Obuna – 2024
Donishmandlardan birining: «Agar rejangiz bir yillik bo‘lsa – sholi eking. O‘n yillik bo‘lsa – daraxt o‘tqazing. Agar bir asrlik bo‘lsa – farzandlaringizga ta’lim-tarbiya bering», degan hikmatli gapi bor.
Haqiqatan, har birimizning rejamiz bir asrlik. Niyatimiz ham shunga yarasha: xonadon ahllarimizning barchasiga sof Islom ta’limotini go‘zal tarzda yetkazish, ularni ma’rifatli qilish, ma’naviyatini yuksaltirishdir. Tabiiyki, bu jarayonda bizga eng yaqin ko‘makchi bu – “Hidoyat” va “Mo‘minalar” jurnallari hamda “Islom nuri” gazetasidir.
Mazkur nashrlarga 2025 yil uchun obuna mavsumi boshlandi.
“Shamsuddinxon Boboxonov” nashriyot-matbaa ijodiy uyi Davriy nashrlar bo‘limi mudiri T.Nizomov hamda Marketing va innovatsiyalar bo‘limi mudiri A.Yusupov Navoiy va Buxoro viloyatlarida xizmat safarida bo‘lib, viloyatlar, tumanlar va shaharlar bosh imom-xatiblari bilan uchrashuvlar o‘tkazdi.
Yig‘ilishlarda “Hidoyat” va “Mo‘minalar” jurnallari hamda “Islom nuri” gazetasiga 2025 yil uchun obuna mavsumini har yilgidan ko‘ra uyushqoq va ko‘tarinki ruhda o‘tkazish, har bir xonadonga ziyo va ma’rifat kirib borishini ta’minlash zarurligi alohida qayd etildi.
– “Hidoyat” va “Mo‘minalar” jurnallari hamda “Islom nuri” gazetasi yildan-yilga mazmun-mundarijasi boyib, shaklan juda go‘zal bo‘lib boryapti, – deydi Navoiy viloyati bosh imom-xatibi Tohir domla Ro‘ziyev. – Inshoalloh, 2025 yil uchun obunani ko‘p qilamiz. Juma mav’izalarida, to‘y va marosimlarda davriy nashrlarimiz targ‘ibotni kuchaytiramiz. Aslida, bu ham amri ma’ruf va nahyi munkardir. Zero, Imom Termiziy bobomiz rivoyat qilgan hadisda Nabiy sollallohu alayhi va sallam: “Yaxshilikka dalolat qiluvchi yaxshilik qiluvchi kabidir”, deganlar.
Tadbirlar so‘ngida “Hidoyat” va “Mo‘minalar” jurnallari hamda “Islom nuri” gazetasiga 2024 yil uchun obuna mavsumida jonbozlik ko‘rsatgan masjidlar hamda tumanlar bosh imom-xatiblari “Shamsuddinxon Boboxonov” nashriyot-matbaa ijodiy uyi tomonidan sovg‘alar bilan taqdirlandi.
Hidoyat.uz
Farg‘ona viloyatida «Vaqf» xayriya jamoat fondining viloyat filiali tomonidan ikki yuzga yaqin ehtiyojmand oilalar uchun xayriya tadbirlari tashkil etildi. Bu jarayonda kam ta’minlangan oilalarga ko‘mir, issiq kiyim-kechak, poyabzal, elektr isitgichlar, oziq-ovqat mahsulotlari va uy-ro‘zg‘or uchun maishiy texnikalar taqdim etildi. Shuningdek, homiylarimiz tomonidan boquvchisi yo‘q oilalarda voyaga yetayotgan bolajonlarga to‘kin dasturxon yozilib, kabobxo‘rlik tashkil etildi.
Qish mavsumida yangi poliz mahsulotlari va sarxil mevalar, issiq kiyimlar, ayniqsa sovuq kunlarda asqatadigan ko‘mir bilan ehtiyojmand oilalarga iliqlik ulashgan, ularni xursand qilgan barcha homiylardan, saxovatpesha fuqarolarimizdan Alloh rozi bo‘lsin.
Xayriya tadbirlarining yuqori tashkilotchilik va mehr-muruvvat bilan o‘tkazilishiga o‘z hissasini qo‘shgan barcha ishtirokchilar, ko‘ngillilarni O‘zi ulkan ajr-savoblar bilan mukofotlasin!
Vaqf.uz