Ruhiy taskinlik – 1

Ikki amal har bir mo‘minga manfaat keltiradi:

- husni xulq;

- keng qalblik.

Ikki amal musulmonning darajasini baland qiladi:

- Tavoze’;

- Muhtojlarga yordam berish;

Ikki amal balo-ofatni daf qiladi:

- Sadaqa;

- Silai rahm.

“Muflis ya’ni bankrot odam kim?” deb so‘radilar. “Bankrotlik 3 turga bo‘linadi”, deyildi.

Birinchisi, ovchi it kabi. Qiynalib bir hayvonni ovlaydi-yu, lekin ovlagan o‘ljasini boshqasi ilib ketadi.

Ikkinchisi, baxil odam kabi. Qancha ter to‘kib boyliq yig‘adi, ammo to‘plagan barcha mol-dunyosi boshqalar uchun qoladi.

Uchinchisi, g‘iybatchi odam kabi. Ne mashaqqatlar bilan xayrli ishlar qiladi, birok uning savobi g‘iybat qilgan odamlariga o‘tib ketadi.

4 ta qoidani hayotingiz uchun asos qilib oling!

1. Odamlarni rozi qilaman deb o‘zingizni o‘zgartirmang!

2. Odamlarning olqishi uchun boshqa odamlarga taqlid qilmang!

3. Omadsizlik sababli g‘amga botmang!

4. Yutuqlaringiz bilan kibrga berilmang!

Eng afzal rizq bu – mol-dunyo emas! Balki eng afzal rizq bu – qalb xotirjamligi, pok qalb, sog‘lom fikr va aql, ona duosi, ota g‘amxo‘rligi, farzand tabassumi, sizni ko‘rmay qolishsa izlaydigan, unutsangiz yodingizga soladigan, duolarida unutmaydigan sodiq do‘stlardir.

Solih do‘st yulduz kabidir, agar yo‘ldan adashsangiz sizga to‘g‘ri yo‘lni ko‘rsatadilar, Qiyomat kuni Allohning Arshi soyasida sizni kutadilar chunki ular sizni faqat Alloh taolo uchun yaxshi ko‘radilar.

Dengizdagi baliq og‘zini ochmasa qarmoqqa ilinmaydi. Shunday ekan, tilingni tishlaring ortida saqla! Bilginki, barcha xatolar tildandir. Yomg‘ir kabi yaxshiliklar olib keluvchi bo‘l!

Aslo dunyo mendan yuz o‘girgan dema! Ehtimol, sen unga teskari turgandirsan.

Ibn Juziy aytadilar: “Ibodatning mashaqqati ketadi, lekin savobi qoladi. Gunohning ham lazzati ketadi, ammo azobi qoladi”.

Bir kishi baland bino va qasrlarni ko‘rib: “Alloh taolo shuncha boyliklarni taqsimlaganda biz qayerda edik?” deb do‘stidan so‘radi. Do‘sti uni shifoxonaga olib bordi-da: “Alloh taolo shuncha kasalliklarni taqdir qilganida biz qayerda edik?” dedi. Shunday ekan har bir holatda va vaqtda Allohga hamd ayting!

Agar turmushning sinov va tashvishlaridan charchagan bo‘lsangiz, mahzun bo‘lmang! Ehtimol, Alloh taolo O‘ziga yolvorib duo qilishingizni istayotgandir. Tabassum qilishingiz uchun baxtni kutmang, balki baxtli bo‘lmaguningizcha tabassum qilishda davom eting!

Hadeb xavotirga tushavermang, axir har bir ish Allohning izni ila bo‘ladiku?! Nega hali noma’lum ishlar haqida buncha qayg‘urasiz, axir har bir narsa Allohga ma’lumku!

Shunday ekan, xotirjam bo‘ling! Hafiz bo‘lgan Alloh taolo sizni ko‘rib turibdi. Qalbingizdan: “Har bir ishimni Allohga topshiraman” deb ayting!

Biz qaysi amalimiz sababli Allohning rahmati bilan Jannatga kirishimizni bilmaymiz. O‘qigan namozimiz yoki qilgan xayr-ehson, sadaqamiz sabablimi, suv ulashganimiz yo bir mo‘minning hojatini oson qilganimiz, duo yoki zikrimiz sabablimi? Shunday ekan, amal qiling, biror amalingizni kichik sanamang! Alloh taologa xolis toat va ibodat qiling!

Davron NURMUHAMMAD