Arab diyorlaridan birida qozi bo‘lib ishlaydigan kishi hikoya qiladi.

Kunlarning birida oldimga eri bilan ajrashmoqchi bo‘lgan ayol keldi. Undan: “Nima sababdan eringiz bilan ajrashmoqchisiz?” deb so‘radim.

U: “Hozir, hammasini aytib beraman”, dedi hayajonlanib.

“Juda yaxshi. Unda varaqqa eringizning salbiy sifatlarini yozing!” dedim.

Ayol biroz o‘ylanib turib, varoqqa quyidagilarni yozdi:

1. Erim meni haqorat qiladi.
2. Erim juda ham ziqna. Istagan narsamni sotib olishimga pul bermaydi.

Uning so‘zlarini tinglagach: “Ajrashishingizga shumi sabab?” dedim.

Ayol: “Qanday qilib bunday er bilan yashash mumkin”, dedi achchiqlanib.

Men: “Endi bu qog‘ozga eringizning ijobiy sifatlarini yozing!” dedim.

Ayol biroz uylanib turib: “Erimda birorta ijobiy sifat topa olmadim” dedi-da, qog‘ozni qaytarib berdi.

Men hayron bo‘lib: “Nahotki, oila qurganingizga qancha bo‘ldi?” deb so‘radim.

U: “O‘n ikki yil. To‘rtta farzandimiz ham bor”, deb javob berdi.

“Eringiz qayerda ishlaydi?” dedim.

Ayol: “Nufuzli tashkilotda ishlaydi. Maoshi ham anchagina”, dedi.

Undan yana: “Odatda eringiz uyga qachon qaytadi?” deb so‘radim.

U: “Hamisha asr namozidan keyin qaytadi. Kelishi bilan bolalarim bilan uynaydi”, dedi.

Ayolning qo‘liga oq qog‘ozni berib, “Birinchi ijobiy sifatni yoz”, dedim. U: “Erim har kuni ishdan qaytgandan so‘ng farzandlarim bilan uynaydi”, deb yozdi. So‘ngra uning so‘zlaridan ular har yili biror joyga dam olishga borishlarini ham bildim. Undan birin-ketin boshqa savollarni so‘radim. U savollarimga javob berar va eridan ijobiy sifat deb topgan ishlarimni qog‘ozga tushirar edi. Bir zumda varoqdagi ijobiy sifatlar 12 taga yetdi.

Ijobiy sifatlar yozilgan varoqni ayolning o‘ng qo‘liga, salbiy sifatlar yozilgan varoqni esa chap qo‘liga tutqazib: “Endi eringizdan ajrashasizmi?” dedim.

Ayol bo‘layotgan ishdan hayron bo‘lib: “Nima deyishimni ham bilmay qoldim. Alloh gunohlarimni kechirsin. Lekin haqoratlaydigan va baxillik qiladigan er bilan qanday hayot kechirish mumkin? dedi.

“Eringiz sizni haqorat qilishi yoki sizga nisbatan baxillik ila muomalada bo‘lishini hargiz oqlamayman. Biroq, har bir insonda salbiy sifatlar bilan birga ijobiy sifatlar ham bo‘ladi. Endi haqoratlashi va baxilligiga keladigan bo‘lsak, uni muolajasini qilsa bo‘ladi. Ammo shuni aniq biling-ki, bu salbiy sifatlarning davosi ajrashish emas”.

Ayol qozining so‘zi tinglagach: “Menga ertagacha vaqt bering, uylab ko‘ray, keyin javobimni aytaman”, deb mahkamadan chiqib ketdi. Shundan so‘ng ayol qozining oldiga boshqa qaytib kelmadi...

Doktor Hasson Shamsi Boshaning “Er-xotin ikkisiga aytiladigan nasihatlar” kitobidan

Abdushukur MURADOV tarjimasi