Fuqarolarimizni haj va umra ziyoratiga yuborish, o‘rnatilgan tartibga ko‘ra, Yurtboshimiz Farmonlari bilan tuzilgan “Haj va Umra tadbirlarini tashkil etish va o‘tkazish bo‘yicha Jamoatchilik kengashi” ning qarorlari va tavsiyalari asosida tashkil etilmoqda. O‘tgan yigirma besh yil mobaynida muborak safarlarni tashkil etish borasida katta yutuqlarga erishildi. Bugungi kunda bu ishlar yanada takomillashdi va ziyoratchilarimizga ko‘plab qulay sharoitlar yaratildi. Buning uchun Yaratganga cheksiz shukrlar qilishimiz darkor.

Bu yili ziyoratchilar “O‘zbekiston havo yo‘llari” milliy aviakompaniyasining “BOING” rusumli havo kemalarida Toshkent, Namangan, Buxoro, Urganch, Qarshi va Samarqand shaharlaridan amalga oshirilishi rejalashtirilgan charter reyslarda 24 avgust - 4 sentyabr kunlari jo‘nab ketishadi,  17-28 sentyabr kunlari qaytib kelishadi.

Shunga ko‘ra, har yilgi tajribadan kelib chiqqan holda, ziyoratchilarimiz uchish vaqtlaridan 5 soat oldin safarga tayyorgarlik ko‘rish maqsadida tuzilgan jadvalga muvofiq, “Novza” masjidiga yig‘ildilar. Ularga o‘z guruh rahbarlari tomonidan kerakli tavsiyalar va ko‘rsatmalar berildi.

Ziyoratchilarni Toshkent xalqaro aeroportiga izzat-ikrom bilan shinam avtobuslarda olib borildi.

Bugun 24 avgust kuni O‘zbekiston haj delegatsiyasi, ishchi guruhi a’zolari, shifokorlar, oshpazlar va ziyoratchilardan iborat jami 450 dan ziyod ziyoratchilar ikki reysda Saudiya Arabistoni Podshohligiga jo‘nab ketdilar.

Ziyoratchilarimiz Madinai munavvarada “Masjid an-Nabaviy” dan uncha uzoq bo‘lmagan “Javharat Ar-Rashid” mehmonxonasiga, Makkai Mukarrama shahrida esa yangi qurilgan va zamonaviy jihozlangan hashamatli “Abroj al-Hidoya” mehmonxonasiga joylashadilar. Ular 3 mahal milliy taomlar, issiq choy va yaxna ichimliklar bilan ta’minlanadi.

Haj arkonlari va hojilarimiz sharoitini yoritib berish uchun ishchi guruh tarkibidagi Toshkent islom universiteti “Ziyo” studiyasi vakillari tomonidan intervyu va reportajlar olinib,  “O‘zbekiston” telekanali orqali namoyish etilishi rejalashtirilgan.

Ma’lumki, Saudiya Arabistoni Haj vazirligi MDH mamlakatlari ichida O‘zbekistonda haj va umra ishlari shunday tartibli, namunali va havas qiladigan darajada tashkil etilganini mamnuniyat bilan e’tirof etmoqda.

Alloh taolo haj amallarini ado etish yo‘lida mol-dunyo sarflab, muqaddas maskanlar sari otlangan aziz yurtdoshlarimizni jonajon Vatanimizga, ota-onalari va farzandlari bag‘riga sog‘-salomat qaytishlarini nasib etsin, qiladigan haj ibodatlarini qabul etib, gunohlarini mag‘firat aylasin!

 O‘MI Xalqaro aloqalar bo‘limi