Shu yilning 7-11 oktyabr kunlari  Saudiya Arabistoni Podshohligining Makkai mukarrama shahrida XXXIX  Xalqaro Qur’oni karim musobaqasi o‘tkaziladi. Vakillarimizdan Toshkent islom instituti bitiruvchisi Saydulloh qori Tohirov va “Ko‘kaldosh” o‘rta maxsus islom bilim yurti talabasi Abdulbasir qori Kamolov mazkur musobaqada ishtirok etish uchun 2 oktyabr kuni Saudiya Arabistoniga jo‘nab ketishdi. 

Ushbu musobaqada 50 dan ortiq davlatdan kelgan, 200 ga yaqin qorilar ishtirok etadi. Musobaqa shartlari quyidagilardan iborat:

1. Qur’on karimni tajvid qoidasi bilan to‘liq yoddan o‘qib berishi bilan birga Qur’oni karimdagi oyati karimalarning tafsirini bilishi.
2. Qur’on karimning 30 porasini tajvid qoidasi bilan yoddan o‘qib berishi.
3. Qur’on karimning 15 porasini tajvid qoidasi bilan yoddan o‘qib berishi.
4. Qur’on karimning 5 porasini tajvid qoidasi bilan yoddan o‘qib berishi.

Vakillarimiz musobaqaning 2 va 3 shartlari bo‘yicha ishtirok etadi.

Shuningdek, shu yilning 7 – 9  oktyabr kunlari Rossiya Federatsiyasining poytaxti Moskva shahrida XVIII Xalqaro Qur’oni karim musobaqasi bo‘lib o‘tadi. Har yili dunyoning sharq va g‘arb mamlakatlari vakillari ushbu musobaqada ishtirok etib kelmoqda.  Hozirda mazkur musobaqada qatnashish uchun 32 ta mamlakat  vakillari tashrif buyurishdi. Quvonarli jihati shundaki, ushbu musobaqada yurtimiz vakili  Toshkent shahar, Uchtepa tumanidagi “Hazrati Umar” jome masjidi imomi noibi Azimboyev Valixon qori ham qatnashadi.  Vakilimiz so‘ziga ko‘ra, Rossiya Federatsiyasida o‘tkaziladigan XVIII Xalqaro Qur’oni karim musobaqasi shartlari Qur’oni karimni tajvid qoidasi bilan o‘qish va uni chiroyli talaffuz qilishdan iborat. Qorilarimizga mazkur xalqaro nufuzli musobaqalarda oliy o‘rinlarni egallashini Allohdan so‘rab qolamiz. 

O‘zbekiston musulmonlari idorasi

Xalqaro aloqalar bo‘limi xodimi,

A.Parpiyev