Allohga shukrki, yurtimizda yangi masjidlar qurish, mavjudlarini zamonaviy ko‘rinishda qayta barpo qilish ishlari davom etmoqda. Respublikamizning bir necha hududlarida jome masjidlar milliy andozalarga usulda bunyod etilmoqda.
Bugun, 11 fevral kuni O‘zbekiston musulmonlari idorasi raisi, muftiy Usmonxon Alimov hazratlari Toshkent shahridagi “Oq uy”, Toshkent viloyatidagi “Xo‘ja”, “Nodirxon qori” va “Erbo‘ta qozi” jome masjidlarining qurilishi boshlanishida qatnashdilar.
Muftiy hazratlari dastlab Toshkent shahri Mirobod tumanidagi “Oq uy” jome masjidi poydevoriga birinchi tamal toshini yaxshi tilak va xayrli duolari ila qo‘yib berdilar hamda masjidning ko‘rkam, barcha talab va ehtiyojlarga mos bo‘lishiga doir fikr-mulohazalarini bildirdilar. Ayniqsa, namozxonlar uchun masjid kutubxonasini tashkil etish va tashrif buyuradigan nufuzli dunyo ulamolari, martabali mehmonlar bilan o‘zaro muloqot o‘tkazish uchun munosib shart-sharoitlar hozirlashni alohida ta’kidladilar.
Masjid bir vaqtda ikki mingdan ortiq kishi namoz o‘qishiga mo‘ljallangan. Masjid poytaxtimizga vodiy tomondan kirib kelish manzili – Farg‘ona yo‘li ko‘chasida joylashganini e’tiborga olib, yo‘lovchilar uchun alohida shart-sharoitlar tashkil etish belgilangan. Shuningdek, masjid yonida loyihada nazarda tutilganidek, mo‘jaz mehmonxona va majlislar zali ham qad ko‘taradi.
Qurilishi boshlanishi marosimida ulamolar, mahalla faollari va nuroniy otaxonlar ham ishtirok etdilar. Muftiy hazratdan keyin ulamolar, nuroniylar va ezgu niyatda yig‘ilgan qalbi pok insonlar ham birin-ketin poydevorga g‘isht quydilar.
Muftiy hazratlari Toshkent viloyatida barpo etilayotgan yangi masjidlarda borayotgan qurilish jarayonlari bilan tanishib, muhim tavsiyalarini berdilar. Ulardan biri Quyi Chirchiq tumanidagi “Xo‘ja” jome masjidi. O‘tgan yili ushbu jomeni qayta qurish ishlari boshlangan edi. Mahalla ahlining sa’y-harakati ila masjid poydevori yangidan tiklanib, 11 fevral kuni muftiy hazratlari xayrli duolar ila masjid binosining birinchi g‘ishtini qo‘yib berdilar. Yangi masjid 500 kishini o‘z bag‘riga sig‘diradigan xonaqoh, tahoratxona, xizmat xonalaridan iborat bo‘ladi.
Muftiy hazratlarining navbatdagi tashriflari Oqqo‘rg‘on tumanidagi “Nodirxon qori” jome masjidi bo‘ldi. Sig‘imi mingdan ortiq kishiga mo‘ljallanayotgan mazkur jomega 2017 yil 9 noyabr kuni birinchi g‘isht qo‘yilgan edi. Hozirga kelib masjid binosi qad ko‘tarib, tom qismi yopildi.
Oqqo‘rg‘on tumanidagi yana bir qurilishi davom etayotgan “Erbo‘ta qozi” jome masjidida ham muftiy hazratlari bo‘lib, qurilish ishlari bilan yaqindan tanishdilar. Bu joyda barpo etilishi lozim bo‘lgan shart-sharoitlar yuzasidan tavsiyalar berdilar. Masjid namozxonasining sig‘imi 500 kishilik bo‘lib, shu yilning oxiriga tugashi ko‘zda tutilgan.
Muftiy hazratlari yangi bunyod etilayotgan jome masjidlarga tashriflari davomida mo‘min-musulmonlar uchun tashkil etilgan shart-sharoitlar, namozxonlar ibodat qilishlari uchun yaratilgan qulayliklar va jome masjidlarni o‘ziga xos uslub va me’morchilik asosida bunyod etishga alohida e’tibor qaratdilar.
Masjidlarga jam bo‘lgan nuroniy otaxonlar muhtaram Prezidentimizning diniy-ma’rifiy sohadagi ulkan islohotlari sababidan xalqimizga tuhfa etilayogan ana shunday muhtasham jome masjidlar uchun minnatdorlik so‘zlarini izhor etib, ona-Vatanimiz obodligi, xalqimiz faravonligini tilab muftiy hazratlari boshchiliklarida duoi xayrlar qildilar.
Bunday ezgu ishlarga hissa qo‘shish istagidagi quruvchilar o‘z mahoratlarini ko‘rsatib, bor kuch-g‘ayrat bilan mehnat qilishmoqda, saxovatpesha insonlar o‘zlarining himmatlarini ko‘rsatishmoqda. Zero, masjid qurishning savobi ulug‘ ekani Islom manbalarida bayon qilingan. Bu haqda Anas ibn Molik (roziyallohu anhu)dan bunday rivoyat qilingan: “Kim masjidda bitta chiroq yoqsa, o‘sha chiroqning nuri o‘chgunicha farishtalar u kishining haqqiga istig‘for aytib turadilar”.
Haq taolo ushbu jome masjidlarning qad rostlayotgan binosini fayzu barakotli aylasin.

O‘zbekiston musulmonlari idorasi Matbuot xizmati