Quyida keltiriladigan fikrlar, hikmatlar saytlardan va ijtimoiy tarmoqlardagi turli sahifalardan olib tarjima qilingan.

*****

Momaqaldiroq gumburlaganda, hazrati Umar roziyallohu anhu: «Rahmatining ovozi shunchalik bo‘lsa, azobining ovozi qanday ekan?!» dedilar.

*****

Ayolingizga — uning dindorligi uchun uylangan bo‘lsangiz, har safar namoz o‘qiyotganini ko‘rganingizda, muhabbatingiz ziyoda bo‘laveradi.

*****

Aka-ukang senga foydasi tekkanidir. Qarindoshlikni, yaqinlikni da’vo qilgani emas.

Toriq ibn Ziyod rahimahulloh

*****

Kishining qandayligiga uning berayotgan savollaridan kelib chiqib xulosa qilish mumkin.

“Tarix muhrlagan so‘zlar”

*****

Solih inson bo‘l. Lekin buni isbotlash uchun vaqtingni zoye qilma.

“Tarix muhrlagan so‘zlar”

*****

G‘arb dori-darmon sotish uchun xalqlarning kasal bo‘lishini, oziq-ovqat sotish uchun kambag‘al bo‘lishini, qurol-yarog‘ sotish uchun ularning urushishini, bosib olib, egalik qilish uchun bo‘linishini istaydi.

“Tarix muhrlagan so‘zlar”

*****

Hatto oppoq atirgulning ham qora soyasi bor.

“Tarix muhrlagan so‘zlar”

*****

Eng zakiy inson – tinglab, fikrlab, mulohaza qilib ko‘radigan insondir.

“Tarix muhrlagan so‘zlar”

*****

Odamlarning jim turishini zaiflik deb xato o‘ylama. Donishmand, oqil insonlar o‘zlarining ulkan ishlarini ham baland ovozda aytib e’lon qilmaydilar.

“Tarix muhrlagan so‘zlar”

*****

Baxtli insonlar ichki olamlarini isloh qilish, tuzatish bilan mashg‘ul bo‘lsalar, baxtsizlar boshqalarga malomat toshlarini otish bilan ovvoradirlar.

“Tarix muhrlagan so‘zlar”

*****

- Yarim qultum suv chanqog‘ingni qondirmaydi.

- Yarim burda non ochligingni ketkazmaydi.

- Yo‘lning yarmi seni manzilga olib bormaydi.

- Yarimta fikr senga natija bermaydi.

- Yarimta degan narsa ojizlik belgisi, yarmida to‘xtash ojizlik lahzasidir.

Sen ojizmassan. Chunki, sen yarimta inson qilib yaratilmagansan.

«Tarix muhrlagan so‘zlar»

*****

Sovchi qo‘yayotgan paytda kuyovga, saylovoldi tashviqotlarini olib borayotgan paytda nomzodga ishonma.

Jalol Omir

*****

Men hech kimni yomon ko‘rmayman. Hatto meni xo‘rlagan do‘stlarimni ham. Ularni haliyam yaxshi ko‘raman. Lekin endi ularni qaytadan do‘stlikka qabul qila olmayman.

“Tarix muhrlagan so‘zlar”

*****

Aholisi kitob o‘qimaydigan shaharda bo‘rilar yetakchiga aylanadi.

“Tarix muhrlagan so‘zlar”

*****

O‘qimaydigan millatni, xalqni aldash oson.

“Tarix muhrlagan so‘zlar”

  *****

Internet materiallaridan to‘plab, tarjima qiluvchi

Nozimjon Iminjonov