Joriy yil 29 mart kuni Prezidentimiz Shavkat Mirziyoev raisligida “Yashil makon” loyihasi doirasidagi ishlar hamda chiqindilarni boshqarishni takomillashtirish masalalari bo'yicha o'tkazilgan videoselektor yig'ilishida shu yil bahorda loyiha doirasida hududlarda bog'lar yaratish, yo'l bo'ylarida 10 qatordan nihollar ekish bo'yicha ishlar boshlangani, bu Namangan viloyatida ham yaxshi yo'lga qo'yilgani qayd etildi.

Farg'ona vodiysini elektr energiyasi bilan ta'minlovchi “To'raqo'rg'on issiqlik elektr stantsiyasi” korxonasida davlatimiz rahbari ilgari surgan tashabbuslarni ro'yobga chiqarish borasida bir qator ijobiy ishlar amalga oshirilmoqda.  

Jumladan, stantsiya atrofida ”yashil belbog'” tizimi hududini yanada kengaytirish maqsadida mahalliy hokimlik tomonidan maxsus ajratib berilgan 5 gektar maydonda ko'chat ekish ishlari jadallik bilan olib borilmoqda. Ushbu joyda bodomzor tashkil qilinib, bog'ning atrofini akatsiya ko'chati bilan o'rab chiqish rejalashtirilgan. Hozirgacha 5900 tupdan ziyod yosh nihol ekildi va yana 300 dan ortiq ko'chat o'tqazish rejalashtirilgan. Shu bilan birga, ko'chatlarni tomchilatib sug'orish tizimi ham bunyod etilmoqda.  

Stantsiyada o'tgan 2023 yil bahorgi mavsumda 1 ming 300 tupdan ortiq, kuzgi mavsum davomida esa yana qo'shimcha 2 ming 183 tup mevali va manzarali ko'chat ekildi. Nihollar qadalgan barcha maydonlarda uzunligi jami 17 ming 240 metrga teng tomchilatib sug'orish tizimi yo'lga qo'yildi.

“Yashil makon” umummilliy harakati doirasida Uchqo'rg'on tumanida ham bahorgi mavsum ko'chat ekishga kirishildi. Tuman sektor rahbarlari va faollar ishtirokida Ulug'bek nomidagi mahalla hududida manzarali ko'chatlar o'tqazildi.

Joriy yil bahorida tumanda jami 902 ming dona manzarali, mevali va boshqa turdagi daraxt, 700 ming terak qalamchasi va 110 ming tup atirgul ko'chati ekish bo'yicha manzilli dastur ishlab chiqilgan. Qolaversa, ko'p qavatli uylar atrofi, xiyobonlar, sayilgohlar va boshqa manzillarga mavsumiy gullar, rayhon va boshqa turdagi mahalliy ko'chatlar o'tqaziladi.

Ekilgan ko'chatlarni parvarishlash ishlari, ya'ni sug'orish, tag qismini chopiq qilish, mineral va organik ozuqalar bilan oziqlantirish hamda zararkunandalarga qarshi ishlov berishga tegishli mutaxassislar tomonidan alohida ahamiyat qaratiladi.

Oqilxon Dadaboyev, O'zA muxbiri