Navoiy viloyatida bo‘lib o‘tayotgan Qur’on musobaqasining g‘oliblarini taqdirlash uchun Navoiy shahar hokimi Xalilov Umarbek tashrif buyurib, mukofotlarni topshirdi. Taqdirlash marosimida shahar hokimi so‘zga chiqib: “Ushbu musobaqa respublikamizda birinchi marta o‘tkazilyapti. Bizning eng asosiy maqsadimiz, viloyatimizda qancha qorilar borligini bilish, ularni qo‘llab-quvvatlash va ilohiy kalomga muhabbatli odamlarni ko‘paytirishdir. Ilk marotaba o‘tkazilayotgan ushbu musobaqada qatnashgan odam tarixda qoladi. Shuningdek, Kim Xudoning kalomini yodlasa, hech qachon kam bo‘lmaydi. Bugun Navoiy shahrimizda o‘zga fayz kezib yuribdi. U ham bo‘lsa shahrimizda qorilar jam bo‘lib, shunday musobaqa o‘tkazilishidir. Barchaga muvaffaqiyat tilayman, viloyat g‘oliblarini respublika va xorijda ham faxrli o‘rinlar olishlarini tilayman”, degan so‘zlarni bayon qildi.
Navoiy viloyati mutasaddilari tomonidan musobaqa ishtirokchilari va tomoshabinlariga ehson dasturxonlari yozildi hamda esdalik sovg‘alari topshirildi.
Qur’on musobaqasi diyorimizda mana shunday yuksak e’tibor, katta taraddud va eng yuqori darajada o‘tkazilmoqda. Bundan avval ham Sirdaryo viloyatidagi musobaqaning hududiy bosqichiga shaxsan viloyat hokimi tashrif buyurib, ishtirokchilarni taqdirlagani haqida xabar bergan edik. Mana shunday kayfiyat joylardagi musobaqaning har bir bosqichida kuzatilib, hokimiyat vakillarining tashrifi bilan musobaqa saviyasi yanada ko‘tarilmoqda.

O‘zbekiston musulmonlari idorasi Matbuot xizmati