“Bismillah” degan so‘zni ko‘p ishlatamizu, ammo uning juda ko‘plab fazilatlaridan xabardor emasmiz. Uyga kirganda va uydan chiqqanda, ovqatlanishdan, ichimlik ichishdan oldin yoki biror narsa yozganda shu kabi ko‘plab holatlarda “Bismillah”ni aytish Rasululloh sollallohu alayhi vasallamning sunnatlaridir.

Rasululloh sollallohu alayhi vasallam: “Har bir ahamiyatli ish “Bismillahir rohmanir rohiym” bilan boshlanmas ekan, uning oxiri kesikdir”, deganlar.

Boshqa bir hadis sharifda: “Qaysi ish “Bismillahir rohmanir rohiym” bilan boshlanmas ekan, u ishda baraka bo‘lmaydi” deyilgan.

Demak, “Bismillahir rohmanir rohiym” deb boshlangan ishda baraka bo‘lar ekan. Qolaversa, “bismillah” aytilgan ishdan shayton qochadi.

Agar “bismillah”ni aytib derazani yopsangiz shayton uyingizga kira olmaydi.

Agar uyga “bismillah” deb kirsangiz, shayton uyingizga kira olmaydi.

Agar ko‘chaga “bismillah”ni aytib chiqsangiz, shayton sizga hamroh bo‘la olmaydi.

Agar “bismillah”ni aytib derazani ochsangiz, shayton uyingizga kira olmaydi.

Agar ovqat qilishni “bismillah” bilan boshlasangiz, shayton ovqatingizga sherik bo‘la olmaydi.

Agar tahoratni “bismillah valhamdu lillaah” deb boshlasangiz, tahoratingiz singunicha farishtalar sizga yaxshilik, mukofot va savoblar yozib turadilar.

“Bismillahir rohmanir rohiym” Alloh taoloning Kitobi – Qur’oni karimdan bir oyat bo‘lgani uchun ham uni ko‘p aytish bilan ulkan ajrlarga ega bo‘linadi. Qolaversa, har bir harf uchun 10 dan 700 gacha savob beriladi.

“Bismillahir rohmanir rohiym” 19 harfdan iborat, bir aytish 190 savobga teng bo‘ladi. Har bir harf Allohning marhamati bilan ko‘paytirilib, 700 ming barobarga yetadi va Allohning fazli ila yana ham ko‘payatiriladi. Agar bir kunda hech bo‘lmaganda 50, 100 marta “Bismillah”ni aytishga odat qilsak, qancha savobga hamda Allohni zikr qilishga muvaffaq bo‘lishimiz mumkin.

Davron NURMUHAMMAD