2018 yil 25 yanvar kuni diniy idorada O‘zbekiston yoshlar ittifoqi va O‘zbekiston musulmonlari idorasi hamkorligida o‘quvchi yoshlar ishtirokida davra suhbati tashkil etildi. Ushbu tadbirda O‘zbekiston yoshlar ittifoqining 262- umumiy o‘rta ta’lim maktabi yetakchisi Otabekxo‘ja Safarov hamrohligida maktabning 45 nafar o‘quvchisi ishtirok etdi.

Tadbirni O‘zbekiston musulmonlari idorasi raisi o‘rinbosari shayx Abdulaziz Mansur hazratlari duo bilan ochib berdilar. Dastlab, o‘quvchilarga diniy idoraning maqsad va vazifalari haqida batafsil ma’lumot berildi. So‘ngra, masjidlar bo‘limi xodimi Is'hoqjon Begmatov so‘zga chiqib, ta’lim va tarbiya, odob-axloq, yoshlar o‘rtasida jinoyatchilikni oldini olish mavzusida ma’ruza qildi.

U o‘z nutqida jinoyat sodir etish juda ham og‘ir gunoh ekani, Qur’oni karim oyatlari va hadisi shariflarda bunday xatti-harakatlardan qattiq qaytarilganini jonli misollar orqali ta’sirchan qilib, tushuntirdi. Jumladan, “Bir ishning gunoh ekanini bilgan odam albatta undan qaytadi. Jinoyatning qaysi bir turini olib qaramang, dinimiz, insoniylikka xilofdir. Odam o‘ldirish, o‘g‘rilik, firibgarlik, tovlamachilik – bularning barchasi inson hayotiga zarar” deb ta’kidladi Is'hoqjon domla.

Uchrashuv juda ham ko‘tarinki ruhda, savol-javoblarga boy bo‘ldi. O‘quvchilar bugungi davra suhbatidan naqadar katta ma’naviy ozuqa olishganini ularning yonib turgan ko‘zlaridan anglash mumkin edi.

Tadbir yakunida O‘zbekiston musulmonlari idorasiga O‘zbekiston yoshlar ittifoning tashakkurnomasi taqdim etildi.

Eslatib o‘tamiz, 2017 yilning 1 dekabr kuni yoshlar bilan ishlash borasidagi ishlarni yangi bosqichga olib chiqish uchun O‘zbekiston Yoshlar ittifoqi bilan O‘zbekiston musulmonlari idorasi o‘rtasida hamkorlik qilish to‘g‘risidagi memorandum imzolash taklifi qo‘llab-quvvatlangan edi.

O‘MI Matbuot xizmati