O‘tgan 27 yanvar kuni Misr davlatida xizmat safarida bo‘lib turgan O‘zbekiston musulmonlari idorasi bo‘lim mudirlari Muhammad Ayubxon domla Homidov va Kamoliddin Mahkamov O‘zbekistonning Misrdagi elchixonasi vakillari hamroxligida Iskandariya shahridagi “Iskandariya” kutubxonasi faoliyati bilan yaqindan tanishib, boy tajribalarni o‘zlashtirdilar.

Ma’lum bo‘lishicha, Iskandariya kutubxonasida 2 mln. 310 mingdan ziyod qo‘lyozma, toshbosma va boshqa  asarlar mavjud. Kutubxona qo‘lyozmalar markazi mudiri Midhat Iysa, qo‘lyozmalarni ta’mirlash bo‘limi boshlig‘i Voil Muhammad Ibrohim va qadimiy asarlarga kimyoviy ishlov berish bo‘limi boshlig‘i Husom ad-Diyb bilan muloqotlar o‘tkazilib, foydali ma’lumotlarni qo‘lga kiritildi.

Uchrashuvlarda misrlik mutaxassislar o‘zbekistonlik mas’ul xodimlarga qo‘lyozma va toshbosma asarlarni saqlash, kimyoviy tekshiruvlar o‘tkazish, kitoblarni ta’mirlash, qo‘lyozma va toshbosma asarlardan elektron nusxa olish hamda foydalanish tartiblari haqida batafsil gapirib berdilar.

28 yanvar kuni esa mutaxassislarimiz Qohira shahridagi Milliy kutubxona va Davlat bosh arxivi faoliyati bilan yaqindan tanishdilar. Ushbu fondda “Usmon Mus'hafi” hamda qo‘lyozma va toshbosma asarlar saqlanar ekan. Kutubxona xodimlari o‘zbekistonlik mutaxassislarga qo‘lyozma va toshbosma asarlarning saqlanishi, kimyoviy ishlovlar berish, kitoblarni ta’mirlash bosqichlari va nodir asarlar uchun maxsus qog‘ozlar tayyorlash tartiblari haqida atroflicha ma’lumotlar berdilar.

Misr safari davom etmoqda

O‘zbekiston musulmonlari idorasi matbuot xizmati