Bugun, 7 dekabr kuni Indoneziyaning Jakarta shahridagi “Istiqlol” jome masjidi imom-xatibi Nasaruddin Umar boshchiligidagi delegatsiya diniy idoraga tashrif buyurdi. Mehmonlarni Din ishlari bo‘yicha qo‘mita raisi Ortiqbek Yusupov, Turizmni rivojlantirish davlat qo‘mitasi raisi Aziz Abduhakimov va O‘zbekiston musulmonlari idorasi raisi, muftiy Usmonxon Alimov hazratlari qabul qildilar.

Dastlab O.Yusupov O‘zbekistonda din sohasida amalga oshirilayotgan ishlar, muhtaram Prezidentimiz tashabbuslari bilan O‘zbekistonda Islom sivilizatsiyasi markazi, Samarqandda Imom Buxoriy xalqaro ilmiy tadqiqot markazi tashkil etilayotgani, ixtisoslashgan ilmiy maktablar o‘z faoliyatini boshlagani haqida so‘zlab berdi. U o‘z so‘zida ziyorat turizmini rivojlantirish bo‘yicha qilinayotgan sa’y-harakatlar to‘g‘risida alohida to‘xtalib, indoneziyaliklarni ruhiy ozuqa oladigan va inson qalbi orom topib, ma’naviy yuksalishiga xizmat qiladigan tabarruk qadamjolarimizni ziyorat qilishga taklif etdi.

Muloqotda muftiy Usmonxon Alimov hazratlari so‘z olib, O‘zbekiston va Indoneziya o‘rtasidagi hamkorlik ko‘p yillardan davom etib kelayotganini bildirdilar. Indoneziya davlatining sobiq prezidenti janob Suxarto 1989-1996 yillar oralig‘ida bir necha bor yurtimizga tashrif buyurgani, xususan, Samarqand viloyatiga safarini Imom Buxoriy hoki poki qo‘nim topgan maskanga yuksak ehtirom ko‘rsatish bilan boshlaganini muftiy hazratlari alohida ehtimom bilan esga oldilar.
Uchrashuvda Turizmni rivojlantirish davlat qo‘mitasi raisi A.Abduhakimov so‘z olib, Prezidentimiz tashabbusi bilan sayyohlik sohasiga katta e’tibor qaratilayotgani, Indoneziya bilan turizm yo‘nalishida juda katta ishlar rejalashtirilgani haqida so‘zladi. Bu borada barcha chora-tadbirlarni uyushtirish, charter reyslarni tashkil etish va viza tartiblarini soddalashtirish borasida O‘zbekiston tomoni tayyor ekanini A.Abduhakimov ma’lum qildi.
Shundan so‘ng, martabali mehmon Nasaruddin Umar janoblari o‘zining fikr-mulohazalarini quyidagicha bayon qildi:
– Men Jakarta shahridagi “Istiqlol” jome masjidi imom-xatibi hisoblanaman. Ushbu masjid imom-xatibi mamlakat Prezidenti tomonidan tayinlanadi va u barcha Indoneziyadagi masjidlar faoliyatini muvofiqlashtiradi. Biz O‘zbekistondagi ziyoratgohlarni ko‘rib hayratlandik va yuqoridagi gaplardan ilhomlanib, albatta, men Indoneziyadagi O‘zbekistonning turizm sohasi bo‘yicha vakili bo‘lishga tayyorman. 

Bizda umra safarlari ayni paytda Turkiya orqali amalga oshiriladi. Ziyoratchilar ushbu mamlakatda uch kun bo‘lishida. Agar yurtingizni Turkiya bilan qiyoslash mumkin bo‘lsa, mamlakatingizda juda ham katta ziyorat turizmi uchun imkoniyat bor. Ayniqsa, tarixiy obidalar, osori atiqalar va tarixiy voqealarning adog‘i yo‘q, – dedi janob Nasaruddin Umar.

Martabali mehmon so‘zida davom etib, Indoneziya davlatidan bir oyda 300 ming ziyoratchi Turkiya orqali umra safariga borishi, agar ular mamlakatimizdagi tabarruk joylar to‘g‘risida xabar topishsa, albatta, hech ikkilanmay O‘zbekistonni tanlashlarini ta’kidladi.

Muloqot davomida ziyorat turizmini rivojlantirish uchun Jakarta–Toshkent yo‘nalishida to‘g‘ridan to‘g‘ri reys ochish, sayyohlik vizasi berishni joriy etish, O‘zbekistonning turizm salohiyatini bildiradigan ixcham va lo‘nda shior tanlash, tajribali mutaxassislar ish uslubidan foydalanish juda katta natija berishi alohida qayd etildi.
Tashrif samimiy va do‘stona ruhda o‘tdi.

O‘zbekiston musulmonlari idorasi
Matbuot xizmati