bilan ilmiy-amaliy seminar doirasidagi tadbirlar yakunladi.

O‘zbekiston musulmonlari idorasi Matbuot xizmati