Payg‘ambarimiz sollallohu alayhi va sallam: “Gunohlar ichida shundaylari borki, unga faqat halol rizq topish maqsadida qilingan harakat kafforat bo‘ladi”, deb o‘git berganlar (Tabaroniy  rivoyati).

Abu Hurayra roziyallohu anhudan rivoyat qilinadi: Payg‘ambarimiz sollallohu alayhi va sallam: “Shunday zamon keladiki, odamlar o‘zi topgan molu-dunyosini halol yo‘l bilan topdimi yoki harom yo‘l bilan topdimi ishi bo‘lmay qoladi”, dedilar (Imom Buxoriy rivoyati).

Buyuk alloma Abu Lays Samarqandiy dedilar: “Kim kasbining halol bo‘lishini xohlasa besh narsani mahkam tutsin:

kasbi sababli Allohning birorta farzini ortga surmasin va ularda nuqsonga yo‘l qo‘ymasin;

kasbi sababli Allohning maxluqotlariga ozor bermasin;

kasbidan mol jamlashni emas, balki o‘zi va ahli-ayolining iffatini saqlashni niyat qilsin;

kasb qilaman deb o‘zini ortiqcha qiynamasin;

rizq Allohdan deb bilsin, kasbdan emas, kasb – sabab, xolos. Kasb qiluvchi har bir musulmonga halol kasb qilish ilmini o‘rganish vojibdir”.

Payg‘ambarimiz sollallohu alayhi va sallam: “Alloh taolo hunarmand bandani yaxshi ko‘radi”, deb marhamat qilganlar (Termiziy rivoyati).

Oybek MA’RUPOV,

 “Ko‘kaldosh” o‘rta maxsus islom bilim yurti talabasi