Kuni kecha Makka shahridagi musulmonlar uchun muqaddas maskan hisoblanmish “Haram masjidi” hududida ko‘ngilsizlik ro‘y berdi. Masjidning qayta qurish ishlari davom ettirilayotgan qismida avtokran ag‘darilib ketdi. Yaxshiyamki avtokran qurilish maydonining o‘ziga quladi. Saudiya Arabistoni Ichki ishlari vazirligi tarqatgan ma’lumotga ko‘ra, mazkur ko‘ngilsizlikda hech kim jabrlanmadi.
Eslatib o‘tamiz 2015 yil haj mavsumida kuchli shamol tufayli “Haram masjidi”dagi katta kran ag‘darilishi oqibatida yuzdan ortiq kishi halok bo‘lib, yana o‘nlab kishilar jarohat olgan edi.
Internet ma’lumotlari asosida
Maqsud KARIMOV
tayyorladi.
Bir taksichi yurtidagi bir boy odamni manziliga yetkazdi. Boy odam tabloda ko‘rsatilgan mablag‘ni to‘ladi. U taksidan tushayotganida taksichi unga: “Bilasizmi, kecha o‘g‘lingizni bir manzilga olib borib qo‘ygandim. U menga tabloda ko‘rsatilganidan ancha ko‘proq pul berdi. Nega siz undan ham boy bo‘laturib bunday qilmadingiz?”
Boy odam taksichiga kulimsirab qaradi: “Siz nimani kutgan edingiz? O‘g‘lim otasi boy bo‘lgani uchun shunday qilgandir, men esa yetim o‘sganman”, deb tushib ketdi.
Ha, kimki o‘z mehnati bilan daromad topsa, uni qadrlaydi. Kimgaki katta mablag‘ qiyinchiliksiz kelsa, uni keraksiz o‘rinlarga ham sarflaydi. Shunday ekan, bolalarimizga mehnat bilan erishishni o‘rgatsak, ular to‘g‘ri tasarrufni o‘zlari o‘rganib oladi.
Akbarshoh Rasulov